ઇલેક્શન 2022 / ચૂંટણી પહેલાં જામનગરમાં પ્રજાપતિ, વિશ્વકર્મા સંઘ અને બ્રહ્મદેવ સમાજ આવ્યા મેદાને, ટિકિટ આપવાની કરી માંગ

• જામનગરમાં ત્રણ સમાજ સાથે જોવા મળ્યા
• પ્રજાપતિ,વિશ્વકર્મા સંઘ, બ્રહ્મદેવ સમાજની મળી બેઠક
• ત્રણમાંથી કોઈપણ સમાજના વ્યક્તિને ટિકિટ આપવા માગ

ગુજરાતમાં વિધાનસભાની ચૂંટણી નજીક આવતા રાજકીય ગતિવીધિઓ તેજ થઈ રહી છે. ચૂંટણીની જાહેરાત પણ ગમે ત્યારે થઈ શકે છે ત્યારે ત્રણેય પક્ષો પણ એકબીજાને પડકાર ફેકી રહ્યાં છે અને ચૂંટણી માટે તૈયારીઓ બતાવી રહ્યાં છે. રાજ્યમાં ચૂંટણીનો માહોલ જામી ગયો છે. જ્યારે વિધાનસભા ચૂંટણી પહેલાં જામનગરમાં ત્રણ સમાજ સાથે જોવા મળ્યા છે. પ્રજાપતિ, વિશ્વકર્મા સંઘ અને બ્રહ્મદેવ સમાજની બેઠક મળી છે. 

જામનગરમાં ત્રણ સમાજ સાથે જોવા મળ્યા
વિધાનસભાની ચૂંટણી પહેલા જામનગરમાં ત્રણ સમાજ એક થયાં છે. જેમાં પ્રજાપતિ, વિશ્વકર્મા સંઘ અને બ્રહ્મદેવ સમાજની બેઠક મળી છે. જે બેઠકમાં માગ ઉઠી છે કે, ત્રણમાંથી કોઈપણ એક સમાજના વ્યક્તિને ટિકિટ આપવી. ભાજપમાં પ્રજાપતિ સમાજના ગિરીશ અમેથીયાએ દાવેદારી પણ નોંધાવી છે. જામનગર બેઠક પર ત્રણેય સમાજના અંદાજે 70 હજાર મતો છે. જામનગરમાં ત્રણેય સમાજની બેઠકને લઈ રાજકીય માહોલ ગરમાયો છે. ભાજપે ગઈ કાલે નિરીક્ષકોની યાદી જાહેર કરી હતી અને આજે સેન્સ પ્રક્રિયા પણ હાથ ધરવામાં આવી છે. 

આજથી ભાજપની સેન્સ પ્રક્રિયા
ગુજરાતની વિધાનસભાની ચૂંટણી પહેલા ભાજપે ચૂંટણીલક્ષી રાજનીતિનો ધમધમાટ શરૂ કરી દીધો છે. જેમાં સુરતની 12 બેઠકો પર ભાજપ દ્વારા ઉમેદવાર પસંદગી માટે સેન્સ પ્રક્રિયા હાથ ધરવામાં આવી છે તો બીજી તરફ ગાંધીનગરની ત્રણ વિધાનસભા બેઠકોની પણ સેન્સ પ્રક્રિયા હાથ ધરવામાં આવી છે. સૌરાષ્ટ્રના જિલ્લાઓમાં ભાજપની 3 દિવસ સેન્સ પ્રક્રિયા છે જેમાં તારીખ 27 થી 29 ભાજપની સેન્સ પ્રક્રિયા હાથ ધરાશે. દક્ષિણ ઝોનમાં 30 નિરીક્ષકો અને મધ્યઝોનમાં 24 નિરીક્ષકો તેમજ ઉત્તર ઝોનમાં 24 અને સૌરાષ્ટ્ર ઝોનમાં 39 નિરીક્ષકો સાંભળી રહ્યાં છે.