તપાસ / CAની પરીક્ષામાં 3 વખત નપાસ થતા વિદ્યાર્થિની કર્યો આપઘાત, તો બીજા બનાવમાં BBAની વિદ્યાર્થિનીએ ટુકાવ્યું જીવન, સુરતમાં ચકચાર

• સુરતમાં એક જ દિવસમાં આપઘાતના ત્રણ બનાવ
• CA અને BBAમાં અભ્યાસ કરતી વિદ્યાર્થિનીઓએ કર્યો આપઘાત
• 1 મહિના અગાઉ જ લગ્ન કરનાર યુવકે ટૂંકાવ્યું જીવન

સુરત શહેરના અલગ-અલગ વિસ્તારોમાં છેલ્લા 24 કલાકમાં 3 આપઘાતના બનાવો સામે આવ્યા છે. જેમાં બે વિદ્યાર્થિની અને એક યુવકે જીવન ટૂંકાવ્યું છે. શહેરના અમરોલી વિસ્તારમાં BBAમાં અભ્યાસ કરતી 19 વર્ષીય વિદ્યાર્થિનીએ અગમ્ય કારણોસર આપઘાત કરી લેતા ચકચાર મચી જવા પામી છે. 

અમરોલી વિસ્તારમાં 19 વર્ષીય વિદ્યાર્થિનીએ કર્યો આપઘાત
અમરોલી વિસ્તારની વિદ્યાર્થિનીએ ક્યા કારણોસર આપઘાત કર્યો તે અંગે હાલ કંઈ જાણવા મળ્યું નથી. અમરોલી પોલીસે આપઘાતનો ગુનો નોંધી આગળની તપાસ હાથ ધરી છે. હાલ પોલીસ મૃતક વિદ્યાર્થિનીના પરિવારજનો અને મિત્રોની પૂછપરછ કરી રહી છે. 

CAની પરીક્ષામાં 3 વખત નપાસ થતા વિદ્યાર્થિનીએ કર્યો આપઘાત
તો શહેરમાં અન્ય એક વિદ્યાર્થિનીએ પણ ગળેફાંસો ખાઈ આપઘાત કરી લીધો છે. પોલીસની તપાસમાં સામે આવ્યું છે કે, વિદ્યાર્થિની CAની પરીક્ષામાં 3 વખત નાપાસ થતાં તેણે મોતને વ્હાલુ કરી લીધું છે. હાલ પોલીસે મૃતક વિદ્યાર્થિનીના મૃતદેહને પોસ્ટમોર્ટમ અર્થે હોસ્પિટલ ખાતે ખસેડીને આ મામલે વધુ તપાસ હાથ ધરી છે. 

સચિન GIDCમાં યુવકે ટૂંકાવ્યું જીવન
શહેરના સચિન GIDC વિસ્તારમાં રહેતા અને 1 મહિના અગાઉ જ લગ્ન કરનાર યુવકે પોતાના જ ઘરમાં ગળેફાંસો ખાઈ લેતા ચકચાર મચી જવા પામી હતી. યુવકના આપઘાતનું કારણ હાલ સામે આવ્યું નથી. આ સમગ્ર મામલે પોલીસે તપાસનો ધમધમાટ શરુ કર્યો છે. હાલ તો આ મામલે પોલીસ તપાસ કરી રહી છે અને પોલીસ તપાસ બાદ જ આત્મહત્યાનું કારણ બહાર આવશે. પ્રદીપના લગ્ન એક જ મહિના અગાઉ થયા હતા. ગતરોજ સાંજના સમયે કામ પરથી આવી કોઈ અગમ્ય કારણોસર પ્રદીપે ઘરના બેડરૂમમાં ગળે ફાંસો ખાઈ આપઘાત કરી લીધો હતો. યુવકના આપઘાતને પગલે પરિવાર શોકમાં ગરકાવ થઈ ગયો છે.

21 જાન્યુઆરીએ પણ વિદ્યાર્થિનીએ કર્યો હતો આપઘાત
અત્રે ઉલ્લેખનીય છે કે, ગત 21 જાન્યુઆરીએ પણ સુરતની વિદ્યાર્થિનીએ ગળેફાંસો ખાઇ જીવન ટૂંકાવ્યું હતું. શુક્રવારે બપોરે પીપલોદ સ્થિત વીર નર્મદ દક્ષિણ ગુજરાત યુનિવર્સિટીની ગર્લ્સ સમરસ હોસ્ટેલના સાતમા માળે એન્જિનિયરિંગનો અભ્યાસ કરતી વિદ્યાર્થિનીએ આપઘાત કરી લીધો હતો. ઉમરા પોલીસે આ અંગે વધુ તપાસ હાથ ધરી હતી.