ઇ-કોમર્સ વેબસાઇટ પર મળતી આકર્ષક ઓફરોના કારણે ઓનલાઇન ફ્રોડ કરતા ગઠિયાઓ માટે ખરીદી કરનારા ગ્રાહકોને ફસાવવાનું આસાન બની ગયું છે. આસાનીથી લોકો ઓફર્સ કે ઇનામ લાગ્યાની વાત પર ભરોસો મુકી દે છે. આ ગઠિયાઓનું કામ શરુ થાય છે કોઇ ગ્રાહકના ત્યાં વસ્તુની ડિલિવરી થાય તે પછી.
ફ્રોડ કરનાર ઇ-કોમર્સ વેબસાઇટના કર્મચારી તરીકે ફોન કરે છે. તમને ડિલિવર થયેલી પ્રોડકટ અંગે પુછપરછ કરે છે. તે પછી સિફતપુર્વક તમને મોબાઇલ, એલઇડી કે એસીનું ઇમાન લાગ્યું હોવાનું કહે છે અને તે મેળવવા માટેની શરતો પણ કહે છે. ગઠિયાઓ પાસે તમે ખરેલી ખરીદી, મોબાઇલ નંબર અને ઇ-મેલ આઇડી પણ હોય છે. જેથી ગ્રાહકને ખરેખર ઇ-કોમર્સ વેબસાઇટમાંથી જ ફોન આવ્યો હોવાનું લાગે છે.
તે પછી ગ્રાહકને રજિસ્ટ્રેશન પેટે 1500 કે 2000ની રકમ જમા કરવાનું કે પછી 5 કે 6 હજાર સુધીની કોઇપણ વસ્તું ઓનલાઇન ખરીદવાનું કહેવામાં આવે છે. જે ગ્રાહક જાળમાં ફસાય તે મોંધી ગીફટ મેળવવા થોડા રુપિયા ખર્ચવા તૈયાર થઇ જાય છે. તમને એ પણ પુછવામાં આવે છે કે તમે પેમેન્ટ કેવી રીતે કરશો.
જો તમે ક્રેડિટ કે ડેબિટ કાર્ડનો ઓપ્શન આપશો તો તરત જ ના પાડશે અને કહેશે કે આ સ્કીમમાં તમારે માત્ર પેટીએમ કે મોબાઇલ વોલેટથી પેમેન્ટ કરવાનું છે. તે પછી તમને મોબાઇલ નંબર આપવામાં આવે છે. તેના આધારે પેમેન્ટ કરનારને પછી પસ્તાવાનો વારો આવે છે. ઘણીવાર ખુદ ઇ-કોમર્સ વેબસાઇટ આવા ફ્રોડથી બચવા માટે ગ્રાહકોને ચેતવણી આપતી હોય છે જોકે તેમ છતાં ઘણા લોકો ગઠિયાની જાળમાં ફસાય છે.