ટૉક્સિક શૉક સિન્ડ્રોમ એક એવી બીમારી છે જે શરીર માટે અતિશય હાનિકારક છે અને મોટાભાગે મહિલાઓમાં જોવા મળે છે.
મહિલાઓ માટે જીવલેણ બીમારી
ટેમ્પોનના કારણે થઇ શકે છે આ બીમારી
માસિક સ્ત્રાવ દરમિયાન બીમારીની સંભાવના વધુ
શું છે આ ટોક્સિક શૉક સિન્ડ્રોમ?
ટોક્સિક શૉક સિન્ડ્રોમ એક જીવલેણ બીમારી છે. સ્ટેફિલોકોક્સ ઓરિયસ કે સ્ટેફ નામના બેક્ટેરીયાનું પ્રમાણ જ્યારે શરીરમાં વધી જાય છે ત્યારે આ બીમારી થાય છે. ટોક્સિક શૉક સિન્ડ્રોમમાં બ્લડ પ્રેશર ઝડપથી ઘટી જાય છે. આ કારણે શરીરમાં પૂરતાં પ્રમાણમાં ઓક્સિજન પહોંચી નથી શકતું, જેના કારણે મૃત્યુ થવાની સંભાવના વધી જાય છે. અમેરિકાની 24 વર્ષીય મૉડલ લૉરેન વાસેરને 2012માં આ બીમારી થઇ હતી. લૉરેનના શરીરમાં આ ઝેરી પદાર્થનું પ્રમાણ એટલું વધ્યું કે તે પોતાનો પગ પણ ઉપાડી શકતી નહોતી. અંતે તેને પોતાનો એક પગ કપાવવો પડ્યો.
કોને થઇ શકે છે આ બીમારી ?
સ્ટેફ બેક્ટેરીયા મહિલાઓના શરીરમાં જ જોવા મળે છે. ટૉક્સિક શૉક સિન્ડ્રોમ મોટાભાગે માસિક સ્ત્રાવના સમયે મહિલાઓને વધુ પ્રભાવિત કરે છે, ખાસ કરીને તે મહિલાઓ કે જે ટેમ્પોનનો ઉપયોગ કરે છે.
સ્ટેફ એક એવો બેક્ટેરીયા છે કે જે મહિલાઓની યોનીમાં (VEGINA) હાજર હોય છે પરંતુ તે મોટાભાગે કોઇ નુકસાન પહોંચાડતો નથી. ટેમ્પોનનાં લીધે બેક્ટેરીયાને શરીરમાં ફેલાવાનો મોકો મળી શકે છે અને ત્યારબાદ આ બેક્ટેરીયા ઝેર બની ધીમે-ધીમે લોહીમાં ભળી જાય છે.ટૉક્સિક શૉક સિન્ડ્રોમને મેનસ્ટ્રુઅલ સ્પોન્જ, ડાયાફ્રામ અને સર્વાઇકલ કેપની સાથે પણ જોડવામાં આવ્યું છે. બાળક જન્મ્યાના તુરંત બાદ મહિલાઓમાં ટૉક્સિક શૉકની સંભાવના ઘણી વધી જાય છે. આ એ પુરુષો અને સ્ત્રીઓને પણ થઇ શકે છે કે જે સર્જરી, દાઝેલા ભાગમાં, ખુલ્લા ઘામાં કે પછી નકલી ઉપકરણોના ઉપયોગ દરમિયાન સ્ટેફ બેક્ટેરીયાનાં સંપર્કમાં આવ્યા હોય.
ટૉક્સિક શૉકનાં લક્ષણો
અચાનક તાવ આવવો
બ્લડ પ્રેશર ઘટી જવું
ડાયરિયા
હથેળી અને તળિયામાં ચાઠા
ચક્કર જેવી સ્થિતિ
માંસપેશિયોમાં દુ:ખાવો
લાલ આંખો-મોઢું
માથામાં દુ:ખાવો
ટેમ્પોનનો ઉપયોગ દરમિયાન જો ઉલ્ટી કે તાવ આવે તો તાત્કાલીક ડોક્ટરનો સંપર્ક કરવો જોઇએ.
આ બીમારીનો ઇલાજ
સામાન્ય રીતે એન્ટીબાયોટીક્સ દ્વારા ઉપચાર કરી શકાય છે. આ સિવાય બ્લડ પ્રેશરને નિયંત્રણમાં રાખવા અને શરીરમાં પાણીનું પ્રમાણ વધારવા માટેની દવાઓ પણ ડોક્ટરની સલાહ બાદ લઇ શકાય છે. આ બીમારીનો ઇલાજ શરીરમાં આ સિન્ડ્રોમ કયા સ્ટેજ પર છે તેના પર નિર્ભર કરે છે. તેથી જ ટૉક્સિક શૉક સિનેડ્રોમના શરૂઆતી લક્ષણો પર ધ્યાન દેવાની આવશ્યકતા છે.