આદેશ / મોરબી ઝૂલતા પુલ દુર્ઘટનામાં ખોટું ટ્વીટ કરવાનો મામલો, TMC નેતા સાકેત ગોખલે જામીન પર મુક્ત, જાણો કેસ

• ખોટી માહિતીની ટ્વીટ કરવા બદલ  સાકેત ગોખલેની ધરપકડ
• તૃણમૂલ કોંગ્રેસના પ્રવકતા સાકેત ગોખલેની ધરપકડ
• મોરબી કોર્ટે રૂપિયા 15 હજારના જામીન ઉપર મુક્ત કર્યા

મોરબીમાં ઝૂલતા પૂલ દુર્ઘટના બાદ વડાપ્રધાનની મુલાકાત અંગે ખોટી માહિતીની ટ્વીટ કરવા બદલ મોરબી પોલીસે તૃણમૂલ કોંગ્રેસના પ્રવકતા સાકેત ગોખલેની ધરપકડ કરી હતી અને મોરબી કોર્ટમાં રજૂ કરતા નામદાર કોર્ટે રૂપિયા 15 હજારના જામીન ઉપર મુક્ત કરવા આદેશ આપ્યો છે.

લોકપ્રતિનિધિત્વ એકટની 1951 ગુનો
તૃણમૂલ કોંગ્રેસના પ્રવકતા સાકેત ગોખલેએ ઝૂલતા પુલ દુર્ઘટના બાદ વડાપ્રધાનની મોરબી મુલાકાતના ખર્ચ અંગે કરેલી ટ્વીટ બાદ ગઈકાલે મોરબી પ્રાંતઅધિકારી અને ચૂંટણી અધિકારીએ તેમના વિરુદ્ધ લોકપ્રતિનિધિત્વ એકટની 1951 અને 125 મુજબ ગુનો નોંધ્યો હતો અને પોલીસે તાત્કાલિક ટ્રાન્સફર વોરંટથી કબજો મેળવી કાનૂની કાર્યવાહી બાદ આજે મોરબી કોર્ટમાં રજૂ કરાયા હતા. 

કોર્ટે રૂ. 15 હજારના જામીન ઉપર મુક્ત કર્યા
નામદાર મોરબી કોર્ટમાં સાકેત ગોખલેના વકીલે જામીન માટે કરેલી દલીલમાં જણાવ્યું હતું કે જે એકટ મુજબ ફરીયાદ નોધાઈ છે તેમા આરોપીને કઈ લાગતું વળગતું નથી આરોપી અહીં ચૂંટણી લડતા નથી કે તેઓ કોઈના એજન્ટ નથી, ઉપરાંત આરોપી હાર્ટના પેશન્ટ હોય જામીન મુક્ત કરવા માંગ કરી હતી જે બાદ સરકારી વકીલે આરોપી બહારના રાજ્યના હોય જામીન નહિ આપવા દલીલ કરતા બન્ને પક્ષની દલીલ બાદ નામદાર મોરબી કોર્ટે સાકેત ગોખલે ને રૂ.15 હજારના જામીન ઉપર છોડવા હુકમ કર્યો હતો.