LRD Exam / આજે 2.95 લાખ ઉમેદવારો આપશે LRD પરીક્ષા, વૉશરૂમ-પાણી પીવા પણ બહાર નહીં જઇ શકાય

• 7 જિલ્લાના 954 કેન્દ્રો પર આજે LRDની પરીક્ષા
• 2.95 લાખ ઉમેદવારો આપશે પરીક્ષા આપશે
• 11 વાગ્યા પછી ઉમેદવારોને પરીક્ષા કેન્દ્રમાં પ્રવેશ નહીં મળે

આજે રાજ્યભરમાં LRD પોલીસ ભરતીની પરીક્ષા યોજાશે. ત્યારે રાજ્યમાં અવારનવાર ભરતી પરીક્ષાઓ અને બોર્ડની પરીક્ષા સહિતના પેપરો ફૂટવાની ઘટનાઓને લઇને પરીક્ષામાં કોઇ પણ પ્રકારની ગેરરીતિ ન થાય તે માટે પોલીસનો પૂરતો ચુસ્ત બંદોબસ્ત ગોઠવી દેવાયો છે.

મહત્વનું છે કે, આજે રાજ્યમાં એલઆરડી ભરતીની લેખિત પરીક્ષા યોજાશે જેમાં 2.95 લાખ ઉમેદવારો આપશે પરીક્ષા આપશે. 954 સેન્ટર પર LRDની પરીક્ષા લેવાશે. 10 હજાર 988 જગ્યાઓ માટે આ પરીક્ષા લેવાઇ રહી છે.

11 વાગ્યા પછી પરીક્ષા કેન્દ્રમાં પ્રવેશ નહીં મળે

રાજ્યના 6 મહાનગરોમાં પરીક્ષા યોજાશે. પરીક્ષાનો સમય 12થી 2 રહેશે તો પરીક્ષા કેન્દ્ર દીઠ PI અને PSI ગોઠવી દેવાયા છે. તેમજ પરીક્ષા કેન્દ્રમાં મોબાઈલ સિવાયના ડિજિટલ ઉપકરણો પર સખ્ત પ્રતિબંધ લગાવી દેવાયો છે. વિદ્યાર્થીઓ બાયોમેટ્રિક સિસ્ટમ દ્વારા જ પરીક્ષા કેન્દ્રમાં પ્રવેશ મેળવી શકશે. તેમજ OMR સીટનું 24 કલાકમાં સ્કેનિંગ ઓનલાઈન મુકાશે.
એ સિવાય પરીક્ષામાં ઉમેદવારોએ મોડામાં મોડા 11 વાગ્યા સુધી પહોંચી જવાનું રહેશે. બાદમાં 11 વાગ્યા પછી પરીક્ષા કેન્દ્રમાં પ્રવેશ નહીં મળે.

પરીક્ષામાં કોઇ પણ ઉમેદવારને પેશાબ કરવા કે પાણી પીવા નહીં જવા દેવાય

વધુમાં જણાવી દઇએ કે, વનરક્ષકની પરીક્ષામાં ઉમેદવારે ટોઇલેટમાં જઇને પેપર લીક કર્યું હોવાનો કિસ્સો સામે આવતા એલઆરડીની આ પરીક્ષામાં કોઇ પણ ઉમેદવારને પેશાબ કરવા કે પાણી પીવા માટે પણ ક્લાસરૂમની બહાર નીકળવા નહીં જવા દેવાય. દરેક ક્લાસરૂમમાં પાણીની વ્યવસ્થા કરાશે.

OMR સીટ સીલ કર્યા અંગે ઉમેદવારોની સહી લેવાશે

પરીક્ષામાં ક્લાસરૂમમાં ઉમેદવારોની હાજરીમાં જ OMR સીટના કવરનું સીલ ખોલાશે. આ પદ્ધતિ GPSCમાં છે પરંતુ તમામ ભરતીમાં સૌ પ્રથમ LRD માં એવી પદ્ધતિ દાખલ કરાઇ છે કે પેપર પૂરૂ થયા બાદ ઉમેદવારોને ક્લાસમાં બેસાડી રખાશે અને સુપરવાઇઝર દ્વારા તમામ OMR શીટ ફરી કવરમાં મૂકી તેમની સામે જ સીલ કરાશે. એ માટે બે ઉમેદવારની સહી પણ લેવામાં આવશે.

પ્રિન્સિપાલની ચેમ્બરમાં રહેશે સીસીટીવી કેમેરા

તમામ કેન્દ્રોના ક્લાસરૂમમાં CCTV ની સુવિધા રખાઇ છે પરંતુ જ્યાં પરીક્ષાનું સાહિત્ય આવે અને જ્યાંથી વહેંચણી થાય તે સ્કૂલના પ્રિન્સિપાલની ચેમ્બરમાં પણ CCTV કેમેરા લગાવવામાં આવ્યા છે. પરીક્ષાની કામગીરી સાથે જોડાયેલા DEO થી લઇને સુપરવાઇઝર અને પીઆઇ-પીએસઆઇને પણ ભરતી બોર્ડ દ્વારા તાલીમ અપાઇ છે.