શેર બજાર / માર્કેટ આજે મજામાં! સેન્સેક્સમાં 442નો ઉછાળો, ત્યારે નિફ્ટી 17,600 ને પાર

• સપ્તાહના પ્રથમ ટ્રેડિંગ દિવસે શેરબજારમાં તેજી
• સેન્સેક્સ વધારા સાથે 59,245.98 પર બંધ થયો
• નિફ્ટીમાં 0.72 ટકાનો વધારો જોવા મળ્યો

સપ્તાહના પ્રથમ ટ્રેડિંગ દિવસે શેરબજારમાં તેજી જોવા મળી છે. સોમવારના કારોબાર બાદ સેન્સેક્સ 442.65 અંકોના વધારા સાથે 59,245.98 પર બંધ થયો છે. આ સિવાય નિફ્ટી ઈન્ડેક્સ 126.35 અંક એટલે કે 0.72 ટકાના વધારાની સાથે 17,665.80 ના સ્તર પર બંધ થયા છે. આઇટીસીના શેરમાં આજે પણ ખરીદી જોવા મળી છે.

આજે બજાર રહી લીલામાં
આજે સેન્સેક્સના ટોપ-30માંથી 7 શેર ઘટાડા સાથે બંધ થયા છે. આ સિવાય 23 કંપનીઓના શેરમાં તેજી જોવા મળી રહી છે. આજે સન ફાર્માનો શેર 1.82 ટકાના વધારા સાથે ટોપ ગેઇનર રહ્યો છે. આ સિવાય આઇટીસી, એનટીપીસી, રિલાયન્સ, એચસીએલ ટેક, ટાટા સ્ટીલ, એલટી, આઇસીઆઇસીઆઇ બેન્ક, ભારતી એરટેલ, કોટક બેન્ક, ટેક મહિન્દ્રા, ઇન્ફોસિસ, ડો રેડ્ડીઝ, એક્સિસ બેન્ક, એચડીએફસી બેન્ક, મારુતિ, એસબીઆઇ, એચડીએફસી સહિતની અનેક કંપનીઓના શેર વધારા સાથે બંધ થયા છે.

કયા શેરોમાં વેચવાલી આવી?
ઘટતા શેરોની યાદી પર નજર કરીએ તો નેસ્લે ઇન્ડિયા ટોપ લુઝર રહ્યો છે. નેસ્લેનો શેર 1.62 ટકા નીચે આવ્યો છે. આ સિવાય અલ્ટ્રા કેમિકલ, વિપ્રો, એશિયન પેઇન્ટ્સ, હિન્દુસ્તાન યુનિલિવર, પાવર ગ્રિડ અને બજાજ ફાઇનાન્સના શેરમાં પણ વેચવાલી આવી છે.

સેક્ટરલ ઇન્ડેક્સ કેવો રહ્યો?
સપ્તાહના પહેલા કારોબારી દિવસ બાદ માત્ર તેલ અને ગેસ સેક્ટર લાલ નિશાનમાં બંધ થયા છે. આ ઉપરાંત તમામ સેક્ટરમાં તેજી જોવા મળી છે. આજે નિફ્ટી બેન્ક, નિફ્ટી ઓટો, ફાઇનાન્શિયલ સર્વિસિસ, એફએમસીજી, આઇટી, મીડિયા, મેટલ, ફાર્મા, પીએસયુ બેન્ક, પ્રાઇવેટ બેન્ક, રિયલ્ટી, હેલ્થકેર અને કન્ઝ્યુમર ડ્યુરેબલ્સ સેક્ટરે વેગ પકડ્યો છે.