સમસ્યા / ખેડૂતો MSPની ગેરંટી આ કારણથી માંગી રહ્યાં છે, અહી ટામેટાંના ભાવ જુઓ કેટલા પૈસાના થઈ ગયા

• આંધ્રપ્રદેશના ખેડૂતો મોટી મુશ્કેલીમાં ફસાયા 
• માત્ર 30 પૈસા પ્રતિ કિલોની કિંમતમાં ખેડૂતો પાસેથી લેવાઈ રહ્યા છે ટામેટાં 
• હોલસેલમાં 30 પૈસામાં ખેડૂતો પાસેથી ખરીદી માર્કેટમાં 30 રૂ. પ્રતિ કિલો વેચાઈ રહ્યા છે ટામેટાં 

ટામેટાંના નથી મળતા ભાવ 

ખેડૂતો પોતાના જે અધિકારોની માંગણી કરી રહ્યા છે ત્યારે આંધ્રપ્રદેશના ખેડૂતો માટે એક ખરાબ સમાચાર સામે આવી રહ્યા છે.  અહિયાં ખેડૂતોએ માત્ર 30 પૈસાના કિલો ભાવે ટામેટાં આપવા પડી રહ્યા છે. બે દિવસથી ટામેટાંની કિંમત ઘટીને 30 પૈસા પ્રતિકિલો પર આવી ગઈ છે. આ સમાચાર જેણે પણ વાંચ્યા તે ચોંકી ગયું કે માત્ર 30 પૈસાના કિલોમાં ખેડૂતોએ પોતાના ટામેટાં વેચવા પડી રહ્યા છે.  

ખેડૂતોએ આ મુદ્દે પ્રદર્શન પણ કર્યું

આંધ્રપ્રદેશમાં ટામેટાંનો મબલખ પાક લેવાયો અને બમ્પર પેદાશો થઈ, હવે આ જ કારણથી ખેડૂતોને તકલીફોનો સામનો કરવો પડી રહ્યો છે કારણ કે ટામેટાંની કિંમતો તળિયે આવી ગઈ છે. આંધ્રપ્રદેશના રાયલસીમામાં ટામેટાંની હોલસેલ કિંમતો ઘટીને 30થી 70 પૈસા પ્રતિ કિલો પર પહોંચી ગઈ છે. ખેડૂતોને પારવાર સમસ્યાનો સામનો કરવો પડી રહ્યો છે અને ઘણા બધા ખેડૂતોએ આ મુદ્દે પ્રદર્શન પણ કર્યું છે.  બજારના લોકો કહી રહ્યા છે કે અચાનક જ 150 ટન ટામેટાં આવી ગયા જેના કારણે કિમંતો ઘટી ગઈ છે. 

ટ્રાન્સપોર્ટેશનનો ખર્ચો પણ કાઢવો મુશ્કેલ 

નોંધનીય છે કે રાયલસીમા વિસ્તાર પહેલેથી જ ટામેટાં માટે પ્રખ્યાત છે અને ગુરુવારે અહિયાં ખેડૂતો જ્યાં પોતાના ટામેટાં વેચવા આવે ત્યાં જ તેની કિંમત 30 પૈસા પર પહોંચી ગઈ. ખેડૂતો કહી રહ્યા છે કે જેટલા રૂપિયા અહિયાં મળી રહ્યા છે એટલામાં તો ટ્રાન્સપોર્ટેશનનો ખર્ચો પણ ન નીકળે. 

નોંધનીય છે કે ખેડૂતો જો આ રીતે 30 પૈસામાં પોતાના ટામેટાં વેચે તો આ હાલતમાં પરિવારનો ખર્ચ કાઢવો મુશ્કેલ પડી શકે છે. આટલું જ નહીં આરોપ છે કે ખેડૂતો પાસેથી જે ટામેટાં 30 પૈસાના ભાવ પર લેવામાં આવે છે તે માર્કેટમાં 30 રૂપિયામાં વેચાઈ રહ્યા છે.