શહેરમાં ટ્રાફિકના નવા નિયમોનો અમલ થયા બાદ હવે પોલીસ વધુ કડકાઈ દાખવી રહી છે. ટ્રાફિકના નિયમભંગ બદલ વાહનચાલકો સામે તવાઈ બોલાવાઈ છે. ગઈ કાલે હેલ્મેટ વગર ૪૩૮ અને ફોન પર વાત કરનારા ૧૫૦ લોકોને ટ્રાફિક પોલીસે દંડ ફટકાર્યો હતો. હવે વાહન ચલાવતી વખતે કાનમાં ઈયર ફોન ભરાવીને જતા લોકોને પણ પોલીસ રોકશે, જોકે આ માત્ર લોકો કાયદાનું પાલન કરે તે માટે કરાશે અને તેમની પાસેથી કોઈ દંડ લેવામાં આવશે નહીં.
જો તમે મોટા ભાગના સમયમાં ઈયર ફોન ભરાવીને કલાકો સુધી ગીતો સાંભળતાં વાહન ચલાવો છો તો સતર્ક થઈ જજો. વાહન ડ્રાઇવ કરતાં કરતાં આજના યુવાનોને કાનમાં ઈયર ફોન ભરાવીને ગીતો સાંભળવાની ટેવ હોય છે.
જોકે હવે વાહન ચલાવતી વખતે કાનમાં ઈયર ફોન ભરાવીને જતા લોકો પર તવાઈ આવશે, કારણ કે વાહન ચલાવતી વખતે કાનમાં મ્યુઝિક વાગતું હોવાથી અન્ય વાહનનાં હોર્ન સંભળાતાં નથી, જેના કારણે ઘણી જગ્યાએ અકસ્માતની ઘટના પણ બને છે.
હાલમાં શહેરના લગભગ ૧૩૦૦ ટ્રાફિક પોલીસ કર્મચારીઓ અને ૧૨૦૦ ટ્રાફિક બ્રિગેડ જવાનો ૨૧૩ ટ્રાફિક જંકશન પર તહેનાત કરવામાં આવ્યા છે. આ ડ્રાઇવ માત્ર કાયદાનું પાલન કરાવવા માટે કરાશે, તે દરમિયાન કોઈ દંડ લેવાનો નથી, પરંતુ વાહન ચલાવતી વખતે મોબાઈલનો ઉપયોગ જોખમી સાબિત થઇ શકે છે તેવી વાહનચાલકોમાં અવેરનેસ આવે તે માટે પોલીસ દ્વારા તેમને સમજાવવામાં આવશે.