છત્તીસગઢ પોલીસે રાજ્યમાં કાળઝાળ ગરમીમાં કામ કરતી ટ્રાફિક પોલીસ અને અન્ય કર્મચારીઓને સ્વદેશી રીતે તૈયાર કરવામાં આવેલ એરકન્ડિશન્ડ (એસી) હેલ્મેટ આપવાનો નિર્ણય કર્યો છે.
છત્તીસગઢના ડાયરેકટર જનરલ ઓફ પોલીસ (ડીજીપી) ડી.એમ.અવસ્થીએ આ અંગે જાહેરાત કરી છે. તેમણે જણાવ્યું હતું કે અમે એક પાઇલટ પ્રોજેકટ હેઠળ એસી હેલ્મેટનો પ્રયોગ કરીશું. એસી હેલ્મેટ ૧૦,૦૦૦ જેટલા પોલીસ કર્મીઓને ભીષણ ગરમીમાં રાહત આપશે.
જો આ પ્રયોગ સફળ રહેશે તો પાછળથી સરકારના તમામ ફિલ્ડ કર્મારીઓને પણ અેસી હેલ્મેટ આપવાનું વિચારાશે. ડીજીપી અવસ્થીએ વધુમાં જણાવ્યું હતું કે ખાસ કરીને ટ્રાફિક અને સુરક્ષા ડયૂટીમાં તહેનાત કર્મચારીઓને એસી હેલ્મેટ આપવામાં આવશે. આ હેલ્મેટની કેવી અસર થાય છે તે ચકાસવા માટે ડીજીપી અવસ્થીએ સ્વયં હેલ્મેટ પહેરી હતી.
અત્રે ઉલ્લેખનીય છે કે એસી હેલ્મેટ બેટરી અને ચિપથી કામ કરે છે. આ હેલ્મેટને આકરા તડકા અને ગરમીમાં કામ કરતા લોકો માટે ખાસ તૈયાર કરવામાં આવી છે. આ હેલ્મેટને મોબાઇલની જેમ ચાર્જ કરીને તેનો ઉપયોગ કરી શકાય છે.
હેલ્મેટ ચાર્જ કર્યા બાદ ચારથી છ કલાક કામ આપે છે. ઠંડી માટે તેમાં એક ચિપ લાગેલી હોય છે જેનાથી હેલ્મેટની અંદર કૂલિંગ સિસ્ટમ કામ કરે છે અને ચિપની લાઇફ ૧૧ વર્ષની હોય છે. જ્યારે બેટરી અઢી વર્ષ ચાલે છે.