ઇસમે વડાપ્રધાન કાર્યાલય (PMO)ને મેઈલ કરીને વડાપ્રધાનને જાનથી મારી નાખવાની ધમકી આપી અને ગુજરાત ATSની ટીમે મધરાત્રે કરી મોટી કાર્યવાહી
ગુજરાત વિધાનસભાની ચૂંટણીના પડઘમ વચ્ચે મોટા સમાચાર
PM મોદીને ઈ-મેલ કરી જાનથી મારવાની ધમકી
ગુજરાતની ATSએ બદાયુંમાં ઘૂસી ઇસમને દબોચ્યો
ગુજરાત વિધાનસભાની ચૂંટણીના પડઘમ વચ્ચે હવે અમદાવાદની ATSની ટીમે છેક ઉત્તરપ્રદેશ પહોંચી PM મોદીને ઈ-મેલ કરી જાનથી મારવાની ધમકી આપનાર ઈસમને દબોચી લીધો છે. વાત જાણે એમ છે કે, ઇસમે વડાપ્રધાન કાર્યાલય (PMO)ને મેઈલ કરીને વડાપ્રધાનને જાનથી મારી નાખવાની ધમકી આપી હતી. જે બાદમાં અમદાવાદની ATSએ શનિવારે રાત્રે બદાયું જિલ્લામાં દરોડા પાડીને શહેરના આદર્શ નગર મોહલ્લાના રહેવાસી યુવકને ઝડપી લીધો હતો. હાલમાં તેને એસએસપીના નિવાસસ્થાને રાખીને પૂછપરછ કરવામાં આવી રહી છે.
અમદાવાદથી બે સભ્યોની ATS શનિવારે રાત્રે દિલ્હી થઈને બદાયું પહોંચી હતી. આમાં સામેલ ઈન્સ્પેક્ટર બી.એન.વાઘેલાએ સબ ઈન્સ્પેક્ટર સાથે સિવિલ લાઈન્સ પોલીસ સ્ટેશનમાં આગમનની નોંધણી કરી હતી. પોલીસ સૂત્રોના જણાવ્યા અનુસાર, ATSએ સ્થાનિક પોલીસ સાથે મળીને આદર્શ નગર વિસ્તારમાં રાત્રે 10 વાગ્યાની આસપાસ દરોડો પાડ્યો હતો અને અમન સક્સેના નામના યુવકને ઝડપી લીધો હતો. કહેવામાં આવી રહ્યું છે કે, અમન તેના માતા-પિતાનો એકમાત્ર પુત્ર છે. તેનું વર્તન જોઈને પરિવારજનોએ તેને પહેલાથી જ કાઢી મૂક્યો હતો, પરંતુ તે રાત્રે ઘરે પહોંચતો હતો અને પકડાઈ ગયો હતો.
અમદાવાદ એટીએસે કાર્યવાહી કર્યા બાદ યુવકને સિવિલ લાઈન્સ પોલીસ સ્ટેશન લઈ ગઈ હતી, જ્યાં તેની લગભગ એક કલાક સુધી પૂછપરછ કરવામાં આવી હતી. કહેવામાં આવી રહ્યું છે કે, તેણે વડાપ્રધાન કાર્યાલયને ઈમેલ કરીને વડાપ્રધાન નરેન્દ્ર મોદીને જાનથી મારી નાખવાની ધમકી આપી હતી. જેમાં ગુજરાતની એક છોકરી અને દિલ્હીનો એક છોકરો સહિત ત્રણ લોકો સંડોવાયેલા હોવાનું કહેવાય છે.
સિવિલ લાઈન્સ પોલીસ સ્ટેશનમાં મીડિયા કર્મીઓનો જમાવડો જોઈને એટીએસ યુવકને એસએસપીના નિવાસસ્થાને લઈ ગઈ. હવે ત્યાં તેની પૂછપરછ કરવામાં આવી રહી છે. ઈન્સપેક્ટર સહંસરવીર સિંહે જણાવ્યું કે, એટીએસ ગુજરાતમાંથી આવી છે અને તેની ગોપનીય પૂછપરછ કરી રહી છે.
આ તરફ સ્થાનિક લોકોના જણાવ્યા અનુસાર શુક્રવારે બે લોકો સાદા કપડામાં આવ્યા હતા. તેમણે વિસ્તારમાં કયા સ્થળોએ સીસીટીવી કેમેરા લગાવ્યા છે તે અંગે પૂછપરછ કરી હતી. એ લોકો કોણ હતા? તે જાણી શકાયું નથી. એવી આશંકા છે કે, તે એટીએસ દ્વારા મોકલવામાં આવેલ પોલીસકર્મી હતા.