પૂર્વી લદ્દાખમાં ભારતીય અને ચીની સૈનિકો વચ્ચે હિંસક સંઘર્ષના પગલે ટિક ટોક સહિતની ચાઇનીઝ એપ્લિકેશનો પર ભારત સરકારે લગાવેલા પ્રતિબંધ બાદ ચીની વીડિયો શેરિંગ એપ્લિકેશન ટિકટોકના ચીફ એક્ઝિક્યુટિવ ઓફિસર (CEO) કેવિન મેયરે ભારતના કર્મચારીઓને એક પત્ર લખ્યો છે.
કંપનીની વેબસાઇટ પરની એક પોસ્ટમાં લખ્યું છે, 'ટિક ટોકમાં, અમારા પ્રયત્નો ઇન્ટરનેટનું લોકશાહીકરણ કરવાની અમારી પ્રતિબદ્ધતાને દર્શાવે છે. અમારું માનવું છે કે અમે આ પ્રયત્નોમાં ઘણી હદ સુધી સફળ રહ્યા છીએ. અમે અમારા મિશન માટે કટિબદ્ધ અને પ્રતિબદ્ધ છીએ અને અમારા હિસ્સેદારો સાથે મળીને અમે કામ કરી રહ્યા છીએ. ટિક ટોક ભારતીય કાયદા હેઠળની તમામ ડેટા ગોપનીયતા અને સુરક્ષા આવશ્યકતાઓનું પાલન કરવાનું કામ ચાલુ રાખશે અને કંપની હંમેશા વપરાશકર્તાની ગોપનીયતા અને અખંડિતતાને સૌથી વધુ મહત્વ આપશે. કેવિન મેયર ટિક ટોકના ચીફ એક્ઝિક્યુટિવ ઓફિસર અને ByteDanceના ચીફ ઓપરેટિંગ ઓફિસર છે.
અમે અમારાથી બનતા સમાધાનના તમામ પ્રયત્નો કરીશું
મેયરે "ભારતમાં અમારા કર્મચારીઓને સંદેશ" શીર્ષકવાળી પોસ્ટમાં કહ્યું, "2018થી અમે ભારતમાં 200 મિલિયનથી વધુ વપરાશકર્તાઓ આ પ્લેટફોર્મ ઉપર તેમનો આનંદ અને સર્જનાત્મકતા વ્યક્ત કરી શકે તેની ખાતરી કરવા માટે સખત મહેનત કરી છે." ભારતમાં પોતાના કર્મચારીઓની નોકરીની સલામતી અંગે વધતી ચિંતા વચ્ચે CEOએ તેમની પોસ્ટમાં લખ્યું છે કે, "અમારા કર્મચારીઓ અમારી સૌથી મોટી તાકાત છે. તેમની ભલાઈ અમારી અગ્રિમતા છે. અમે પણ 2,000 થી વધુ મજબૂત કર્મચારીઓને ખાતરી આપીએ છીએ કે અમે અમારાથી બનતા સમાધાનના તમામ પ્રયત્નો કરીશું."
મંગળવારથી દેશમાં આ એપ્લિકેશન બંધ થઈ ગઈ છે
વીડિયો શેરિંગ એપ્લિકેશન ટિક ટોક ઉપર ભારત સરકાર દ્વારા લાદવામાં આવેલા પ્રતિબંધ સાથે મંગળવારથી દેશમાં આ એપ્લિકેશન બંધ થઈ ગઈ છે. તેને દેશના ગુગલ પ્લે સ્ટોર અને એપલ એપ સ્ટોર પરથી પણ હટાવી દેવામાં આવી છે. સોમવારે સરકારે ટિકટોક સહિત 59 ચાઈનીઝ એપ્સ પર પ્રતિબંધ મૂક્યો હતો. કેટલાક વપરાશકર્તાઓ અનુસાર તેઓ મંગળવારે કેટલાક સમય સુધી ટિકટોકનો ઉપયોગ કરી શકતા હતા. ટિક ટોકમાં દેશમાં આશરે 200 મિલિયન વપરાશકારો છે.
ભારતના ટિક ટોકના હેડ નિખિલ ગાંધીએ આપ્યું હતું આ નિવેદન
ટિકટોકના ભારતના હેડ નિખિલ ગાંધીએ કહ્યું કે, "ભારત સરકારે ટિકટોક સહિત 59 એપ્સને બૅન કરવાનો વચગાળાનો આદેશ આપ્યો છે, અમે આ હુકમનું પાલન કરવાની તૈયારીમાં છીએ." નિખિલ ગાંધીએ એમ પણ કહ્યું હતું કે અમે વપરાશકર્તાની ગુપ્તતા અને અખંડિતતાને બનાવી રાખીશુ. જો કે, સરકારનો દાવો આથી અલગ છે અને તે ખૂબ ગંભીર છે.