શિક્ષકોના પડતર પ્રશ્નોનું નિરાકરણ નહીં આવતા ગુજરાત રાજ્ય પ્રાથમિક શિક્ષક સંઘ દ્વારા આંદોલનની ચીમકી ઉચ્ચારવામાં આવી છે. જેમાં આવતીકાલે પ્રાથમિક શિક્ષકો માસ CL પર જવાના છે અને આશરે 10 હજારથી વધુ શિક્ષકો ગાંધીનગર જશે ત્યાં તેઓ વિધાનસભાનો ઘેરાવો કરવાના છે.
જેને લઈને શિક્ષકો ગાંધીનગર ન પહોંચે તે માટે પોલીસ સક્રિય થઈ ગઈ છે. ત્યારે પોલીસ ધમકી આપતી હોવાનો સંઘના હોદ્દેદારોએ આક્ષેપ કર્યો હતો. તેમજ આંદોલનને તોડી પાડવા સરકાર પોલીસનો સહારો લઈ રહી હોવાનો પણ આક્ષેપ કરાયો હતો.
મહત્વનું છે કે ગુજરાત રાજ્ય પ્રાથમિક શિક્ષક સંઘ 1997થી ફિક્સ પગારના શિક્ષકોને સંળગ ગણવાની માગ સાથે આવતી કાલે ગુજરાતના સવા બે લાખ શિક્ષકો માસ CL ઉપર જશે. આ પહેલા પણ સરકારે શિક્ષકોની નોકરી સળંગ ગણવા કહ્યું હતું પરંતુ હજી કંઇ જ થયું નથી. જેના પગલે માસ સીએલનો નિર્ણય કરવામા આવ્યો છે.