માતમ / 2 દિવસ બાદ પુત્રના હતા લગ્નઃ કંકોત્રી લખાવીને પરત ફરતા અબિયાના ગામના પરિવારને નડ્યો અકસ્માત, વરરાજાના પિતા સહિત 3ના મોત

• ચાણસ્મા પાસે ગમખ્વાર અકસ્માત
• કારનું ટાયર ફાટતા અકસ્માત 
• એક જ પરિવારના 3 લોકોના મૃત્યુ

પાટણના ચાણસ્માના કંબાઈ ગામના પાટિયા પાસે ઈકો કારનું ટાયર ફાટતા અકસ્માત સર્જાયો હતો. જેમાં એક જ પરિવારના 3 સભ્યોના ઘટનાસ્થળે જ મૃત્યુ થયા છે. તો અન્ય 4 લોકો ઇજાગ્રસ્ત થયા છે. આ ઇજાગ્રસ્તોને ધારપુર હોસ્પિટલમાં સારવાર હેઠળ ખસેડાયા છે. જ્યારે મૃતકોના મૃતદેહને પોસ્ટમોર્ટમ માટે હારીજ રેફરલ હોસ્પિટલમાં ખસેડવામાં આવ્યા છે. 

સાંતલપુરના અબિયાના ગામનો પરિવાર અમદાવાદ ખાતે પુત્રના લગ્ન લખીને પરત આવી રહ્યો હતો. પરત ફરતા સમયે દુર્ઘટના સર્જાઈ હતી. બે દિવસ પછી જ પુત્રના લગ્ન હતા. જ્યારે આજે સાંજે સાત વાગ્યે લગ્ન વધાવવાનું હતું. દુર્ઘટનાને પગલે પરિવારમાં ખુશીનો માહોલ માતમમાં ફેરવાઈ ગયો છે.