અરેરાટી / ગાંધીનગર રેલ્વે સ્ટેશનના પાર્કિંગમાં ટ્રેક્ટર ચાલકે 5 માસની સૂતેલી બાળકીને કચડી, ઘટનાસ્થળે જ મોત

• ગાંધીનગરમાં 5 માસની બાળકી પર ટ્રેકટર ફરી વળતાં મોત
• ગાંધીનગર રેલ્વે સ્ટેશનના પાર્કિંગમાં બની ઘટના
• બાળકીને સુવડાવી માતા-પિતા કરી રહ્યા હતા કામ 

ગાંધીનગર ખાતે 5 મહિનાની બાળકી પર ટ્રેકટર ફરી વળતાં મોત નિપજ્યું છે. ગાંધીનગર રેલ્વે સ્ટેશનના પાર્કિંગમાં સમગ્ર ઘટના સર્જાઈ છે. રેલવે સ્ટેશનના પાર્કિંગમાં બાળકીને સુવડાવી માતા-પિતા કામ કરી રહ્યા હતા. માટીના પુરાણનું કામ ચાલતું હતું ત્યાં જ પાસે બાળકીને સુવડાવી હતી.  આ દરમિયાન જ સમગ્ર ઘટના બની હતી. અકસ્માત સર્જનાર ટ્રેક્ટર ચાલક ફરાર થઈ ગયો છે. જેને લઈ સેક્ટર 7 પોલીસ દ્વારા હાથ કાર્યવાહી હાથ ધરાઈ છે. 

મહત્વનું છે કે, ગાંધીનગર ખાતે મહાત્મા મંદિર પાસે પંચ તારક લીલા હોટલનું કામ ચાલી રહ્યું છે. આ હોટલના પ્લોટમાં 5 મહિનાની દિકરીને સુવડાવી માતા-પિતા કામ કરી રહ્યા હતા. અને આ સમયે લોડિંગ ટ્રેકટર ચાલકની બેદરકારીના કારણે એક માસૂમ બાળકે પોતાનો જીવ ગુમાવવો પડ્યો છે. કાનમાં ઈરફોન લગાવી ટ્રેકટર ચલાવનારા ચાલકે બાળકી પર ટ્રેકટર ફેરવી દેતા ઘટનાસ્થળે જ મોત નીપજ્યું છે. 

બાળકીના માતા-પિતા ગાંધીનગર સાંઈ બાબા મંદિર નજીક છાપરામાં રહેતા પોતાના ભાઈની સાથે માટીનું કામ કરે છે. આ દંપતીને સંતાનમાં 5 મહિનાની એક દિકરી હતી. જેનું સુંદર એવું પ્રિયાંશી હતું. આ બાળકીના માતા પિતા હાલમાં મહાત્મા મંદિર નજીક બની રહેલી લીલા હોટલના ગાર્ડન અને પ્લોટમાં કામ કરી રહ્યા હતા. કામકાજ દરમિયાન દિકરીને પણ સાથે રાખતા હતા. સામાન્ય રીતે આ પ્રકારના કામમાં લોકોની અવર-જવર હોતી નથી. જેને લઈ માતા પિતા પણ પોતાના કામમાં લાગી ગયા હતા. અને સમયાંતરે માતા પોતાના બાળકને જોવા પણ આવતા હોય છે.  

કેવી રીતે સર્જાઈ સમગ્ર ઘટના

પ્લોટમાં ટ્રેક્ટર લઈને આવનારા ચાલકે કાનમાં ઈયરફોન લગાવ્યા હતા. અને જે સ્થળ પર બાળકી સૂતી હતી. ત્યાં ટ્રેકટર લઈને ચાલક પહોંચ્યો હતો. પોતાની બાળકી પાસે ટ્રેકટર આવતું જોઈને માતા-પિતાએ ચાલકને બૂમો પાડીને રોકવાની કોશિશ કરી હતી. પણ કાનમાં ઈયરફોન લગાવ્યા હોવાથી તે સાંભળ્યો નહોતો. અને ચાલકે બાળકીના માથાના ભાગે ટ્રેકટર ફેરવી દીધું હતું. લોહીના ખાબોચિયા ભરાઈ તેમ બાળકીની હાલત થઈ જતાં માતા-પિતા જોઈને રડી રહ્યા હતા.