આજ રોજ રાજ્ય (ગુજરાત)ના અનેક વિસ્તારોમાં મેઘરાજાની ધમાકેદાર એન્ટ્રી થઇ ચૂકી છે. ત્યારે આજે સૌથી વધુ વરસાદ દ.ગુજરાત અને સૌરાષ્ટ્રમાં પડ્યો છે.
રાજ્યમાં સતત 4 દિવસ સુધી વરસાદની આગાહી
રાજ્યના અનેક વિસ્તારોમાં આજે મેઘરાજાની ધમાકેદાર એન્ટ્રી
રાજ્યમાં સૌથી વધારે વરસાદ સૌરાષ્ટ્ર અને દક્ષિણ ગુજરાતમાં
હવામાન વિભાગે ગઇકાલનાં રોજ રાજ્યમાં 5 દિવસ સુધી સતત વરસાદની આગાહી કરી છે. ત્યારે આજ રોજ રાજ્યના અનેક વિસ્તારોમાં વરસાદ મન મૂકીને વરસ્યો છે. જેના લીધે વાતાવરણમાં ઠંડક પ્રસરાતા લોકોને ગરમીથી ભારે રાહત મળી છે. ત્યારે અહીં જોઇશું કે આજ રોજ રાજ્ય (ગુજરાત) ના કયા-કયા વિસ્તારોમાં મેઘો મન મૂકીને વરસ્યો.
અત્રે તમને જણાવી દઇએ કે, આજ રોજ મુંબઈમાં દક્ષિણ-પશ્ચિમ ચોમાસું પહોંચી ગયું છે. આજે દક્ષિણ પશ્ચિમ ચોમાસું 11 મધ્ય અરબી સમુદ્રના બાકીના ભાગો અને કોંકણના મોટાભાગના ભાગો (મુંબઈ સહિત), ગુજરાત રાજ્યના ભાગો, મધ્ય મહારાષ્ટ્રના કેટલાંક ભાગો અને કર્ણાટકના કેટલાંક ભાગોમાં આગળ વધ્યું છે. ત્યારે ગુજરાતમાં આજે જુઓ કઇ-કઇ જગ્યાએ વરસાદ વરસ્યો?
વલસાડના ધરમપુરમાં વરસાદની ધમાકેદાર એન્ટ્રી
વલસાડ જિલ્લાના ધરમપુરમાં વરસાદની ધમાકેદાર એન્ટ્રી થઇ છે. ધરમપુરના અલગ-અલગ વિસ્તારમાં વરસાદ શરૂ થઇ ગયો છે. જેના લીધે લોકોને અસહ્ય બફારાથી ઘણી રાહત મળી છે.
નસવાડીના ગ્રામ્ય વિસ્તારોમાં વરસાદે રમઝટ જમાવી
નસવાડીના દામણીયાઆંબા,ભગીયા વાડ, ઘૂંટીયા આંબા, કડુલી મહુડી ગામડામાં વરસાદી ઝાપટું થયું. જેના લીધે વરસાદના આગમનથી ખેડૂતોમાં ખુશીનો માહોલ જામ્યો છે. સિઝનના પ્રથમ વરસાદની શરૂઆતથી ખેડૂતોમાં ખુશીનો માહોલ છવાઇ ગયો છે.
ગીરગઢડા તાલુકામાં મેઘરાજાની ધમાકેદાર એન્ટ્રી
ગીરગઢડા તાલુકામાં મેઘરાજાએ કરી ધમાકેદાર એન્ટ્રી કરતા ધરતીપુત્રોમાં ખુશી જોવા મળી રહી છે. છેલ્લાં બે દિવસથી અસહ્ય ઉકળાટ અને ગરમી બાદ વાવણીલાયક વરસાદ વરસતા ખેડૂતોમાં ખુશીની લહેર છવાઇ ગઇ છે.
જેતપુર પંથકમાં હવામાનમાં પલટો
જેતપુર પંથકમાં અસહ્ય ઉકળાટ બાદ જેતપુરનાં ગ્રામ્ય વિસ્તારમાં ધીમી ધારે વરસાદ વરસતા લોકોમાં ખુશી જોવા મળી રહી છે. જેતપુર પંથક ગ્રામ્ય વિસ્તારોમાં ધીમી ધારે વરસાદ વરસ્યો. પેઢલા સહિતનાં ગામોમાં વરસાદ વરસતા લોકોને અસહ્ય બફારાથી રાહત મળી છે.
સાવરકુંડલાના ગ્રામ્ય વિસ્તારોમાં સતત ચોથા દિવસે વરસાદ
અમરેલીના સાવરકુંડલા સાથેના ગ્રામ્ય વિસ્તારોમાં સતત ચોથા દિવસે પણ ધોધમાર વરસાદ વરસ્યો છે. સાવરકુંડલા તાલુકાનાં અનેક ગામોમાં વરસાદ વરસ્યો હતો. સાવરકુંડલાના વીજપડી ગામમાં ધોધમાર વરસાદ વરસતાં રોડ-રસ્તા તેમજ શેરીઓમાં પાણી ફરી વળ્યાં હતાં. તો જૂનાગઢમાં પણ ગાજવીજ સાથે વરસાદ વરસ્યો છે.
જૂનાગઢના માળીયા હાટીના તાલુકામાં ધોધમાર વરસાદ
જૂનાગઢ જિલ્લાના માળીયા હાટીના તાલુકામાં ધોધમાર વરસાદ થયો છે. જેના કારણે ખેડૂતોમાં ખુશીનો માહોલ જોવા મળી રહ્યો છે. આ સાથે વરસાદ થવાથી લોકોને અસહ્ય બફારામાંથી પણ છૂટકારો મળ્યો છે. જિલ્લાના અન્ય ગામ્ય વિસ્તારમાં પણ સવારથી જ વરસાદી માહોલ જોવા મળી રહ્યો છે. જેને કારણે ખેડૂતો આકાશ સામે મીટ માંડીને બેઠા છે.
ગીર ગઢડામાં પણ વરસાદ વરસતા પાણી બજારોમાં વહેતા થઇ ગયા
ગીરસોમનાથના ગીર ગઢડામાં પણ વરસાદ શરુ થઇ ગયો છે. ભારે ગરમીના ઉકળાટ બાદ વરસાદ વરસતા પાણી બજારોમાં વહેતા થઇ ગયા છે. વરસાદના કારણે લોકોને ગરમીથી પણ સારી એવી રાહત મળી છે. તો બીજી બાજુ ગીરસોમનાથના વેરાવળ અને કોડીનાર સૂત્રાપાડામાં પણ વરસાદી માહોલ જામ્યો છે. વલસાડમાં પણ વહેલી સવારે વીજળીના કડાકા સાથે ગાજવીજ વરસાદ વરસતા અસહ્ય ઉકળાટ બાદ વાતાવરણમાં એકાએક ઠંડક પ્રસરી ગઇ છે.
દક્ષિણ ગુજરાતમાં પણ વરસાદ વરસ્યો
અમરેલી જિલ્લાની સાથે-સાથે દક્ષિણ ગુજરાતમાં વલસાડ અને નવસારીમાં પણ મન મૂકીને વરસાદ વરસ્યો હતો. વલસાડ જિલ્લાના અનેક પથંકમાં શુક્રવારે મધ્યરાત્રિએ ગાજવીજ સાથે વરસાદ વરસ્યો હતો. જેમાં વલસાડ તાલુકામાં 14 MM અને કપરાડા તાલુકામાં 2 MM વરસાદ વરસ્યો હતો.
ચોમાસાના આગમન પહેલા દીવના દરિયામાં કરંટ
આ સાથે ચોમાસાના આગમન પહેલાં દીવના દરિયામાં કરંટ જોવા મળ્યો હતો. જલંધર બીચ પર કરંટ જોવા મળ્યો. દીવના દરિયામાં પ્રિ-મોન્સૂન એક્ટિવિટી જોવા મળી. 3 મહિના સુધી દીવના દરિયામાં ન્હાવા પર પ્રતિબંધ મૂકવામાં આવ્યો છે.
હવામાન વિભાગે શું કરી આગાહી?
દક્ષિણ ગુજરાત અને સૌરાષ્ટ્રના કેટલાક વિસ્તારોમાં વરસી ગયો વરસાદ, તો આવતીકાલે એટલે કે રવિવારે પણ રાજ્યમાં કેટલાંક વિસ્તારોમાં વરસાદ વરસી શકે છે. જેમાં અમદાવાદ, સુરત, નવસારી, તાપી, ડાંગ, વલસાડ, ભાવનગર, અમરેલીમાં વરસાદની હવામાન વિભાગે આગાહી કરી છે. રવિવારે પણ રાજ્યમાં વરસાદી માહોલ રહેવાની શક્યતા છે. રવિવારે અમદાવાદ, આણંદ, ખેડા, ભરૂચ, વડોદરા, સુરત, ડાંગ, તાપી, નવસારી, વલસાડ, ભાવનગર, અમરેલીમાં વરસાદની આગાહી છે. સોમવારે પણ અમદાવાદ સહિત રાજ્યમાં સૌરાષ્ટ્ર, દક્ષિણ ગુજરાત અને મધ્ય ગુજરાતમાં વરસાદ વરસી શકે છે.