બાળકોને સ્વસ્થ રાખવા માટે માતા-પિતા શું નથી કરતા. બાળકોના સ્વાસ્થ્યને લઇને નાનામાં નાની વસ્તુઓનું ધ્યાન રાખે છે, પરંતુ એક રિસર્ચમાં હેરાન કરી દેનારી વાત સામે આવી છે. જે બોટલ દ્વારા તમે તમારા બાળકોને દૂધ પિવડાવો છો, તે બોટલમાં ખતરનાક કેમિકલ જોવા મળ્યું છે. બાળકોની દૂધની બોટલ અને સિપરમાં ઝેરી કેમિકલ બિસફેનોલ-એ જોવા મળ્યું છે.
ટોક્સિક લિંકે પોતાની એક સ્ટડીમાં દાવો કર્યો છે કે, દિલ્હી સહિત દેશના અલગ-અલગ રાજ્યોમાં વેચાતી દૂધની બોટલ અને સીપર બાળકો માટે સુરક્ષિત નથી. ટોક્સિક લિંકે બીજી વખત આ સ્ટડી જાહેર કરી છે.
આ પહેલા 2014માં પણ આ પ્રકારની સ્ટડી કરવામાં આવી હતી. જેમાં બ્યૂરો ઓફ ઇન્ડિયન સ્ટાન્ડર્ડનો ખુલ્લેઆમ ભંગ કરવામાં આવી રહ્યો હતો. હાલના રિસર્ચમાં અલગ-અલગ રાજ્યોમાંથી દુધની બોટલ અને સિપરના 20 સેમ્પલ લેવામાં આવ્યા જેમાંથી 14 બોટલ અને 6 સિપર સામેલ હતા.
આ સેમ્પલ દિલ્હી સહિત ગુજરાત, રાજસ્થાન, કેરળ, આંધ્ર પ્રદેશ, ઝારખંડ, મહારાષ્ટ્ર , મણિપુરથી લેવાયા. જેની તપાસ ઇન્ડિયન ઇન્સ્ટીટ્યૂટ ઓફ ટેક્નોલોજીમાં કરાઇ. જેમાં સામે આવ્યું કે, દૂધની બોટલ અને સિપરમાં ઉપયોગ કરાયેલો ખતરનાક કેમિકલ બિસફેનોલ-એ બાળકોના પેટમાં જઇ રહ્યું છે.