હવામાન વિભાગ / આવતી કાલે દક્ષિણનાં ત્રણ રાજ્યમાં ભારે વરસાદની આગાહીઃ ઉત્તર ભારતમાં હિમવર્ષા

• ઉત્તર ભારતમાં કાતિલ ઠંડીનું મોજુ ફરી વળશે
• ગુજરાતમાં વાતાવરણ વાદળછાયું રહેશે

આગામી બે દિવસમાં દક્ષિણનાં ત્રણ રાજ્ય-આંધ્રપ્રદેશ, તામિલનાડુ અને કેરળમાં ભારે વરસાદની આગાહી કરવામાં આવી છે, જોકે તેલંગાણા અને કર્ણાટકના કેટલાક ભાગમાં હવામાન સ્વચ્છ રહેશે, પરંતુ આ ત્રણેય રાજ્યમાં વરસાદી આફત આવી શકે છે.
 

ચેન્નઇમાં ર૧ નવેમ્બરે ભારે વરસાદ પડી શકે છે. ફરી એક વાર નવા વેસ્ટર્ન ડિસ્ટર્બન્સની સ્થિતિનું નિર્માણ થયું છે, તેના કારણે પહાડી વિસ્તારોમાં વરસાદ સાથે હિમવર્ષા થઇ શકે છે. દિલ્હી, પંજાબ, હરિયાણા અને પશ્ચિમ ઉત્તર પ્રદેશમાં કાતિલ ઠંડીનું મોજું ફેલાઇ શકે છે. અહીં બર્ફીલા પવનો ફૂંકાવાનું શરૂ થઇ ગયું છે.
 

હવામાન નિષ્ણાતોના જણાવ્યા પ્રમાણે રાજસ્થાન, મધ્યપ્રદેશ અને ગુજરાતમાં હાલ વાદળછાયું વાતાવરણ રહેશે. અહીં મધ્યમ ઊંચાઇએ વાદળોના કારણે દિવસના તાપમાનમાં ઘટાડો થઇ શકે છે. ઉત્તર ભારતમાં ર૦ નવેમ્બર આસપાસ વેસ્ટર્ન ડિસ્ટર્બન્સનું નિર્માણ થઇ શકે છે.

પંજાબમાં રપ નવેમ્બરે વરસાદ પડવાની સંભાવના છે. રાજ્યમાં અમૃતસર, તરણતારણ, ફરીદકોટ, ગુરદાસપુર, ફિરોઝપુર અને ફ‌િઝલ્કામાં વરસાદ થશે. ર૬ અને ર૭ નવેમ્બરે હળવાથી મધ્યમ વરસાદની આગાહી છે. ભારતીય હવામાન વિભાગે જણાવ્યું છે કે ર૧ નવેમ્બર સુધી દિલ્હીમાં હવાનું સ્તર સારું રહેશે, જે પ્રદૂષણ રોકવામાં મદદરૂપ સાબિત થશે.