ગુજરાતમાં વિધાનસભા ચૂંટણીની હજુ તો તારીખો નક્કી નથી થઇ, સમયગાળો નક્કી નથી થયો ત્યાં તો રાજ્યમાં તમામ પક્ષોએ વિજય હાંસલ કરવા તડામાર તૈયારીઓ આરંભી દીધી છે.
સોમનાથમાં આજે કોંગ્રેસની રેલી અને સૌરાષ્ટ્ર ઝોનની બેઠક
બેઠકમાં વિધાનસભાની ચૂંટણીલક્ષી રણનીતિ નક્કી કરશે
બેઠકમાં સૌરાષ્ટ્રના કોંગ્રેસના તમામ MLA હાજરી આપશે
ગુજરાતમાં વિધાનસભા ચૂંટણીને લઇને તમામ પક્ષોએ તડામાર તૈયારી શરૂ કરી દીધી છે. ત્યારે આજ રોજ સોમનાથમાં કોંગ્રેસ મહત્વની બેઠક યોજી ચૂંટણીલક્ષી મંથન કરશે. સોમનાથમાં આજે કોંગ્રેસની રેલી અને સૌરાષ્ટ્ર ઝોનની બેઠક યોજાશે. આ બેઠકમાં વિધાનસભાની ચૂંટણીલક્ષી રણનીતિ નક્કી કરાશે. સોમનાથ મહાદેવને ધ્વજારોહણ કર્યા બાદ કોંગ્રેસ દ્વારા રેલી અને બેઠક યોજાશે. પ્રદેશ કોંગ્રેસના નેતાઓ સહિત સૌરાષ્ટ્રના તમામ કોંગ્રેસના MLA હાજરી આપશે.
ગુજરાત કોંગ્રેસના પ્રભારી રઘુ શર્મા સહિતના ટોચના નેતાઓ ઉપસ્થિત રહેશે
ગુજરાતમાં વિધાનસભા ચૂંટણી વર્ષમાં ભાજપ, કોંગ્રેસ સહિતના રાજકીય પક્ષોએ તૈયારી આરંભી દીધી છે. ત્યારે કોંગ્રેસ દ્વારા આજથી બે દિવસ માટે સૌરાષ્ટ્ર ઝોનની મહત્વની બેઠક સોમનાથમાં યોજાવા જઇ રહી છે. જેમાં ગુજરાત કોંગ્રેસના પ્રભારી રઘુ શર્મા સહિતના ટોચના નેતાઓ ઉપસ્થિત રહેશે. બૂથથી માંડીને તાલુકા કક્ષા સુધીના આયોજનો ગોઠવવામાં આવશે તથા નેતાઓને વિવિધ જવાબદારી સોંપવામાં આવશે.
બેઠકમાં સંગઠનોને મજબૂત કરવાની રણનીતિ ઘડવામાં આવશે
પ્રદેશ કોંગ્રેસના સૂત્રોના જણાવ્યાં અનુસાર, સાંજના પાંચ વાગ્યાથી સૌરાષ્ટ્ર ઝોન બેઠક શરૂ કરશે અને આવતીકાલ સુધી ચાલશે. વિધાનસભાની આગામી ચૂંટણીને ધ્યાને રાખી સૌરાષ્ટ્રની રણનીતિ ઘડવામાં આવશે. બે દિવસની બેઠકમાં મુખ્યત્વે ત્રણ મુદ્દાઓ પર નેતાગીરી પરામર્શ કરીને માર્ગદર્શન આપશે તેમજ સંબંધિત નેતાઓને અલગ-અલગ જવાબદારી સોંપવામાં આવશે. પાયાને મજબૂત બનાવવા બૂથ મેનેજમેન્ટ પર પણ ફોકસ કરવામાં આવશે. ઉપરાંત તમામે તમામ તાલુકાસ્તર સુધી સંગઠનોને મજબૂત કરવાની રણનીતિ ઘડવામાં આવશે તથા સંગઠન મુદ્દાઓની ચર્ચા કરવામાં આવશે.
તમને જણાવી દઇએ કે, આ બેઠકમાં પ્રભારી રઘુ શર્મા ઉપરાંત પ્રદેશ પ્રમુખ જગદીશ ઠાકોર, વિપક્ષી નેતા રાઠવા, અર્જુન મોઢવાડીયા સહિત તમામ પ્રદેશ નેતાઓ હાજર રહેશે. સોમનાથના ધારાસભ્ય વિમલ ચુડાસમાની આગેવાનીમાં આવતીકાલે સવારે 9 વાગ્યે વેરાવળ બાયપાસથી કાર-બાઈક રેલી યોજાશે જે સોમનાથદાદાના સાનિધ્યમાં પહોંચશે અને ધ્વજા ચડાવાશે.