વરસાદ / ગુજરાતમાં ચોથા દિવસે ભર ઉનાળે ચોમાસું, હજુ ચાર દિવસ માવઠાનો માર, આજે આ જિલ્લાઓ ભીંજાયા

• રાજ્યના વિવિધ વિસ્તારોમાં ગાજવીજ સાથે વરસાદ 
• કમોસમી વરસાદથી ખેડૂતો ચિંતિત
• ખેડૂતોનો તૈયાર પાક થયો બરબાદ

રાજ્યભરમાં અત્યારે મિશ્ર ઋતુ જોવા મળી રહી છે, ક્યાંક ઉનાળાની કાળઝાળ ગરમી છે તો વળી ક્યાંક કમોસમી વરસાદ ખાબકી રહ્યો છે. જો કે, બીજી તરફ હવામાન વિભાગે વધુ ચાર દિવસની આગાહી કરી છે. આજે રાજ્યના વિવિધ વિસ્તારોમાં કમોસમી વરસાદ વરસ્યો છે.

જેસરમાં સતત પાંચમા દિવસે કમોસમી વરસાદ 
ભાવનગરના જેસરમાં સતત પાંચમા દિવસે કમોસમી વરસાદ વરસી ગયો છે. બપોર બાદ વાતાવરણમાં બદલાવ આવ્યા બાદ ધોધમાર વરસાદ વરસ્યો છે. ભારે પવન સાથે વરસાદ ખાબકતા ખેતરોમાં પાણી ભરાયા છે. જેસર ઉપરાંત શાંતિનગર,બીલા અને રાણીગાળા તેમજ બેડા,વડલી સહિતના ગામોમાં વરસાદ વરસ્યો છે. સતત વરસી રહેલા કમોસમી વરસાદને કારણે ખેડૂતોને નુકસાન થયું છે.

ડાંગમાં સતત ત્રીજા દિવસે વાતાવરણમાં પલટો
ડાંગ જિલ્લામાં પણ સતત ત્રીજા દિવસે વાતાવરણમાં પલટો આવ્યો છે. વાદળછાયા વાતાવરણ વચ્ચે કમોસમી વરસાદ ખાબક્યો છે, વઘઈ સહિત આસપાસના વિસ્તારમાં ભારે પવન સાથે વરસાદ વરસ્યો છે. સતત માવઠાને લઈ ખેડૂતો ચિંતિત છે.

ઇડરમાં કમોસમી વરસાદ
સાબરકાંઠાના ઇડરમાં સતત બીજા દિવસે વરસાદ વરસ્યો છે.ઇડરના નવા ચોપડ ગામે ધોધમાર વરસાદ વરસ્યો છે.

વાંસદા તાલુકામાં કમોસમી વરસાદ
નવસારીના વાંસદા તાલુકામાં કમોસમી વરસાદ વરસ્યો છે. ભારે પવન અને વરસાદના કારણે માર્ગ પર વૃક્ષ ધરાશાયી થતાં વાંસદા ખાંભલા જતો માર્ગ થોડા સમય માટે બંધ થયો છે. સ્થાનિકોએ વૃક્ષ હટાવતા વાહનવ્યવહાર ફરી શરૂ થયો છે

જામજોધપુર તાલુકામાં કમોસમી વરસાદ 
જામનગરના જામજોધપુર તાલુકામાં કમોસમી વરસાદ પડ્યો છે. બુટાવદર, બાલવા, માંડાસણ સહિતના ગામમાં વરસાદ ખાબક્યો છે. ભારે પવન અને ગાજવીજ સાથે વરસાદ થતાં ગ્રામ્ય વિસ્તારમાં ખેતરોમાં વરસાદી પાણી ભરાયા છે

અમરેલીમાં કમોસમી વરસાદ
અમરેલી જિલ્લામાં બપોર બાદ કમોસમી વરસાદ વરસ્યો છે,રાજુલાના હિંડોરણા,બાબરીયાધાર સહિતના ગામોમાં કમોસમી વરસાદ પડ્યો છે. સતત કમોસમી વરસાદના માહોલને કારણે ખેડૂતોની ચિંતા વધી છે.

દ્વારકાના વિવિધ વિસ્તારોમાં વરસાદ
દ્વારકાના ભાણવડમાં સતત ત્રીજા દિવસે કમોસમી વરસાદ વરસ્યો છે. શિવા,વાનાવડ અને સતાપર સહિતના ગામોમાં વરસાદ વરસ્યો છે. ખેડૂતો સતત વરસતા કમોસમી વરસાદથી ત્રાહિમામ થઇ ગયા છે. તલ,મગ,બાજરી જેવા પાકોને નુકસાન થયું છે.

સુરતના ઉમરપાડામાં વરસાદ
આ તરફ સુરતના ઉમરપાડા વિસ્તારમાં ધોધમાર વરસાદ વરસ્યો છે. કેવડી,ઉમરપાડા અને ગોવટ સહિતના ગ્રામ્ય વિસ્તારોમાં ધોધમાર વરસાદ વરસ્યો છે. સતત કમોસમી વરસાદને કારણે ખેતીને ભારે નુકસાન થયું છે.

ધ્રાંગધ્રામાં કમોસમી વરસાદ
સુરેન્દ્રનગરના ધ્રાંગધ્રામાં કમોસમી વરસાદસ પડ્યો છે, ગ્રામ્ય વિસ્તારોમાં કમોસમી વરસાદથી પાકને નુકસાન થયો છે. નરાળી, કોપેળી, સતપાર સહિતના પંથકમાં વરસાદ પડતા પાકને નુકસાન થવાથી ખેડૂતોની ચિંતામાં વધારો થયો છે.