વિશ્વની સૌથી મોટી રસી ઉત્પાદક કંપની સીરમ ઇન્સ્ટિટ્યૂટ ઑફ ઇન્ડિયાના સીઈઓ, આદર પૂનાવાલાએ કહ્યું છે કે 2024 સુધીમાં પણ એટલી રસી તૈયાર તો નહીં જ થાય કે વિશ્વના તમામ લોકોને ડોઝ મળી રહે.
વિશ્વની સૌથી મોટી અને ભારતની ત્રણ કંપનીઓમાંની એક રસી ઉત્પાદન કરતી સીરમે ભારતના તમામ લોકોને રસી પહોંચાડવાની ચિંતા પણ વ્યક્ત કરી છે. ફાઇનાન્શિયલ ટાઇમ્સમાં પ્રકાશિત થયેલા અહેવાલમાં આદર પૂનાવાલા કહે છે કે ફાર્માસ્યુટિકલ કંપનીઓ તેમની ઉત્પાદન ક્ષમતામાં એટલો વધારો કરી શક્યા નથી કે ટૂંક સમયમાં પૂરી દુનિયાને વૅક્સિન આપી શકાય.
ft.comના અહેવાલ મુજબ, અદાર પૂનાવાલાએ કહ્યું- 'પૃથ્વી પરના તમામ લોકોને રસી આપવામાં 4 થી 5 વર્ષનો સમય લાગશે.' તેમણે કહ્યું કે જો કોઈ વ્યક્તિને કોરોના રસીના બે ડોઝની જરૂર હોય તો આખા વિશ્વ માટે 15 અબજ ડોઝની જરૂર પડશે.
ભારતમાં તમામને વૅક્સિન પહોંચાડવા માટે સિસ્ટમ નથી : પૂનાવાલા
આદર પૂનાવાલાએ ભારતમાં 1.4 અબજ લોકોને રસી પહોંચાડવાને લઈને પણ ચિંતા વ્યક્ત કરી હતી કારણ કે અહીં રસીના ટ્રાન્સપોર્ટ માટે કોઈ કોલ્ડ ચેન સિસ્ટમ નથી.
મહત્વનું છે કે વૅક્સિન તૈયાર થયા પછી, તેને ફ્રીઝરમાં રાખવામાં આવે છે અને તેને એક જગ્યાએથી બીજી જગ્યાએ ખસેડવા માટે કોલ્ડ ચેઇન સિસ્ટમની જરૂર પડતી હોય છે.
આદર પૂનાવાલાએ કહ્યું - 'હું હજી સુધી કોઈ એવી નક્કર યોજના જોઈ શકતો નથી જ્યાં 40 કરોડથી વધુ (ભારતના) લોકો રસી મેળવી શકશે. તમે ક્યારેય એવી પરિસ્થિતિ નહીં ઈચ્છો કે તમારી પાસે દેશ માટે વૅક્સિનના ઉત્પાદનની ક્ષમતા હોય પરંતુ તમે તેને કન્ઝ્યૂમ ન કરી શકો.
એક અબજ ડોઝનો લક્ષ્યાંક
પૂણે સ્થિત કંપની સીરમ ઇન્સ્ટિટ્યૂટ ઑફ ઇન્ડિયાએ કોરોના રસીના ઉત્પાદન માટે પાંચ આંતરરાષ્ટ્રીય કંપનીઓ સાથે સમજૂતી કરી છે. તેમાં એસ્ટ્રાઝેનેકા અને નોવાવાક્સ જેવી કંપનીઓ શામેલ છે. સીરમ સંસ્થાએ એક અબજ વૅક્સિનના ડોઝ બનાવવાનું લક્ષ્ય રાખ્યું છે, જેમાંથી અડધી ભારતને આપવામાં આવશે.
રસીનું ઉત્પાદન વધારવા માટે ફંડ ભેગું કરશે
આદર પૂનાવાલાએ ફાઇનાન્સિયલ ટાઇમ્સને એમ પણ કહ્યું હતું કે તેઓ રસીની ઉત્પાદન ક્ષમતા વધારવા માટે સાઉદી અરેબિયાના પબ્લિક ઈન્વેસ્ટમેન્ટ ફંડ (PIF), અબુ ધાબી ઈન્વેસ્ટમેન્ટ હોલ્ડિંગ કંપની ADQ અને યુએસ પ્રાઈવેટ ઇક્વિટી ફર્મ TPG પાસેથી $ 600 મિલિયન એકત્ર કરવા માટે વાતચીત કરી રહ્યા છે. જો કે PIF અને TPGએ આ મામલે પ્રતિક્રિયા આપવાનો ઈન્કાર કર્યો છે.