રાજ્યમાં છેલ્લા 2 દિવસથી ધોધમાર વરસાદ વરસી રહ્યો છે. મેઘ મહેરને કારણે નાગરિકો તથા જગતનો તાત બંન્ને ખુશ થયાં છે ત્યારે સંસ્કારી નગરી વડોદરામાં અલગ-અલગ 3 જગ્યાએ મકાનો ધરાશાયી થવાની ઘટના બની છે.
વડોદરામાં વરસાદથી જર્જરીત મકાનો ધરાશાયી
રાત્રી દરમિયાન 3 જર્જરીત મકાન ધરાશાયી થયા
કાલુપુરના નાકે મકાન ધરાશાયી થતા 2 વ્યકિતઓ દબાયા
પ્રાપ્ત થયેલી જાણકારી પ્રમાણે રાત્રી દરમ્યાન ત્રણ જર્જરિત મકાનો ધરાશાયી થયા હતા. જોકે, આ ઘટનામાં કોઈ જાનહાનિ થઈ ન હોવાના સમાચાર સામે પણ આવ્યા છે.
અલગ-અલગ 3 જગ્યાએ મકાન ધરાશાયી
ઉલ્લેખનીય છે કે, વડોદરા શહેરના કાલુપુરાના નાકે, જ્યુબિલી બાગ અને ઘડિયાળી પોળમાં એક-એક એમ કુલ 3 મકાનો ધરાશાયી થયા છે. જ્યુબિલી બાગ નજીક બારદાન ગલીમાં મકાન ધરાશાયી છે. 1 વ્યક્તિને કાટમાળમાંથી બહાર કાઢવામાં આવ્યો હતો અને તાત્કાલિક અસરથી તેને નજીકના દવાખાને સારવાર અર્થે ખસેડાયો છે. ઘડિયાળી પોળમાં બંધ જર્જરિત મકાન ધરાશયી કોઈને ઇજા નહીં.
વડોદરામાં સરેરાશ 4 ઈંચ વરસાદ
વડોદરા પર પણ મેઘરાજા મહેરબાન થયા છે. વડોદરા જિલ્લામાં સાર્વત્રિક વરસાદ પડી રહ્યો છે. વડોદરામાં સરેરાશ 4 ઈંચ વરસાદ પડ્યો. પાદરામાં સૌથી વધુ 5 ઈંચ વરસાદ પડ્યો. વાઘોડિયામાં પોણા ત્રણ ઈંચ વરસાદ પડ્યો. સાવલી અને ડેસરમાં દોઢ ઈંચ વરસાદ વરસ્યો. વરસાદના કારણે રોડ પર પડ્યા ભૂવા પડતાં વાહન ચાલકોની મુશ્કેલીમાં વધારો થયો છે.
હવામાન વિભાગે વરસાદની કરી છે આગાહી
ગુજરાતમાં હાલ વરસાદી માહોલ જામ્યો છે. હવામાન વિભાગની માહિતી મુજબ ગુજરાતમાં 14 ઓગસ્ટ સુધી વરસાદ રહે તેવી શકયતા જોવાઇ રહી છે. ગુજરાતમાં સાર્વત્રિક વરસાદ વરસી રહ્યો છે.
હવામાન વિભાગે બનાસકાંઠા ,પાટણ, મહેસાણા, સાબરકાંઠા, દમણ, દાદરાનગર હવેલીમાં વરસાદની આગાહી કરી છે. નવસારી, ડાંગ, આહવા અને અમરેલી, ભાવનગર સહીત 14 ઓગસ્ટ સુધી વરસાદ પડે તેવી શક્યતા જોવાઇ રહી છે.