સ્કૂલોની કેફેટેરિયા, કેન્ટીન અને બોર્ડિંગ સ્કૂલોમાં ડિસેમ્બરથી હવે જંક ફૂડ મળશે નહીં. સરકારે સ્કૂલોની કેન્ટીનમાં કોલા, પોટેટો ચિપ્સ, પેકેજ્ડ જ્યૂસ, પિઝા, બર્ગર, નૂડલ્સ, સમોસા અને છોલે ભટુરેનાં વેચાણ પર પ્રતિબંધ મૂકી દીધો છે. સ્કૂલોની કેન્ટીનોમાં ફેટ, સોલ્ટ અને શુગરથી ભરપૂર ખાદ્ય ચીજવસ્તુઓનાં વેચાણ રોકવા માટે કેન્દ્ર સરકાર આ પગલું ઉઠાવી રહી છે.
આ પગલાં હેઠળ સ્કૂલનાં સ્પોર્ટ્સ ઇવેન્ટ, કમ્પ્યૂટરના વોલપેપર અને સ્કૂલના ૫૦ મીટરના દાયરામાં જંક ફૂડની એડવર્ટાઇઝમેન્ટ પર પણ પ્રતિબંધ રહેશે.
ખાદ્ય નિયામક FSSAIએ ખાદ્ય સુરક્ષા અને માનક (શાળાનાં બાળકો માટે સુરક્ષિત ભોજન અને સ્વસ્થ આહાર) વિનિમય-૨૦૧૯ તૈયાર કરવામાં આવ્યો છે. શાળાનાં બાળકોમાં જંક ફૂડના ઉપયોગને ઘટાડવા માટે તે તૈયાર કરાયો છે. FSSAI દેશમાં ફૂડ સેફ્ટી અને સ્ટાન્ડર્ડ પર વોચ રાખતી નોડલ એજન્સી છે.
હવે નિયમો હેઠળ શાળાની કેન્ટીનો, મેસ, હોસ્ટેલ કિચન કે સ્કૂલ કેમ્પસના ૫૦ મીટરના દાયરામાં પ્રી પેકેજ્ડ ફૂડનાં વેચાણ પર પ્રતિબંધ મૂકવામાં આવ્યો છે.
આ એવી ફૂડ આઇટમ્સ છે, જેમાં ફેટ, સોલ્ટ અને શુગરનું વધુ પ્રમાણ હોય છે. નિયમોમાં HFSSની કેટેગરીમાં ફ્રેન્ચ ફ્રાઇઝ, ફ્રાઇડ ચીપ્સ, સમોસા, છોલે ભટુરે, ગુલાબજાંબુ, વધુ શુગર ધરાવતા કાર્બોનેટેડ કે નોન કાર્બોરેટેડ બેવરેજિસ, રેડી ટુ ઇટ ફૂડ, નૂડલ્સ, પિઝા, બર્ગર જેવી ખાદ્ય ચીજવસ્તુઓનો સમાવેશ કરાયો છે.
સ્કૂલના સ્પોર્ટ્સ ઇવેન્ટ કે અન્ય કાર્યક્રમોમાં કંપનીઓ તરફથી જંક ફૂડની એડ અને તેના ફ્રી સેમ્પલ વહેંચવા પર પણ પ્રતિબંધ મૂક્યો છે. સ્કૂલોમાં હવે ઈવેન્ટ માટે ફૂડ બિઝનેસ ઓપરેટર્સ તરફથી સ્પોન્સરશિપ મળી શકશે નહીં. સ્કૂલ કેફેટેરિયા અને ડે કેર સેન્ટર્સ માટે મેનુ પસંદ કરવાના દિશા નિર્દેશ જારી કરાયા છે તેમાં દૂધ, ઇંડાં, ચિકન, પનીર, ફિશ, ઓછી ફેટવાળું ટોન્ડ મિલ્ક વગેરેનો સમાવેશ કરવા અને વ્હાઇટ બ્રેડ, પેકેજ્ડ સુપથી બચવાનું સૂચન કરવામાં આવ્યું છે.