ભાવુક / આજે મારો મિત્ર અરુણ ચાલ્યો ગયો, અત્યંત દર્દ દબાવીને બેઠો છુંઃ PM મોદી

મારી સાથે ચાલનારો મારો મિત્ર ચાલ્યો ગયો 

પ્રધાનમંત્રી મોદીએ કહ્યું કે, આજ મારી અંદર અત્યંત દર્દ છૂપાયેલું છે. હું આટલો દુર છું અને મારો મિત્ર અરૂણ ચાલ્યો ગયો. પ્રધાનમંત્રી મોદીએ ઓગસ્ટ મહિનાને યાદ કરતા કહ્યું કે, થોડા દિવસ પહેલા બહેન સુષમા ચાલ્યા ગયા, આજે મારી સાથે ચાલનારો મિત્ર ચાલ્યો ગયો.

બહેરીનમાં પ્રધાન મંત્રી મોદીનું ભારતીય સમુદાયના લોકોએ કર્યું સ્વાગત

બહેરીન પહોંચેલા પીએમ મોદીનું ભારતીય સમુદાયના લોકોએ ભવ્ય સ્વાગત કર્યું હતું. વડાપ્રધાન નરેન્દ્ર મોદીએ બહેરીનમાં ભારતીય સમુદાયને સંબોધિત કરતા કહ્યું કે આપનો પ્રેમ મેળવીને અભિભૂત છું. સ્વાગતથી એવું લાગી રહ્યું છે કે હું ભારતમાં જ છું. નરેન્દ્ર મોદીએ આગળ કહ્યું કે પીએમ તરીકે બહેરીન આવવા મળ્યું. ભારતની વિવિધતા તેની શક્તિ છે. 

શનિવારે બપોરે 12 વાગ્યેને 7 મિનિટે દિલ્હી સ્થિત એઇમ્સમાં લીધા અંતિમ શ્વાસ

ભારતનાં પૂર્વ નાણાંમંત્રી અને ભાજપના વરિષ્ઠ નેતા અરૂણ જેટલીનું  66 વર્ષની ઉંમરે અવસાન થયું છે. દિલ્હીની AIIMS ખાતે આજે બપોરે 12.07 વાગ્યે અંતિમ શ્વાસ લીધાં હતા. ઉલ્લેખનીય છે કે છેલ્લાં ઘણાં દિવસથી તબિયત લથડતાં AIIMS હોસ્પિટલ દાખલ કરાયાં હતાં. તેઓનાં આવતી કાલે 2 વાગ્યે નિગમબોધ ઘાટ પર અંતિમ સંસ્કાર કરાશે.

સોફ્ટ ટિશ્યુ કેન્સરથી પીડિત હતાં જેટલી

અરૂણ જેટલીનું કિડની ટ્રાન્સપ્લાન્ટ થયું ત્યાર બાદ જેટલીના ડાબા પગમાં સોફ્ટ ટિશ્યું કેંસર થઇ ગયું હતું જેની સર્જરી માટે તેઓ આ વર્ષે જાન્યુઆરીમાં અમેરિકા પણ ગયા હતા. ચાલુ વર્ષે મે મહિનામાં પણ જેટલીને સારવાર માટે દાખલ કરાયા હતા. 

વ્યવસાયે વકીલ એવા જેટલી મોદી સરકારના એક મહત્ત્વના હિસ્સો છે. મોદીની પ્રથમ સરકારમાં તેઓ નાણા મંત્રી હતા, પરંતુ તબીયત ખરાબ રહેતી હોવાના કારણે તેઓ આ વખતે લોકસભા કે રાજ્યસભાની ચૂંટણી લડયા ન હતા અને મંત્રી મંડળમાં પણ રહ્યા ન હતા.

28 ડિસેમ્બર 1952 માં થયો હતો અરૂણ જેટલીનો જન્મ

અરૂણ જેટલીનો જન્મ 28 ડિસેમ્બર 1952માં થયો હતો. અરૂણ જેટલીએ નાણા મંત્રાલય, કોર્પોરેટ અફેર્સ મંત્રાલય, સરક્ષંણ મંત્રાલય અને માહિતી અને પ્રસારણ મંત્રાલય સંભાળેલ છે. જેટલી રાજ્યસભાના સભ્ય રહ્યા છે. તેઓ ક્યારેય લોકસભાના સભ્ય તરીકે ચૂંટાયા નથી. જેટલી 1991થી ભારતીય જનતા પાર્ટીની રાષ્ટ્રીય કાર્યકારિણીની સદસ્ય હતાં. તેઓ 1999ની લોકસભાની ચૂંટણી પહેલાં ભાજપના પ્રવક્તા બની ગયાં હતાં.