દુબઇની ચલણી નોટો બતાવીને લોકોને એવી રીતે ભ્રમિત કરે છે કે તેમનાં દિમાગ સુન્ન થઇ જાય છે અને ત્યારબાદ તે પોતાની કળા કરી ગાયબ થઈ જાય છે.
બોપલ, ઘુમા, મણિપુર અને સાણંદમાં ઠગ દંપતીનો આતંક
મણિપુરમાં આવેલા પ્રોવિઝન સ્ટોરના માલિક ‘ભોગ’ બન્યા
સમગ્ર ઘટના સીસીટીવી કેમેરામાં કેદ થતાં પોલીસ પણ એલર્ટ થઇ
અમદાવાદ શહેરના બોપલ, ઘુમા, મણિપુર અને સાણંદ વિસ્તારમાં હાલ એક ઠગ દંપતી ફરી રહ્યું છે. જે દુબઇના રહેવાસી હોવાનું કહીને દુકાનદારો અને વાહનચાલકો પાસેથી રૂપિયા પડાવે છે. આ દંપતી દુબઇની ચલણી નોટો બતાવીને લોકોને એવી રીતે ભ્રમિત કરે છે કે તેમનાં દિમાગ સુન્ન થઇ જાય છે અને ત્યારબાદ તે પોતાની કળા કરી ગાયબ થઈ જાય છે. બોપલથી સાણંદ જવાના રોડ પર છેલ્લા ઘણા દિવસથી આવી રહસ્યમય ઘટના બની રહી છે, જેમાં પોલીસે તપાસ તેજ કરી છે. થોડા દિવસ પહેલાં મણિપુરના એક પ્રોવિઝન સ્ટોરમાં આ દંપતી પોતાની બાળકીને લઇને ઘુસ્યું હતું અને બાદમાં સ્ટોરના વૃદ્ધ માલિકને અર્ધબેભાન કરીને 23 હજાર રૂપિયા લઇને જતું રહ્યું છે. સમગ્ર ઘટના સીસીટીવી કેમેરામાં કેદ થતાં પોલીસ પણ એલર્ટ થઇ ગઇ છે.
પર્સ કાઢી બતાવ્યું હતું
ઘુમા વિસ્તારમાં આવેલા ઋષિકેશ પાર્કમાં રહેતા અને મણિપુરમાં ભોલે નમકીન અને આઇસક્રીમ પાર્લર ધરાવતા અશોકભાઇ બલદેવની સાથે એક વિચિત્ર કિસ્સો બન્યો છે. અશોકભાઇ જ્યારે પોતાના સ્ટોર પર હાજર હતા ત્યારે એક દંપતી તેમની બાળકીને લઇને આવ્યું હતું. દંપતીએ પહેલાં કેટલીક ચીજવસ્તુ ખરીદી હતી અને બાદમાં અશોકભાઇ પાસે આવ્યું હતું. તેમણે અશોકભાઇ પાસે આવીને કહ્યું કે અમે દુબઇથી આવ્યા છીએ અને અમારે થોડી વધારે વસ્તુઓ ખરીદવી છે. અમારી પાસે ડોલર છે જો તમે તે રાખો તો અમે વસ્તુ લઇ શકીએ. યુવકે પોતાની પાસે રહેલું પર્સ કાઢ્યું હતું અને બાદમાં અશોકભાઇને બતાવ્યું હતું.
પર્સમાં 34 હજારથી વધુ રૂપિયા હતા
પર્સ જોતાંની સાથે જ અશોકભાઇ એકદમ સુન્ન થઇ ગયા હતા અને અર્ધબેભાન અવસ્થામાં પહોંચી ગયા હતા. દંપતી અશોકભાઇના પર્સમાંથી 23 હજાર જેટલી રકમ કાઢીને જતું રહ્યું હતું. આ ઘટના મામલે અશોકભાઇના પુત્ર તુષારે જણાવ્યું કે પર્સ જોયા પછી તેમને કાંઇ યાદ હતું જ નહીં. યુવક અશોકભાઇ પાસે બેસીને પર્સમાંથી રૂપિયા કાઢતો હતો ત્યારે તેમની શોપમાં કામ કરતો ઇન્દ્રજિત આવી પહોંચ્યો હતો. ઇન્દ્રજિતને જોઇને દંપતી બાળકને લઇને જતું રહ્યું હતું. અશોકભાઇ તરત જ ભાનમાં આવી ગયા હતા ત્યારે ઇન્દ્રજિતે કહ્યું હતું કે તમારું પર્સ ચેક કરી લો. અશોકભાઇએ ઇન્દ્રજિતને કહ્યું કે ગ્રાહકે મને પર્સ બતાવ્યું હતું તે મારા પર્સને અડ્યો નથી. ઇન્દ્રજિતે જીદ કરતાં અશોકભાઇએ પર્સ ચેક કર્યું હતું તો તેમાંથી રૂપિયા ગાયબ હતા. પર્સમાં 34 હજારથી વધુ રૂપિયા હતા. જે યુવક લેવા જતો હતો પરંતુ ઇન્દ્રજિત આવી જતાં ૨૩ હજાર રૂપિયા જ હાથમાં આવી ગયા હતા.
ગ્રાહક મદદ કરવાની જગ્યાએ ત્યાંથી નીકળી ગયો હતો
પર્સમાં એવું શું હતું કે જેના કારણે અશોકભાઇ સુન્ન થઇ ગયા તે પોલીસ તપાસમાં સામે આવશે. તુષારે આ મામલે બોપલ પોલીસ સ્ટેશનમાં ફરિયાદ કરી છે. જેથી પોલીસે ગુનો દાખલ કર્યો છે. અશોકભાઇ સાથે બનેલી આ ઘટના વાયુવેગે મણિપુર તેમજ બોપલ, ઘુમામાં ફેલાતાં એક પછી એક આ દંપતીનાં કારનામાં સામે આવી રહ્યાં છે જ્યારે બીજી બાજુ ફફડાટ પણ વ્યાપી ગયો છે.
રાતે બે વાગે યુવતીએ કાર ઊભી રાખી અને મદદ માગી: અશોકભાઇની વાત સાંભળીને એક ગ્રાહક તેમને મળવા માટે શોપ પર ગયો હતો. ગ્રાહક અશોકભાઇના પુત્ર તુષારને મળ્યો હતો જ્યાં તેણે કહ્યું કે થોડા દિવસ પહેલાં મોડી રાતે બે વાગ્યાની આસપાસ તે કાર લઇને મણિપુર તરફ આવી રહ્યો હતો ત્યારે એક યુવતીએ તેને ઊભા રહેવા માટેનો ઇશારો કર્યો હતો. યુવતીએ કહ્યું હતું કે મારો દીકરો દુબઇમાં રહે છે અને હું અહીં એકલી રહું છુ. મારી પાછળ કેટલાક લોકો પડ્યા છે જેથી તમે મારી મદદ કરો. ગ્રાહક મદદ કરવાની જગ્યાએ ત્યાંથી નીકળી ગયો હતો. ગ્રાહકની વાત સાંભળીને તુષારે ઘટનાના સીસીટીવી બતાવ્યા હતા. સીસીટીવી જોતાંની સાથે જ ગ્રાહકે યુવતીને ઓળખી બતાવી હતી.
મંદિરમાં રૂપિયા છે તે મારે નથી લેવા
અશોકભાઇની શોપમાં આ દંપતી આવ્યું તે પહેલાં તે એક દુકાનમાં ગયું હતું જ્યાં તેમણે દુકાનદારને કહ્યું કે અમે દુબઇથી આવ્યા છીએ. અમે ૫૦૦ની તેમજ બે હજારની નોટ જોઇ નથી તમે અમને બતાવો. દુકાનદારે ૫૦૦ની નોટ બતાવી હતી અને ત્યારબાદ મંદિરમાં રહેલા રૂપિયા બતાવ્યા હતા જ્યાં દંપતીએ દુકાનદારને કહ્યું હતું કે અમારે મંદિરના રૂપિયા નથી લેવા અને જોવા પણ નથી.