ઉપાય ખરો? / 'ઢોર પાર્ટી કામ જ નથી કરતી' : તંત્રના પાપે લોકો બન્યા ભોગ, અમદાવાદીઓના AMC પર ભડક્યા

• અમદાવાદ સહીત રાજ્યભરમાં રખડતા ઢોરનો આંતક 
• શહેરમાં રખડતા ઢોર નિયંત્રણના દાવાઓ પોકળ 
• અમદાવાદના દરેક રસ્તાઓ પર ગાયોનો અડિંગો

રાજ્યભરમાં રખડતા ઢોરના ત્રાસથી લોકો પરેશાન થઈ ગયા છે. કહેવાતા એવા સ્માર્ટસિટી અમદાવાદમાં પણ રખડતા ઢોરની મોટી સમસ્યાથી વાહન ચાલકોને અકસ્માતનો ભય સતાવી રહ્યો છે. અમદાવાદમાં જ્યાં જૂઓ ત્યાં રોડ પર પશુઓએ અડિંગો જમાવ્યો છે. રાયપુર વિસ્તારમાં રખડતા ઢોરના ત્રાસને લઈ સ્થાનિકોમાં રોષ ફેલાયો છે. સ્થાનિકોનું કહેવું છે AMCની ઢોર પાર્ટી કામ જ નથી કરતી. 

કેમ કાર્યવાહી કરવામાં પાંગળું સાબિત થઈ રહ્યું છે તંત્ર
અમદાવાદ મહાનગરપાલિકાના શહેરમાં રખડતા ઢોર પર નિયંત્રણના દાવાઓ પોકળ સાબિત થયા છે. ડ્રાઈવ-ઈન રોડ પર ઢોર રસ્તા વચ્ચે બેસેલા જોવા મળી રહ્યા છે.. અમદાવાદના બાપુનગરમાં પણ જાહેર માર્ગો પર ગાયો તેમજ આખલાઓએ અડિંગો જમાવ્યો છે. જેને લઈ લોકોમાં ભારે રોષ તેમજ વાહનચાલકોમાં અકસ્માતનો ભય સતાવી રહ્યો છે. ગઈકાલે પૂર્વ નાયબ મુખ્યમંત્રીને મહેસાણાના કડીમાં ઢોર અડફેટે લીધા હોવાની ઘટના સામે આવી હતી. તો વળી પોરબંદરમાં પણ તિરંગા યાત્રા દરમિયાન મુખ્યમંત્રીને પણ રખડતા ઢોરનો સામનો કરવો પડ્યો હતો. તેમ છતાં નઘરોળ તંત્ર ઢોર નિયંત્રણના ફક્ત મોટા મોટા દાવાઓ કરે છે પણ વાસ્તવિક્તા તો કંઈક અલગ જ છે. ત્યારે સ્માર્ટ સિટી અમદાવાદના રસ્તાઓ ક્યારે ઢોરમુક્ત બને છે તે તો હવે જોવાનું રહ્યું.

અમદાવાદમાં ચાલુ મહિને માત્ર 195 ઢોર પકડી સંતોષ મનાયો
સ્માર્ટ સીટી અમદાવાદના  રોડ રસ્તા રખડતાં ઢોરની ઓળખ બની ગયા છે. જ્યા જુઓ ત્યાં રોડ પર ઢોર રખડતાં જોવા મળી રહ્યા છે  જેના કારણે નાગરિકોને પરેશાનીનો પાર નથી.અમદાવાદમાં દરરોજ આ કારણે નિર્દોષ લોકો અકસ્માતને ભેટે ચડે છે. રાયપુરમાં રખડતા ઢોર નો આતંક એટલો છે કે તંત્ર પણ અહીં આંખ આડા કાન કરી રહ્યું છે. પશુપાલકો ઢોર છુટા મુક્કી દે છે પરંતુ ઢોર પાર્ટી ઢોર જ પકડવા નથી આવતું જેના કારણે સ્થાનિકો પણ ત્રાહિમામ પોકારી ચુક્યા છે. ઢોર પાર્ટી વિભાગ દ્વારા ચાલુ મહિને માત્ર 195 ઢોર જ પકડવામાં આવ્યા છે.