રણબીર કપુર સાથેના બ્રેકઅપ બાદ કૈટરીના કૈફ એક વાર ફરી સલમાનખાન સાથે પાછી આવી. 'સુબહ કા ભુલા શામ કો ઘર આ જાયે' એમ સમજીને સલમાને તેને માફ પણ કરી દીધી.
આમ તો સલમાન અંગે એવું કહેવાય છે કે તે કોઇને સરળતાથી માફ કરતો નથી અને એ વાત વિવેક ઓબેરોયથી સારી રીતે કોણ જાણી શકે. જોકે કેટરિનાની વાત અલગ છે. તે સલમાનની સ્પેશિયલ ફ્રેન્ડ છે.
રણબીરના ચક્કરમાં કૈટરિનાએ ભલે પોતાની કરિયરને લાત મારી દીધી હોય,પરંતુ જ્યારે તે પાછી ફરી ત્યારે માહોલ બદલાઇ ચુક્યો હતો. દીપિકા, અનુષ્કા, આલિયા જેવી અભિનેત્રીઓ તેનાથી આગળ નીકળી ચુકી હતી. કૈટરિના એકવાર ફરી તેનું ખોવાયેલું સ્થાનપાછુ મેળવવા માંગતી હતી. સલમાને તેને ‘ટાઇગર ઝિંદા હૈ’ અપાવી દીધી.
‘ભારત‘ ફિલ્મથી પ્રિયંકા જ્યારે છેલ્લી ક્ષણોએ પાછી હટી ગઇ ત્યારે સલમાને કેટરિનાને ફિલ્મમાં ફિટ કરવામાં એક મિનિટનો પણ વિચાર ન કર્યો. સલમાનને જ્યારે જાણ થઇ કે શાહરુખ તેના દ્વારા ઠુકરાવેલી ફિલ્મ ‘ઝીરો’ કરવા જઇ રહ્યો છે. તો તેણે એ ફિલ્મ માટે પણ શાહરુખને કેટરિનાની ભલામણ કરી દીધી.
આ બાજુ ખાન ત્રિપુટીના અન્ય એક ખાન આમિર સાથે કેટરિના ‘ઠગ્સ ઓફ હિન્દુસ્તાન’ કરી રહી હતી. એક જ સમયે કેટરિના ફિલ્મમાં ત્રણેય ખાન સાથે રોમાન્સ કરી રહી હતી. આવું સૌભાગ્ય બહુ ઓછી હીરોઇનોને મળે છે. ત્રણેય ખાન સુપર સ્ટારની ફિલ્મો મોટા તહેવારો પર રીલીઝ થઇ. કૈટરિનાને સ્ટાર ખાન ત્રિપુટીના કારણે આ લકઝરી પણ મળી. ‘ઠગ્સ ઓફ હિન્દુસ્તાન’ દિવાળીમાં રીલીઝ થઇ, તો ‘ઝીરો’ ક્રિસમસ પર અને ‘ભારત’ ઇદ પર.
કેટરિનાને લાગતું હતુ કે તે લાંબી છલાંગ લગાવવાની છે, પરંતુ બધા સપના કોના સાચા પડે છે. દિવાળી પર ધુમધડાકાભેર રીલીઝ થયેલી ફિલ્મ ‘ઠગ્સ ઓફ હિન્દુસ્તાન’ સાવ પિટાઇ ગઇ. અમિતાભ બચ્ચન અને આમિરખાન જેવા મોટા સ્ટાર હોવા છતાં તે ફિલ્મે લોકોને નિરાશ કર્યા.પોતાનું સિંહાસન બચાવવા માટે તનતોડ મહેનત કરનાર શાહરુખ ખાન ક્રિસમસ પર ઝીરો લઇને આવ્યો. તેની સાથે અનુષ્કા અને કેટરિના પણ હતી. જોકે આ ફિલ્મ બોક્સ ઓફિસ પર ઝીરો સાબિત થઈ.
હવે બાકી હતો સલમાન ખાન. ઇદ પર ભારતને લાવવાની જાહેરાત કરી. ઇદ અને સલમાનને સારા સંબંધો છે. ‘ભારત’ની હાલત ‘ઠગ્સ’ અને ‘ઝીરો’ જેવી તો ન થઈ, પરંતુ ફિલ્મને જે મળવું જોઇતું હતુ તે ન મળ્યુ. દર્શકો પણ એટલા ન મળ્યા જે સલમાનની ફિલ્મોને મળવા જોઇએ. કૈટરિના ફરી ખાલી હાથ થઇ ગઇ અને 8 મહિનામાં કેટરિનાની આ 3 મોટી ફિલ્મો રીલીઝ થઇ જે બોલિવુડ માટે પણ ઝટકો હતી. હવે તો એમ કહેવાઇ રહ્યુ છે કે કૈટરિનાએ ત્રણેય ખાનને ડુબાડવામાં કોઇ કસર રાખી નથી.