અમદાવાદ / ટ્રાફિક ઘટાડવા અને યોગ્ય પાર્કિંગ માટે AMCની આ યોજના સાવ ફ્લોપ, કોઈ તૈયાર જ નથી

• હવે આ જગ્યા રેવન્યૂ શેરિંગ બેઝથી પાર્કિંગ માટે ફાળવવામાં આવશે
• ઇન્કમટેકસ ફલાય ઓવરબ્રિજ માટે પણ કોઈ તૈયાર ન થતાં આશ્ચર્ય
• ઓવરબ્રિજ નીચેની જગ્યા માટે કોઈ સંસ્થા આગળ ના આવી

તાજેતરમાં શહેરના ભાજપના શાસકોએ મલ્ટી લેવલ પાર્કિંગ, સ્ટ્રીટ પાર્કિંગ તેમજ પાર્કિંગ પ્લોટ અને બ્રીજના નીચેના પાર્કિંગની ૪૦ ટકા જગ્યા ખાનગી સંસ્થા કે કંપની માટે રિઝર્વ રાખનારી પાર્કિંગ પરમીટ પોલીસીને મંજૂરી આપી ભારે વિવાદ વહોરી લીધો છે.

કોર્પોરેશન દ્વારા પ્રજાના પરસેવાની કમાણીના રૂ.૮૦૦ કરોડ માંથી આઠ મલ્ટીલેવલ પાર્કિંગ આગામી એક બે વર્ષમાં ધમધમતા થઇ જશે. જે પૈકી સિંધુ ભવન રોડ, પ્રહલાદનગર રોડ, ચાંદલોડિયા અને દાણાપીઠ ફાયર સ્ટેશન ખાતે ચાર મલ્ટીલેવલ પાર્કિંગ બનાવવાની કામગીરી ચાલી રહી છે. પરંતુ શાસકોની નવી પાર્કિંગ પરમીટ હેઠળ પ્રજાને પાર્કિંગમાં વાહનો મુકવા માટે માત્ર ૪૦ ટકા જગ્યા મળશે. 

અત્યારે કરોડોના ખર્ચે ડેવલપમેન્ટ હેઠળના સીજી રોડના સ્ટ્રીટ પાર્કિંગ મામલે પણ વિવાદ ઊઠ્યો છે. આ જગ્યા હવે આસપાસના દુકાનોવાળા બુક કરાવી લેશે તો મુલાકાતીઓ માટે સીજી રોડમાં પાર્કિંગ મુસીબતરૂપ બનશે તેમ મ્યુનિ. વર્તુળોમાં ચર્ચાઇ રહ્યું છે. જોકે પાર્કિંગ પરમીટ પોલીસીમાં કેટલીક સ્પષ્ટતા ન હોઇ તેને અંગે પણ વિવાદ ઊઠ્યો છે. બીજી તરફ બે ‌મહિના પહેલાં કુલ ૧૯ ઓવરબ્રિજ નીચેની ૪૦ ટકા જગ્યા માટે સત્તાધીશોએ પાર્કિંગ પરમીટ પોલીસી અપનાવી હતી. જોકે ઓવરબ્રિજ નીચેની જગ્યામાં પાર્કિંગ પરમીટ પોલીસીનો ફલોપ શો થયો છે. 

ફલાઇ ઓવરબ્રિજ કે રેલવે ઓવરબ્રિજ જેવા વિભિન્ન બ્રિજ નીચેની જગ્યામાં પે એન્ડ પાર્ક માટે આકર્ષક ઓફર ન આવતા સત્તાવાળાઓએ પાર્કિંગની સગવડ પૂરી પાડવા રેવન્યુ શેરિંગ બેઝનો નવો અભિગમ અપનાવ્યો છે. જે હેઠળ ઓફર કરનાર કોન્ટ્રાકટર તંત્રને ઓછામાં ઓછી રપ ટકા અપસેટ ટકાવારી કે તેની વધુ ટકાવારીની ઓફર આપી શકશે.

જાણકાર સૂત્રો કહે છે, કેટલાક બ્રિજમાં તંત્રને ૧૦૦ ટકા રેવન્યુ શેરિંગની ઓફર અપાઇ છે. જોકે આ પ્રકારની ઓફર શંકાસ્પદ હોઇ તેને ફગાવી દેવાશે. પરંતુ આશ્ચર્યજનક રીતે પાર્કિંગ પરમીટ પોલીસી હેઠળની ૪૦ ટકા જગ્યા લેવા કોઇ સંસ્થા કે કેન્દ્રીય સંસ્થા કે કોર્પોરેટ કંપની આગળ આવી નથી.

ખાસ કરીને ઇન્કમટેકસ ઓવરબ્રિજ નીચેની પાર્કિંગની જગ્યા મેળવવા આસપાસની કોઇ કેન્દ્રીય સંસ્થા કે ખાનગી બેન્ક કે કોર્પોરેટ કંપની પોતાના સ્ટાફના વાહન પાર્કિંગ માટે પરમીટ મેળવવા આગળ આવશે તેવી ચર્ચા જોરશોરથી હતી. પરંતુ ઇન્કમટેકસ ઓવરબ્રિજ જેવા શહેરના મહત્વપૂર્ણ વિસ્તાર અને આશ્રમરોડ જેવા વ્યસ્ત રાજમાર્ગ પરના ઓવરબ્રિજમાં પણ પાર્કિંગ પરમીટ પોલીસી સદંતર નિષ્ફળ નીવડતા સત્તાવાળા પણ અચરજમાં મુકાયા છે. 

ક્યા બ્રિજને પાર્કિંગ પર‌િમટ હેઠળ આવરી લેવાયા હતા
સોલા રેલવે ઓવરબ્રિજ, ગોતા રેલવે ઓવરબ્રિજ, હેલ્મેટ ઓવરબ્રિજ, ડૉ.આંબેડકરબ્રિજ, રાણીપ રેલવે ઓવરબ્રિજ, ઇન્કમટેકસ ફલાય ઓવરબ્રિજ, એઇસી ઓવરબ્રિજ, ઠક્કરબાપાનગરબ્રિજ, બાપુનગર ફલાય ઓવરબ્રિજ, સીટીએમબ્રિજ, ઇસનપુરબ્રિજ, ગુરુજીબ્રિજ, સોનીની ચાલી ચાર રસ્તા, હાટકેશ્વર બ્રિજ, સીટીએમબ્રિજ, જશોદાનગરબ્રિજ, શિવરંજની ઓવરબ્રિજ.