મોટર વ્હીકલ એક્ટ મુજબ હવે ટ્રાફિકનાં નવા કાયદાઓ લાગુ થયા બાદ હવે સમગ્ર રાજ્યમાં પણ તેનો આજથી જ અમલ શરૂ થઇ ગયો છે. ત્યારે રાજ્યમાં પ્રથમ વખત સૌથી વધુ રકમનો મેમો અપાયો હોવાની ઘટના સામે આવી છે. સુરત પોલીસે એક આઈસર ચાલકને રૂપિયા પાંચ હજારનો દંડ ફટકાર્યો છે.
ફિટનેશ સર્ટિફિકેટ ન હોવાથી ટ્રાફિક પોલીસે ફટકાર્યો દંડ
ટ્રાફિક નિયમોનો ભંગ કરનારાઓ થઇ જજો સાવધાન
વાહનચાલકે સહેજ પણ માથાકૂટ વગર ઘટનાસ્થળે જ ભરી દીધો દંડ
ફિટનેશ સર્ટિફિકેટ (Fitness Certificate) ન હોવાને કારણે ટ્રાફિક પોલીસે એક આઇસર ચાલકને દંડ ફટકાર્યો હોવાની ઘટના તાજેતરમાં જ સામે આવી છે. આજથી ટ્રાફિક પોલીસનાં નવા કાયદા લાગુ થયા છે. નવા કાયદા મુજબ રાજ્યમાં સૌથી વધુ રકમનો મેમો સુરતમાં આઈસર ચાલકને અપાયો છે.
મોટર વ્હીકલ એક્ટ (Motor Vehicle Act) નાં કાયદાનો હવે કડક અમલ થવાને લીધે વાહનચાલકોએ છેલ્લાં બે-ત્રણ દિવસથી તમામ પ્રકારની તૈયારીઓ કરી દીધી હતી. ઠેર-ઠેર PUC સેન્ટરો અને HSRP નંબર પ્લેટ લગાવવા માટે લોકોની લાંબી લાઇનો લાગી ગઇ છે. જો કે આ નિયમ વિરૂદ્ધ જેઓ જરૂરી દસ્તાવેજો સાથે રાખવામાં ઊણા ઉતર્યા છે તેવાં લોકોની હાલત વધારે કફોડી બની છે.
ઘટનાસ્થળે જ ભરી દીધો દંડ
રિંગરોડ પર આવેલાં આરકેટી માર્કેટમાંથી કાપડનો જથ્થો ભરીને એક આઈસર-ટ્રક (GJ 05 UU 7886)નાં ચાલક ગોવિંદભાઈ સુરેશભાઈ પટેલ કે જેઓ ડિલિવરી માટે ગ્લોબલમાં માર્કેટમાં જઈ રહ્યાં હતાં. તેવામાં બ્રીજ ઉતરતાની સાથે જ સહારા દરવાજા ખાતે તેઓને ટ્રાફિક પોલીસ દ્વારા રોકવામાં આવ્યાં. ત્યારે ગોવિંદભાઈ પાસેથી લાયસન્સથી લઈને અન્ય બધાં જ ડોક્યુમેન્ટ્સ બરાબર નીકળ્યાં પરંતુ પરંતુ આઈસર ટ્રકનું ફિટનેસ સર્ટી ન હોવાનાં કારણે તેમને પાંચ હજારનો દંડ ફટકારવામાં આવ્યો હતો. પરંતુ મહત્વની વાત તો એ છે કે આ ઘટના સમયે આઈસર ચાલકે પોલીસવાળા સાથે સહેજ પણ માથાકૂટ વગર ત્યાંને ત્યાં જ ઘટનાસ્થળે જ આ દંડની રકમ ભરી દીધી હતી.
સુરતમાં દંડની ઓપનિંગ થતાની સાથે જ તે આઇસર ચાલકનાં દંડની રસીદ સોશિયલ મીડિયામાં વાઈરલ થવા લાગી છે. આ સાથે ટ્રાફિકના નવા નિયમો અને દંડની વધુ જોગવાઈનાં સમર્થન તેમજ વિરોધમાં લોકો અવનવી કોમેન્ટો કરી રહ્યાં છે.
હવેથી જરૂરી સર્ટી સાથે જ રાખીશઃ ગોવિંદભાઇ
આ અંગે નિવેદન આપતા ગોવિંદભાઈ પટેલે જણાવ્યું કે, 'આ નવા નિયમોમાં હવે વધારે રૂપિયા આપવા પડે છે. જેનાં લીધે જો ખીસ્સામાં રૂપિયા ન હોય તેવા સંજોગોમાં ખૂબ મુશ્કેલી પડી શકે છે. પહેલાં જ દિવસે દંડની ભારે રકમ ભરવી પડી હોવાને કારણે હવેથી જરૂરી સર્ટી કઢાવીને તે પોતાની સાથે રાખીશ.'