તાપી / કારચાલકે સ્ટિયરિંગ પરથી કાબૂ ગુમાવતા વાલોડ બાજીપુરામાં અકસ્માત, 3 યુવકોના મોત, 3 ગંભીર

• તાપીના વાલોડ બાજીપુરામાં અકસ્માતમાં 3 યુવકોના મોત, 3ને ગંભીર ઇજા  
• ધાર્મિક કાર્યક્રમમાં જતી વખતે અકસ્માત નડ્યો હતો
• કારચાલકે સ્ટિયરિંગ પરથી કાબુ ગુમાવતા થયો અકસ્માત

અકસ્માતને કોઈ ગંભીરતાથી નથી લઇ રહ્યું જેને લઇને ગંભીર પરીણામો ભોગવવાનો વારો આવે છે. વાલોડ બાજીપુરા હાઈવે પર કાર ચાલકે સ્ટિયરિંગ પરથી કાબૂ ગુમાવતા અકસ્માત થયો હતો. અકસ્માત સર્જાતા કારનો કચ્ચરઘાણ નીકળી ગયો હતો. છ જેટલા યુવકો વાલોડથી બાજીપુરા તરફ ધાર્મિક કાર્યક્રમમાં જતા હતા. જેમાંથી અકસ્માતમાં 3 યુવકોના ઘટનાસ્થળે જ મોત નિપજ્યાં હતા. જ્યારે અન્ય 3 યુવકોને ગંભીર ઇજા પહોંચી હતી. 

ઇજાગ્રસ્તોને સારવાર અર્થે ખસેડાયા

ઇજાગ્રસ્તોને ઇમરજન્સી 108 મારફતે બારડોલી અને સુરતની ખાનગી હોસ્પિટલમાં સારવાર અર્થે ખસેડાયા હતા. આ તમામ યુવકો વાલોડના રહેવાસી હતા. વાલોડ પોલીસે અકસ્માતનો ગુનો નોંધી વધુ તપાસ હાથ ધરી છે.

અબડાસામાં ટેલરની અડફેટે યુવકનું મોત

કચ્છના અબડાસામાં ટેલરની અડફેટે યુવકનું મોત નિપજ્યું હતું. રસ્તો ક્રોસ કરતી વખતે ટેલરે યુવકને અડફેટે લીધો હતો. ગ્રામજનોએ ટેલરમાં આગ લગાવી હતી. જોકે, પોલીસે ઘટનાસ્થળે પહોંચી પરિસ્થિતિ કાબુમાં લીધી હતી.