ગુજરાતમાં જૂની પેન્શન યોજના જ ફરીથી લાગુ કરવાની માંગ સાથે હજારોની સંખ્યામાં સરકારી કર્મીઓ આંદોલનના માર્ગે ચઢ્યા છે અને ચીમકી ઉચ્ચારી છે કે આગામી સમયમાં આંદોલન ઉગ્ર બનશે.
ગુજરાતમાં વધુ એક મોટું આંદોલન
શિક્ષકોની સાથે અન્ય સરકારી કર્મીઓ જોડાયા
જૂની પેન્શન યોજના લાગુ કરવી સૌથી મોટી માંગ
ગુજરાતના સરકારી કર્મીઓ લડી લેવાના મૂડમાં
ગુજરાતમાં આજથી જૂની પેન્શન યોજનાને લઈને શિક્ષકોનું આંદોલન શરૂ થયું છે જેમાં અન્ય ખાતાના કર્મચારીઓ પણ મોટી સંખ્યામાં જોડાઈ રહ્યા છે, રાજ્યના અનેક જિલ્લામાં રેલી મારફતે હજારોની સંખ્યામાં કર્મીઓ ક્લેક્ટરને આવેદન પત્ર આપવા માટે નીકળી પડ્યા છે જેમાં ગુજરાત રાજ્ય સંયુક્ત કર્મચારી મોરચા દ્વારા આયોજન કરવામાં આવ્યું છે.
ગાંધીનગરના સત્યાગ્રહ છાવણી ખાતે પણ હજારોની સંખ્યામાં કર્મીઓ પોસ્ટર તથા બેનરો લઈને રેલી કાઢવા માટે પહોંચી ગયા હતા પરંતુ પોલીસ દ્વારા બેરીકેટ લગાવીને તેમને આગળ જતાં રોકવામાં આવ્યા હતા.
અમદાવાદમાં હજારો શિક્ષકો ઉતર્યા રસ્તા પર
અમદાવાદમાં આચાર્ય સંઘ દ્વારા રેલીનું આયોજન કરવામાં આવ્યું હતું જેમાં જૂની પેન્શન યોજના, ગ્રેડ-પે, 7મા પગારપંચની માંગ સાથે હજારો શિક્ષકો ગાંધી આશ્રમથી રસ્તા પર ઉતર્યા હતા અને ચીમકી ઉચ્ચારી હતી કે જો સરકાર જલ્દી નહીં માને તો આગામી સમયમાં ખૂબ જ જ્વલંત આંદોલન કરવામાં આવશે.
કર્મીઓને કોંગ્રેસે જાહેર કર્યું સમર્થન
સરકારી કર્મીઓની જૂની પેન્શન યોજનાની માંગને કોંગ્રેસ પાર્ટી દ્વારા ટેકો જાહેર કરવામાં આવ્યો છે. પાર્ટીના પ્રવક્તા મનીષ દોશીએ કહ્યું કે અમારી પાર્ટીએ જૂની પેન્શન યોજનાનો વાયદો આપ્યો છે અને અમારી રાજસ્થાન તથા છત્તીસગઢની સરકારોએ જૂની પેન્શન યોજના લાગુ કરી છે.
રાજ્ય સરકારના કર્મચારીઓની માંગણીઓ!
જૂની પેન્શન યોજના ફરી લાગુ કરવી
ફિક્સ પગાર પ્રથા બંધ કરીને નિમણૂકથી તમામ લાભ આપવા
1-1-2016થી સાતમાં પગારપંચના બાકીના ભથ્થા આપવા
રહેમરાહે નિયુક્ત કર્મચારીઓની નોકરી સળંગ ગણવી
કેન્દ્ર સરકારના કર્મચારીઓ માફત રાજ્ય સરકારના કર્મચારીઓને ઉચ્ચતર પગારનો લાભ