તમારા કામનું / સ્કૂલથી માંડીને કોલેજ સુધીના ભણતર માટે પૈસાની તંગી નહીં નડે, ઉઠાવો સરકારની 5 સ્કોલરશીપનો લાભ

• સ્કૂલ-કોલેજમાં ભણવા માટે સરકાર તરફથી સ્કોલરશીપ
• વિવિધ વિભાગમાં ભણવા સરકાર આપશે આટલી સહાય

જો તમારામાં પુરતી યોગ્યતા છે, અને આગળ ભણવા માંગો છો પરંતુ આર્થિક સંકડામણ તમને આગળ વધતા રોકી રહી છે, તો ચિંતા કરવાની જરૂર નથી. ભારત સરકારની સ્કોલરશિપ યોજનાઓ તમને તમારા સપના પૂરા કરવામાં મદદ કરશે. આ લેખમાં અમે દેશની ટોપ 5 સરકારી સ્કોલરશિપ વિશે જણાવી રહ્યા છીએ, જે કેન્દ્ર સરકાર આપે છે. શાળાથી કોલેજ અને યુનિવર્સિટી સુધી, તમે વિવિધ સ્તરે આ શિષ્યવૃત્તિ યોજનાઓનો લાભ લઈ શકો છો.

Prime Minister’s Research Fellowship (PMRF)
આ સ્કીમને પીએમ રિસર્ચ ફેલોશિપ તરીકે ઓળખવામાં આવે છે. જો તમે વિજ્ઞાન, ટેક્નોલોજીના ક્ષેત્રમાં પીએચડી કરવા માંગો છો, તો PMRF તમને મદદ કરશે. આ ફેલોશિપ શિક્ષણ મંત્રાલય દ્વારા આપવામાં આવે છે. તેનો ઉદ્દેશ્ય ટેકનિકલ રિસર્ચને પ્રોત્સાહન આપવાનો છે. આ યોજના ઇન્ડિયન ઇન્સ્ટિટ્યૂટ ઓફ સાયન્સ  (IISc), IISER, IITs, NITs જેવી દેશની ટોચની ઇજનેરી સંસ્થાઓ અને કેન્દ્રીય યુનિવર્સિટીઓમાં ડોક્ટરલ પ્રોગ્રામ્સમાં પણ પ્રવેશ પ્રદાન કરે છે. 80 હજાર સુધીની આર્થિક સહાય દર મહિને આપવામાં આવે છે. આ સિવાય 5 વર્ષ માટે વાર્ષિક 2 લાખ રૂપિયાની રિસર્ચ ગ્રાન્ટ મળે છે. અરજી માટે જરૂરી દસ્તાવેજો સહિતની સંપૂર્ણ વિગતો માટે pmrf.in મુલાકાત લો.

National Means-cum-Merit Scholarship (NMMSS)
ગરીબ પરિવારોના બાળકોને માધ્યમિક શિક્ષણમાં પ્રોત્સાહિત કરવા માટે સરકાર દર વર્ષે 1 લાખ વિદ્યાર્થીઓને નેશનલ મીન્સ-કમ-મેરિટ સ્કોલરશિપ આપે છે. આ અંતર્ગત દરેક વિદ્યાર્થીને વાર્ષિક 12 હજાર રૂપિયા આપવામાં આવે છે. જે વિદ્યાર્થીઓના માતા-પિતાની આવક વાર્ષિક 3.50 લાખ રૂપિયા કે તેથી ઓછી છે તેઓ આ સ્કોલરશિપનો લાભ લઈ શકે છે. તમારે આ માટે પસંદગી માટે પરીક્ષા આપવી પડશે. તેના માટે 7માં ધોરણમાં ઓછામાં ઓછા 55 ટકા ગુણ હોવા જોઈએ. જોકે એસસી, એસટી વિદ્યાર્થીઓ માટે 5 ટકાની છૂટ છે. અરજી પ્રક્રિયા અને તારીખ સંબંધિત માહિતી માટે, સત્તાવાર વેબસાઇટ scholarships.gov.in મુલાકાત લો.

Central Sector Scheme of Scholarship
આ સ્કોલરશિપ સ્કીમ 12મું પાસ વિદ્યાર્થીઓ માટે છે. કોલેજો, યુનિવર્સિટીઓમાં અભ્યાસ માટે સેન્ટ્રલ સેક્ટર સ્કીમ ઓફ સ્કોલરશીપ આપવામાં આવે છે. ઉદ્દેશ આર્થિક રીતે નબળા પરંતુ હોશિયાર વિદ્યાર્થીઓને ઉચ્ચ શિક્ષણ માટે આર્થિક સહાય પૂરી પાડવાનો છે. અરજી માટે 12માંની બોર્ડની પરીક્ષામાં 80 ટકા ગુણ ફરજિયાત છે. આ ઉપરાંત  AICTE, UGC, MCI, DCI કે અન્ય કોઇ માન્યતા પ્રાપ્ત સંસ્થામાં પ્રવેશ લેવાનો રહેશે. જે વિદ્યાર્થીઓ કેન્દ્ર કે રાજ્ય સરકાર દ્વારા આપવામાં આવતી અન્ય શિષ્યવૃત્તિનો લાભ પહેલેથી જ લઈ રહ્યા છે તેઓ તેના માટે અરજી કરી શકશે નહીં. આ અંગે વધુ માહિતી માટે નેશનલ સ્કોલરશિપ પોર્ટલ scholarships.gov.in મુલાકાત લો.

INSPIRE Scholarship
તેનું ફૂલ ફોર્મ 'ઇનોવેશન ઓફ સાયન્સ પર્સ્યુટ ફોર ઇન્સ્પાયર રિસર્ચ' છે. તેનો ઉદ્દેશ વિજ્ઞાનની રચનાત્મક શોધ માટે દેશની યુવા વસ્તીને આગળ લાવવાનો છે. પ્રારંભિક તબક્કામાં, તે વિજ્ઞાનના અભ્યાસ માટે પ્રતિભાને આકર્ષિત કરવા અને વિજ્ઞાન અને તકનીકી સંશોધન અને વિકાસને મજબૂત બનાવવાનું છે. સાયન્સ એન્ડ ટેકનોલોજી વિભાગની આ યોજના હેઠળ 10થી 15 વર્ષની વયજૂથના 10,000 વિદ્યાર્થીઓને સ્કોલરશિપ હેઠળ દર વર્ષે 80,000 રૂપિયા આપવામાં આવે છે. વધુ માહિતી માટે dst.gov.in/innovation-science-pursuit-inspired-research-programme મુલાકાત લો.

JC Bose Scholarship
જેસી બોઝ સ્કોલરશિપ ડીએસટી દ્વારા પોતાના ક્ષેત્રમાં સક્રિય યોગદાન આપનારા વૈજ્ઞાનિકો અને એન્જિનિયરોને આપવામાં આવે છે. રિસર્ચ વર્ક માટે ઉમેદવારોને 5 વર્ષ સુધી દર મહિને 25 હજાર રૂપિયા આપવામાં આવે છે. સંશોધન કાર્યને જોતાં, તેનો સમયગાળો આગળ વધારી શકાય છે. આ ઉપરાંત દર વર્ષે વધારાની ગ્રાન્ટ પણ આપવામાં આવે છે. વધુ માહિતી માટે jbnsts.ac.in મુલાકાત લો.