દેશમાં અને ગુજરાતમાં અચાનક વાતાવરણમાં પલ્ટો જોવા મળ્યો છે. કમોસમી વરસાદે 8 રાજ્યમાં કેર વર્તાવ્યો છે. 8 રાજ્યોમાં કુલ 35 લોકોના મોત અન્ 40થી વધુને ઇજા થઇ છે. ગુજરાતના વિવિધ શહેરોમાં ગાજવીજ સાથે વરસાદ પણ જોવા મળ્યો હતો. તો અનેક જગ્યાએ કમોસમી વરસાદની સાથે કરા પણ પડ્યા હતા. તો કેટલીક જગ્યાએ વૃક્ષો ધરાશાયી થયા છે તો કેટલીક જગ્યાએ વીજળી પડી હતી જેને લઇને દુર્ઘટનાઓ પણ સર્જાઇ છે.
દેશભરમાં ગતરોજ બદલાયેલા મોસમના કારણે ભારે નુકસાન થયું છે. જેમાં સૌથી વધુ નુકસાન 8 રાજ્યોને થયું. ગુજરાત, મહારાષ્ટ્ર, મધ્યપ્રદેશ, રાજસ્થાન, ઝારખંડ, હરિયાણા અને નવી દિલ્હીમાં વરસાદ, વાવાઝોડું અને વીજળી પડતા 35 લોકોના મોત થયા છે.
જ્યારે 40 લોકો ઇજાગ્રસ્ત થયા છે. ત્યારે હવામાન વિભાગે કહ્યું કે, આજે અને ગુરુવારે પણ આ પ્રકારનું વાતાવરણ રહેશે. હવામાન વિભાગ મુજબ પાકિસ્તાનથી આવેલા પશ્ચિમી વિક્ષોભ અને છેલ્લા 3થી 4 દિવસોથી ચાલી રહેલા હીટવેવને લઇ દેશના પશ્ચિમ-ઉત્તર ભાગ, મધ્ય ક્ષેત્ર અને વિદર્ભ અને પ.બંગાળમાં ભારે વાવાઝોડું સાથે વરસાદ પડ્યો હતો.
ત્યારે રાજ્યના 33 જિલ્લામાંથી 18 જિલ્લામાં ભારે વરસાદ પડ્યો. જેમાં પાટણ, રાજકોટ, અરવલ્લી, બનાસકાંઠા, મહેસાણા, અમદાવાદ, ગાંધીનગર, સુરેન્દ્રનગર, મોરબીમાં વરસાદ પડ્યો જેમાં 11 લોકોના મોત નિપજ્યા છે...જ્યારે રાજસ્થાનમાં પણ 11 અને મધ્યપ્રદેશમાં 10 લોકોના મોત નિપજ્યા છે. તો પંજાબમાં 2, હરિયાણા, ઝારખંડ, મહારાષ્ટ્ર, ઉત્તરપ્રદેશ અને હિમાચલમાં એક-એકના મોત થયા છે.