ગુજરાતના કેટલાંક જિલ્લાઓમાં હવામાન વિભાગની ભારે વરસાદની આગાહી વચ્ચે આજે રાજ્યના 92 તાલુકાઓમાં મેઘરાજાએ ધડબડાટી બોલાવી.
સવારના 6થી 12 વાગ્યા સુધીમાં 92 તાલુકામાં વરસાદ
સૌથી વધુ મહેસાણામાં 3 ઈંચ જેટલો વરસાદ નોંધાયો
ગુજરાતમાં આગામી 24 કલાકમાં ભારે વરસાદની આગાહી
ગુજરાતમાં આજે સવારના 6થી 12 વાગ્યા સુધીમાં 92 તાલુકાઓમાં વરસાદ મન મૂકીને વરસ્યો છે. જેમાં સૌથી વધુ મહેસાણામાં 3 ઈંચ જેટલો વરસાદ નોંધાયો છે. મેઘરાજાએ આજે અનેક વિસ્તારોમાં ધડબડાટી બોલાવતા ક્યાંક મકાનોના છાપરા ઉડી ગયા તો ક્યાંક વૃક્ષો ધરાશાયી થયા છે તો ક્યાંક કોમ્પ્લેક્ષમાં પાણી ભરાઇ જતા વેપારીઓને હાલાકી પડી છે તો ક્યાંક બસ સ્ટેન્ડમાં પણ પાણી ભરાઇ જતા મુસાફરોને ભારે હાલાકી ભોગવવાનો વારો આવ્યો છે.
નોંધનીય છે કે, હવામાન વિભાગે રાજ્યમાં આગામી 24 કલાકમાં ભારે વરસાદની આગાહી કરી છે. ત્યારે હવામાન વિભાગની આગાહી મુજબ, રાજ્યમાં આગામી 24 કલાકમાં કચ્છ, બનાસકાંઠા, પાટણ, સાબરકાંઠા તેમજ અમદાવાદ અને ગાંધીનગરમાં ભારે વરસાદ પડવાની શક્યતા સેવવામાં આવી છે. તો બીજી બાજુ આગામી 24 કલાકમાં રાજ્યમાં મોરબી, સુરેન્દ્રનગર, મહેસાણા, અરવલ્લી, મહીસાગર, દાહોદ અને ખેડામાં પણ સારો એવો વરસાદ પડશે તેવી આગાહી કરવામાં આવી છે.
આજે ગુજરાતના કયા-કયા વિસ્તારોમાં વરસાદ વરસ્યો?
બનાસકાંઠામાં વિશેશ્વર નદી બની ગાંડીતૂર
માઉન્ટ આબુમાં ભારે વરસાદના કારણે બનાસકાંઠામાં વિશેશ્વર નદી ફરી ગાંડીતૂર બની છે. ઉપરવાસમાં ભારે વરસાદના કારણે દાંતીવાડા ડેમ સુધી પાણી પહોંચતા જ પાણીની આવકમાં વધારો થશે. ડેમમાં આવક આવતા જ સપાટી ફુલ થઈ શકે છે. મહત્વનું છે કે, રાજસ્થાનના ઉપરવાસમાં ભારે વરસાદની પગલે આ વખતે બનાસકાંઠા જિલ્લાની જીવા દોરી સમાન દાંતીવાડા ડેમ 73% ભરાઈ ગયો છે. 2017 પછી પાંચ વર્ષ બાદ ડેમ ભરાતા તેને જોવા માટે જિલ્લા ભરમાંથી લોકોના ટોળેટોળા ઉમટી પડ્યા છે. બનાસકાંઠાના દાંતીવાડા ડેમમાં વ્હાઇટ સિગ્નલ અપાયું છે.
મહિસાગરના વિરપુર તાલુકામાં વૃક્ષો ધરાશાયી
મહિસાગર જિલ્લાના વિરપુર તાલુકામાં વરસાદી માહોલ વચ્ચે પવન ફુંકાતા પવનના કારણે રહેણાંક મકાનોના છાપરા ઉડી ગયા છે. સાથે ભારે પવનના કારણે અનેક વિસ્તારોમાં વીજથાંભલા સહિત વૃક્ષો પણ ધરાશાયી થયા છે. આથી વૃક્ષો ધરાશયી થવાના કારણે અનેક વિસ્તારો માર્ગોમાં રાહદારીઓને ભારે હાલાકી પડી રહી છે.
પાટણ જિલ્લામાં વરસાદે બોલાવી ધડબડાટી
બીજી તરફ પાટણ જિલ્લામાં વરસાદે ધડબડાટી બોલાવતા પાટણના નવજીવન ચાર રસ્તા પાસે આવેલ સરદાર કોમ્પ્લેક્ષ પાણીમાં ગરકાવ થઇ ગયો છે. સરદાર કોમ્પ્લેક્ષમાં આવેલ ATM તેમજ દુકાનોમાં પાણી ફરી વળતા વેપારીઓ મુશ્કેલીમાં મુકાયા. હજુ પણ જિલ્લામાં વરસાદ યથાવત જોવા મળી રહ્યો છે. આમ પણ ઉત્તર ગુજરાતમાં ભારે વરસાદની હવામાન વિભાગે આગાહી કરી છે.
મહેસાણા બસ સ્ટેન્ડમાં પણ પાણી ભરાઇ જતા તંત્રની પોલ ઉઘાડી પડી
મહેસાણા જિલ્લામાં પણ વહેલી સવારથી ક્યાંક ધીમીધારે વરસાદ વરસી રહ્યો છે તો ક્યાંક ધોધમાર વરસાદ વરસી રહ્યો છે. જેના કારણે મહેસાણાના માર્ગો પર વરસાદી પાણી ભરાઇ ગયા છે.
મહેસાણા બસ સ્ટેન્ડમાં પણ પાણી ભરાઇ જતા 2 ઈંચ વરસાદમાં જ તંત્રની પોલ ઉઘાડી પડી ગઇ છે.
અમદાવાદમાં પણ આજે અને આવતીકાલે ભારે વરસાદની આગાહી
અરવલ્લી જિલ્લામાં પણ સાર્વત્રિક વરસાદી માહોલ જામ્યો છે. છેલ્લા 24 કલાકમાં ભિલોડા અને મેઘરજમાં દોઢ ઇંચ વરસાદ નોંધાયો છે. જ્યારે મોડાસા અને માલપુરમાં એક ઇંચ વરસાદ નોંધાયો છે. ત્યારે મેઘરજ, ભિલોડા અને ધનસુરા તાલુકામાં સિઝનનો 100 ટકા વરસાદ નોંધાયો છે. બીજી બાજુ અમદાવાદમાં પણ આજે અને આવતીકાલે ભારે વરસાદની આગાહી કરાઇ છે. ત્યારે આજે વહેલી સવારથી જ શહેરમાં પણ ધીમી ધારે વરસાદ પડ્યો હતો.