અમદાવાદ શહેરમાં RTE હેઠળ 30 હજારથી વધુ ફોર્મ ભરાયા, કોરોનાને કારણે RTE હેઠળ ફોર્મ ભરનાર વિદ્યાર્થીઓની સંખ્યામાં વધારો થયો
RTE હેઠળ ફોર્મ ભરવાનો સમય પૂર્ણ
હજારો વિદ્યાર્થીઓના ન ભરાઈ શક્યા ફોર્મ
દસ્તાવેજમાં ભૂલોના કારણે વિદ્યાર્થીઓ રહ્યા વંચિત
RTE હેઠળ પ્રવેશ મેળવવા માટે વાલીઓનો ધસારા વધી ગયો છે. અમદાવાદ શહેરમાં RTE હેઠળ 30 હજારથી વધુ ફોર્મ ભરાયા છે. કોરોનાને કારણે RTE હેઠળ ફોર્મ ભરનાર વિદ્યાર્થીઓની સંખ્યામાં વધારો થયો છે. પરંતુ સોમવાર છેલ્લો દિવસ હોવાથી અનેક વાલીઓ પોતાના બાળકોના કોઈને કોઈ કારણે ફોર્મ ભરી શક્યા નથી. તેવામાં વાલીઓએ ફોર્મ ભરવા માટે વધુ સમયની માગ કરી છે.
રાઈટ ટુ એજ્યુકેશન એક્ટ હેઠળ એડમિશન માટે પડાપડી જોવા મળી રહી છે. કોરોનાની મહામારીને કારણે RTE હેઠળ પ્રવેશ મેળવવા વાલીઓનો ધસારો વધ્યો છે. છેલ્લા બે વર્ષની સરખામણીએ ચાલુ વર્ષે રેકોર્ડબ્રેક ફોર્મ ભરાયા છે. પરંતુ સોમવાર ફોર્મ ભરવા માટે છેલ્લો દિવસ હતો. ત્યારે અમદાવાદ શહેરમાં 12,600 બેઠકો માટે 30 હજારથી વધુ વાલીઓએ પ્રવેશ માટે ફોર્મ ભર્યા છે. 2019-20માં 21,608 ફોર્મ ભરાયા હતા, જ્યારે 2020-21માં 23851 ફોર્મ ભરાયા હતા. જેની સરખામણીએ ચાલુ વર્ષે 30 હજારથી વધુ ફોર્મ ભરાયા છે. ફોર્મ ભરવાની પ્રક્રિયા પૂર્ણ થતાં મંગળવારથી ફોર્મના વેરીફીકેશનની પ્રક્રિયા શરૂ કરવામાં આવશે.
RTE હેઠળ પ્રવેશ માટે ફોર્મ ભરવાના છેલ્લા દિવસે આવકના દાખલા તેમજ અન્ય દસ્તાવેજોના કારણે અનેક વાલીઓ ફોર્મ ભરવાથી વંચિત રહી ગયા છે. ત્યારે વાલીઓ અને ધારાસભ્ય ઇમરાન ખેડાવાલા ફોર્મ ભરવાની તારીખમાં વધારો કરી આપવા માંગ કરી છે. દાવો કરવામાં આવી રહ્યો છે કે શરૂઆતના દિવસોમાં ફોર્મ ભરવાનું સર્વર ડાઉન રહ્યું હતું.