લાચારી / મહેસાણામાં પરિસ્થિતિ વણસી : સાંસદ પણ એક ઈંજેક્શન અપાવી ન શક્યા, દર્દીનું મોત

• કોરોનાથી ભયાનક સ્થિતિ
• જુગલજી ઠાકોર દર્દીને ના અપાવી શક્યા ઈંજેકશન
• ઈંજેકશન ના મળતા દર્દીનું મોત

રાજ્યસભાના સાંસદ પણ ના અપાવી શક્યા ઇન્જેક્શન 

ગુજરાતમાં કોરોના વાયરસના કારણે સતત કેસ વધી રહ્યા છે અને દિવસને પરિસ્થિતિ બેકાબૂ થઈ રહી છે. હાલત એ છે કે હોસ્પિટલોમાં જગ્યા નથી અને સ્મશાનોમાં પણ વેઇટિંગ છે ત્યારે દર્દીઓના સગાઓએ હવે ઈંજેક્શન અને દવાઓ માટે હેરાન થવાનો વારો આવી રહ્યો છે. આજે રાજ્યમાં પરિસ્થિતિ એ છે કે કાળાબજારમાં ઘણા લોકો ઈન્જેક્શનો વેચતા ઝડપાઇ રહ્યા છે અને બીજી તરફ સાંસદ પણ લાખ પ્રયાસ કરે છતાં ઈંજેક્શનની સુવિધા કરાવી શકતા નથી. 

જુગલજી ઠાકોર કોરોના દર્દીને ના અપાવી શક્યા ઈંજેકશન

ગુજરાતમાં કેટલાય દિવસથી રેમડેસિવિર ઈંજેક્શનની અછત સર્જાઇ છે અને ઠેર ઠેર દર્દીઓના સગાઓ લાઇન લગાવીને કલાકો સુધી રહે તે બાદ એમને ઈંજેક્શન મળે છે. રાજ્યમાં એક ઈંજેક્શનની સમસ્યા હજુ ઓછી થઈ નથી ત્યાં તો ટોસિલિઝુમેબ માટે પણ ગુજરાતના દર્દીઓ તરસી રહ્યા છે. મહેસાણામાં ટોસિલિઝુમેબ ઈંજેક્શન ન મળતા દર્દીનું મોત થઈ ગયું અને આ દર્દીને જુગલજી ઠાકોર પણ મદદ ન કરી શક્યા. 

અનેક પ્રયાસ છતાં ટોસિલિઝુમેબ ઇન્જેક્શન ના મળ્યું

મહેસાણાના પૂર્વ કૉર્પોરેટરના ભાઈને કોરોના વાયરસ થયો હતો અને દર્દીને બચાવવા માટે  ટોસિલિઝુમેબ ઈંજેકશનની ખૂબ જરૂર હતી. આ ઈંજેક્શન મેળવવા માટે સાંસદ 
જુગલજી ઠાકોરે ખૂબ પ્રયાસ કર્યા પરંતુ લાખ પ્રયાસ છતાં તેઓ પણ મદદ ન કરી શક્યા. સરકાર પણ ટોસિલિઝુમેબ ઈંજેકશન મુદ્દે હાથ અધ્ધર કરે છે. 

ગુજરાતમાં કોરોના કેસ અપડેટ (21મી એપ્રિલ, 2021 અનુસાર)

રાજ્ય સરકાર દ્વારા જાહેર કરવામાં આવેલ આંકડા પ્રમાણે રાજ્યમાં ગત 24 કલાકમાં કોરોનાના 12,553 નવા કેસ નોંધાયા છે તો સંક્રમણના કારણે 125 લોકોના મોત નિપજ્યા છે. આ સાથે જ 4,802 દર્દીઓ સાજા થયાં છે. આ સાથે જ અત્યાર સુધીમાં 3,50,865 દર્દીઓ કોરોના મુક્ત થયાં છે. ઉલ્લેખનીય છે કે, છેલ્લા 24 કલાકમાં રાજ્યમાં 125 લોકોના સારવાર દરમિયાન મોત થયાં છે. આમ ગુજરાતમાં અત્યાર સુધીમાં 5740 લોકોના મોત કોરોનાને કારણે થયાં છે. ગઇકાલ કરતા આજે કોરોનાના કેસમાં ચિંતાજનક ઉછાળો નોંધાયો છે તો સાથોસાથ મૃત્યુનો આંકડો પણ દિવસેને દિવસે વધી રહ્યો છે. રાજ્યમાં હાલ 361 લોકો વેન્ટિલેટર પર છે. એક્ટિવ કેસનો આંકડો 84,126 પર પહોંચ્યો છે.

ઉત્તર ગુજરાતના મહેસાણાએ ચિંતા વધારી 

કોરોનાનો પ્રકોપ દરરોજ વધી રહ્યો છે. ત્યારે ગત 24 કલાકમાં નોંધાયેલા કોરોનાના કેસમાં અમદાવાદ સુરત બાદ મહેસાણા જિલ્લામાં ચિંતાજનક આંકડો નોંધાયો છે. ઉત્તર ગુજરાતના મહેસાણામાં પણ કોરોના કહેર જોવા મળી રહ્યો હોય તેમ લાગી રહ્યું છે. ગત 24 કલાકમાં અહીં 495 નવા કેસ નોંધાયા હતા.