સુરતમાં અવારનાર ડ્રગ્સ પકડાતું હોય છે, જેમ કે કાયદાઓનું ઉલ્લંઘન કરનારે કાયદાનો કોઈ ડર જ ના હોય, ત્યારે હવે સુરતમાં ખુલ્લેઆમ ડ્રગ્સ વેંચાણની ઘટના સામે આવી છે.
સુરતમાં મકાઈપુલ દાંતીવાળા બેકરી પાસે ડ્રગ્સનું ખુલ્લેઆમ વેંચાણ થઇ રહ્યું છે. ગઈકાલે SOGએ ડ્રગ્સનું વેંચાણ કરતા આરોપીની ધરપકડ કરી હતી. સમીર કુરેશી નામના આરોપીની ધરપકડ કરવામાં આવી હતી. આ આરોપીનો ડ્રગ્સ વેંચતો વીડિયો પણ સામે આવ્યો હતો. જેમાં ડ્રગ્સની બુકાનીધારી શખ્સ ડિલિવરી લઇ રહ્યો છે. SOGએ 3 આરોપીની ધરપકડ કરી હતી, જેમાં સમીર કુરેશી મુખ્ય આરોપી છે. પોલીસે 9 લાખથી વધુનું ડ્રગ્સ ઝડપી પાડ્યું છે.
સુરતના 3 યુવકો પાસેથી ડ્રગ્સ મળી આવ્યું
સુરતના 3 યુવકો પાસેથી ડ્રગ્સ મળી આવ્યું હતું. 3 યુવકો પાસેથી 196 ગ્રામ જેટલું મિથાઇલ ડાયમેકિસ(MD) ડ્રગ્સ ઝડપાયું હતું. ભગાતળાવ વિસ્તારમાંથી પોલીસે 3 યુવક અટકાયત કરી હતી. સ્પેશિયલ ઓપરેશન ગ્રુપ ટીમ દ્વારા ત્રણ યુવકોને પ્રતિબંધિત એમડી ડ્રગ્સની હેરાફેરી કરતા રંગેહાથે ઝડપી પાડવામાં આવ્યા હતા. પકડાયેલા લોકોમાં મદાર એપાર્ટમેન્ટના મોહમ્મદ જુનૈદ અબ્દુલ રઝાક ચાંદીવાલા(32), બડેખાં ચકલાના ઢીંગલી મોહલ્લા નિવાસી ગુલામ શાબીર ઉર્ફ સમીર મોહમ્મદ કુરેશી(35) અને નાનપુરાના મટન માર્કેટ નિવાસી અશફાક અફઝલ કુરેશી સામેલ છે. SOGએ રૂપિયા 9 લાખ 80 હજારથી વધુનું MD ડ્રગ્સ ઝડપ્યું હતું. SOG દ્વારા વધુ તપાસ હાથ ધરવામાં આવી રહી છે.
તેમની પૂછપરછ દરમિયાન સામે આવ્યું છે કે આ ડ્રગ્સ મુંબઇ લઇ જવાનો પ્લાન હતો. જ્યાં કોલેજના વિદ્યાર્થીઓને નશાની લતે ચડાવવાની વાત આ ત્રણેયે કબૂલી છે.
અત્રે ઉલ્લેખનીય છે કે સુરતમાં વર્ષોથી ડ્રગ્સ મળતું આવ્યું છે. શહેરના યુવાનો દિવસેને દિવસે પાઉડર, ગોળી અને ગાંજા સહિતના નશીલા પદાર્થોનું સેવન કરતા થયા છે. મેથામેફટામાઇન અને મિથાઇલ ડાયમેકિસ(MD)નામના સફેદ કે કોફી રંગના પાઉડર સ્વરૂપના ડ્રગ્સનું સેવન સ્કૂલ અને કોલેજોના યુવાનો કરી રહ્યા છે. મેક્રાડોન અને એમડી નામનું ડ્રગ્સ હવે મોંઘાદાટ હેરોઇન અને કોકેઇનનો પર્યાય બની ચૂક્યા છે. પોલીસ કાર્યવાહી કરી રહી છે પરંતુ તે માત્ર આવા ખેપિયાઓ સુધી સીમિત રહી છે. શહેરમાં વર્ષોથી ડ્રગ્સ મળતુ આવ્યું છે જે સુરતમાં નશાખોરીનું ચિત્ર સ્પષ્ટ કરે છે.