આજે રાજ્યસભાની ચૂંટણી યોજાઇ છે ત્યારે કોંગ્રેસના ધારાસભ્ય અલ્પેશ ઠાકોરે ક્રોસ વોટિંગ કર્યું હોવાના અહેવાલો પ્રાપ્ત થયાં છે. આ સાથે જ ધવલસિંહ ઝાલાએ કોંગ્રેસની વિરૂદ્ધમાં મત આપ્યો છે. કોંગ્રેસના બંન્ને ધારાસભ્યોના ક્રોસ વોટિંગ પડતા રાજકારણમાં ગરમાવો ફેલાઇ જવા પામ્યો હતો.
ઉલ્લેખનીય છે કે, કોંગ્રેસના અલ્પેશ ઠાકોર તથા ધવલસિંહે ભાજપને મત આપ્યો હોવાની પૃષ્ઠી કોંગ્રેસના ઓબ્ઝરવર બ્રિઝેશ મેરજાએ કરી હતી. આપને જણાવી દઇએ કે, બ્રિજેશ મેરજા મોરબીના ધારાસભ્ય છે.અલ્પેશ ઠોકોરે મીડિયા સાથે વાતચીત કરતા કહ્યું હતું કે, મેં મતદાન કરી દીધું છે અને રિઝલ્ટ આવશે ત્યારે હકીકત સામે આવી જશે.
અલ્પેશ ઠાકોર અને ધવલસિંહ ઝાલાનું રાજીનામું
રાજ્યસભાની ચૂંટણીને લઈને મહત્વના સમાચાર સામે આવ્યા છે. સુત્રો દ્વારા માહિતી મળી રહી છે કે, કોંગ્રેસના 2 ધારાસભ્યોએ રાજીનામુ આપ્યું છે. અલ્પેશ ઠાકોર અને ધવલસિંહ ઝાલાએ રાજ્યસભાની ચૂંટણીમાં ક્રોસ વોટિંગ કર્યા બાદ પોતાનું રાજીનામું વિધાનસભાના અધ્યક્ષને ધરી દીધું હતું.
— VTV Gujarati News and Beyond (@VtvGujarati) July 5, 2019
ભાજપ પાસે 100 અને કોંગ્રેસ પાસે 71 ધારાસભ્યો
ભાજપમાંથી પહેલી બેઠક માટે વિદેશ મંત્રી એસ. જયશંકર અને બીજી બેઠક માટે જુગલ ઠાકોરને ઉમેદવાર તરીકે ચૂંટણી લડી રહ્યા છે. કોંગ્રેસે તેમની સામે અનુક્રમે ચંદ્રિકા ચુડાસમા અને ગૌરવ પંડયાને ઉતાર્યા છે. વિધાનસભામાં અત્યારે ભાજપ પાસે 100 અને કોંગ્રેસ પાસે 71 ધારાસભ્યો છે.
કોંગ્રેસના રાજ્યસભાના ઉમેદવાર ચંદ્રિકાબેન ચુડાસમાએ જણાવ્યું કે, કોંગ્રેસના તમામ ધારાસભ્યો મતદાન કરશે અને પરિણામ આવ્યા બાદ કોર્ટમાં અમે ન્યાયની માગણી કરીશું. તો ગૌરવ પંડ્યાએ પણ કોંગ્રેસના તમામ ધારાસભ્યો મતદાન કરશે તેવી આશા વ્યક્ત કરી છે.