ગુજરાતમાં છેલ્લા 24 કલાકમાં 88 તાલુકામાં વરસાદ વરસ્યો
ગુજરાતમાં છેલ્લાં કેટલાંક દિવસથી વરસાદનું જોર થોડું ધીમું પડ્યું છે. પરંતુ હજુ ચોમાસું ગયું નથી. ત્યારે હવામાન વિભાગની આગાહી અનુસાર, આજે અમદાવાદના કેટલાંક વિસ્તારોમાં ધીમી ધારે વરસાદ વરસ્યો હતો. હવામાન વિભાગે આગામી બે દિવસ સુધી સામાન્યથી મધ્યમ વરસાદની આગાહી કરી છે.
હવામાનની આગાહી અનુસાર, આજે અમદાવાદમાં રિવરફ્રન્ટ, પ્રહલાદનગર, SG રોડ, આંબલી, બોપલ, ઘુમા, સોલા, ઘાટલોડિયા અને ગોતા, ઈસ્કોન અને બોડકદેવ સહિતના પશ્ચિમ વિસ્તારમાં ધીમીધારે વરસાદ વરસ્યો છે.
જુઓ આજે કયા-કયા વિસ્તારોમાં મેઘરાજા ખાબકશે?
મહત્વનું છે કે, હવામાન વિભાગે આજ રોજ રાજ્યના કેટલાંક જિલ્લામાં વરસાદ વરસવાની આગાહી કરી છે. જેમાં દીવ, દમણ અને દાદરાનગર હવેલીમાં વરસાદની આગાહી કરી છે. તો બીજી બાજુ મધ્ય ગુજરાતમાં આજે અમદાવાદ, વડોદરા, ગાંધીનગર અને છોટાઉદેપુર અને આણંદમાં વરસાદ વરસશે તેવી આગાહી કરી છે. જ્યારે દક્ષિણ ગુજરાતમાં નર્મદા, સુરત, તાપી, દાહોદ, ડાંગ અને નવસારી સહિતના વિસ્તારોમાં વરસાદ વરસશે તેવી આગાહી વ્યક્ત કરી છે.
તો બીજી બાજુ સૌરાષ્ટ્રમાં પણ આજે પોરબંદર, દ્વારકા, મોરબી, રાજકોટ, ભાવનગર, ગીર સોમનાથમાં વરસાદ વરસશે. જ્યારે ઉત્તર ગુજરાતમાં બનાસકાંઠા, સાબરકાંઠા, પાટણ, મહેસાણા, કચ્છ સહિતના વિસ્તારોમાં હવામાન વિભાગની આગાહી અનુસાર, વરસાદ વરસી શકે છે.
રાજ્યમાં છેલ્લા 24 કલાકમાં 88 તાલુકામાં વરસાદ વરસ્યો
નોંધનીય છે કે, રાજ્યમાં છેલ્લા 24 કલાકમાં 88 તાલુકામાં વરસાદ વરસ્યો છે. જેમાં સૌથી વધુ અમરેલીના વડિયામાં સવા 2 ઈંચ વરસાદ થયો છે, જ્યારે ધનસુરા અને બગસરામાં 2-2 ઈંચ વરસાદ થયો છે. ઉપરાંત નેત્રંગ, દેહગામ અને ઉચ્છલમાં પોણા 2 ઈંચ તથા ડેડિયાપાડામાં સવા એક ઈંચ થયો છે. સાથે વ્યારા અને કલોલમાં 1-1 ઈંચ તથા ખેડબ્રહ્મામાં અને જગડિયામાં પોણો ઈંચ વરસાદ થયો છે.