વેપાર / અમેરિકા-ચીન ટ્રેડ વોર રૂપિયા પર હાવીઃ ૭૦ની સપાટી વટાવશે

અમેરિકા અને ચીન વચ્ચે ટ્રેડ વોરને લઇને હવે એશિયન દેશોની કરન્સી ખાસ કરીને રૂપિયા પર દબાણ વધી ગયું છે. અમેરિકા અને ચીન વચ્ચે વાટાઘાટ નિષ્ફળ જવાનો ડર કરન્સી માર્કેટ પર હાવી થઇ ગયો છે. ચીનની કરન્સી યુઆન નબળી પડી રહી છે અને નિષ્ણાતોનું કહેવું છે કે રૂપિયો પણ આગામી સપ્તાહે ડોલરની તુલનાએ ૭૦ની સપાટીને વટાવી જશે.

અમેરિકાના રાષ્ટ્રપ્રમુખ ડોનાલ્ડ ટ્રમ્પે ચીનના સામાન પર ડ્યૂટી ૧૦ ટકાથી વધારીને ૨૫ ટકા કરી દીધી છે અને તેની સૌથી પહેલી અસર એશિયન કરન્સી ખાસ કરીને રૂપિયા પર પડશે. ડીબીએસ ગ્રૂપ રિસર્ચના ફોરેક્સ સ્ટ્રેટેજિસ્ટ ફિલિપ વી.ના જણાવ્યા પ્રમાણે ચીન અને અમેરિકા વચ્ચે હવે કોઇ સુલેહ થવાના અણસાર નથી, કારણ કે ટ્રમ્પને આ બાબતે અમેરિકાના લોકો અને કોંગ્રેસનું સમર્થન મળી રહ્યું છે. ટ્રેડ વોર ઉગ્ર થવાને પગલે ભારતીય ફોરેન કરન્સી બજારમાં ઉતાર-ચઢાવ જારી છે. બુધવારે ડોલર સામે રૂપિયો ૩૦ પૈસા તૂટીને ૬૯.૭૧ પર બંધ રહ્યો હતો. આજે પણ રૂપિયો વધુ ૧૭ પૈસા તૂટીને ૬૯.૮૮ની સપાટીએ ખૂલ્યો છે. આમ, હવે રૂપિયો ઝડપથી ૭૦ની સપાટી વટાવવા તરફ આગળ વધી રહ્યો છે.

એસબીઆઇ ગ્રૂપના ચિપ ઇકોનોમિક એડ્વાઇઝર સૌમ્ય કાંતિ ઘોષે જણાવ્યું છે કે યુઆન સસ્તો થવાથી ચીનનો સામાન વિદેશી બજારમાં વધુ સસ્તો થઇ જશે અને તેને કારણે ભારતમાં એક્સપોર્ટ બજાર નબળું પડી જશે અને તેના ફળ સ્વરૂપે ભારતમાં ટ્રેડ ડેફિસિટ અને કરન્ટ એકાઉન્ટ ડેફિસિટ વધી શકે છે, જેનાથી રૂપિયા પર દબાણ વધશે. છેલ્લા બે દિવસમાં ડોલરની તુલનાએ યુઆન ૬.૬૯થી નબળો પડીને ૬.૭૮ સુધી પહોંચી ગયો છે. તેનાથી ડોલર વધુ મજબૂત થયો છે અને ભારતીય કરન્સી માર્કેટમાં ગભરાટ વધ્યો છે.