પોઈન્ટ ટેબલમાં ટોચના સ્થાન પર કબજો જમાવી રાખેલી ગુજરાત ટાઇટન્સની ટક્કર આજે છેક તળિયે જઈને બેઠેલી મુંબઈ ઇન્ડિયન્સ સામે થશે. હાર્દિક સેનાની નજર આજની મેચ જીતી લઈને પ્લેઓફની ટિકિટ કન્ફર્મ કરવા પર રહેશે.
ગુજરાત ટાઇટન્સની ટક્કર આજે મુંબઈ ઇન્ડિયન્સ સામે થશે
ગુજરાત ટાઈટન્સ તરફથી હાર્દિક મોટી ઈનિંગ રમવા ઉત્સુક
ગુજરાત ટાઇટન્સ માટે ટોચનો બેટિંગ ક્રમાંક ચિંતાનો વિષય
મુંબઈની ટીમ પહેલાંથી જ પ્લેઓફની રેસમાંથી બહાર થઈ ગઈ છે. ઉલ્લેખનીય છે કે ગુજરાત ટાઇટન્સનો ગત મેચમાં પંજાબ કિંગ્સ સામે આઠ વિકેટે પરાજય થયો હતો.
ગુજરાત ટાઇટન્સ 10 મેચમાં 16 પોઈન્ટ સાથે ટોચના સ્થાને
અત્યાર સુધી ગુજરાત ટાઇટન્સ માટે ટોચનો બેટિંગ ક્રમાંક ચિંતાનો વિષય રહ્યો છે. હવે ગુજરાત ટાઇટન્સ માટે લીગના અંતિમ તબક્કામાં આ ખામીને સુધારવાનો સમય આવી ગયો છે. પંજાબ સામે પરાજય છતાં ગુજરાત ટાઇટન્સ ૧૦ મેચમાં ૧૬ પોઈન્ટ સાથે ટોચના સ્થાન પર છે. આજે મુંબઈ ઇન્ડિયન્સ સામે મેચ જીતી જશે તો પ્લેઓફમાં સ્થાન મેળવનારી પ્રથમ ટીમ બની જશે. યુવા ખેલાાડી શુભમન ગિલ ટોપ ઓર્ડરમાં અપેક્ષાઓ પર ખરો ઉતરવામાં નિષ્ફળ રહ્યો છે, જ્યારે મેથ્યૂ વેડના સ્થાને આવેલા અનુભવી રિદ્ધિમાન સાહા ઇનિંગ્સની શરૂઆત તો સારી કરે છે, પરંતુ તેને મોટી ઇનિંગ્સમાં તબદીલ કરી શકતો નથી.
ગુજરાત ટાઇટન્સની બેટિંગનો મુખ્ય આધાર હાર્દિક
ગુજરાત માટે હજુ પણ નબળી કડી રહેલા બી સાઈ સુદર્શને છેલ્લી મેચમાં ૫૦ બોલમાં ૬૫ રનની ઇનિંગ્સ રમી હતી. કેપ્ટન હાર્દિક પંડ્યા, ડેવિડ મિલર, રાહુલ તેવટિયા અને રાશિદ ખાન પણ પંજાબ સામે મોટી ઇનિંગ્સ રમી શક્યા ન હતા. રાશિદે શાનદાર પ્રદર્શન કર્યું છે અને અત્યાર સુધી ગુજરાત ટાઇટન્સની સફળતામાં મહત્ત્વની ભૂમિકા ભજવી છે. ગુજરાત ટાઇટન્સની બેટિંગનો મુખ્ય આધાર હાર્દિક રહ્યો છે, તેણે ટીમ તરફથી સૌથી વધુ ૩૦૯ રન બનાવ્યા છે, પરંતુ તે છેલ્લી બે મેચમાં નિષ્ફળ રહ્યો છે. આજે હાર્દિક મોટી ઇનિંગ્સ રમવા ઉત્સુક છે. સિક્સર કિંગ મિલર, ગુજરાત ટાઇટન્સનો નવો ફિનિશર રાહુલ તેવટિયા અને રાશિદ પણ ગત મેચની નિષ્ફળતા ભૂલી આજે પોતાને સાબિત કરવા માટે ઉત્સુક છે.
રાશિદની હાજરીવાળું સૌથી ખતરનાક બોલિંગ આક્રમણ
ગુજરાતની બોલિંગ તરફ નજર કરીએ તો મોહમ્મદ શમી, લોકી ફર્ગ્યુસન, અલજારી જોસેફ અને રાશિદની હાજરીવાળું સૌથી ખતરનાક બોલિંગ આક્રમણ છે. પાવર પ્લેની છ ઓવરમાં શમી શાનદાર બોલિંગ કરી રહ્યો છે, જ્યારે ફર્ગ્યુસનની ઝડપ કોઈ પણ બેટિંગ ઓર્ડર માટે ચિંતાનો વિષય બની શકે તેમ છે. રાશિદ ખાન સુંદર લાઇન લેન્થ સાથે કરકસરયુક્ત બોલિંગ કરી રહ્યો છે, પરંતુ તે વિકેટ લેવામાં બહુ સફળ રહ્યો નથી. આ વાત ટીમ માટે ચિંતાનો વિષય હશે. બીજી તરફ જો મુંબઈ ઇન્ડિયન્સની વાત કરવામાં આવે તો તે પોઇન્ટ ટેબલમાં છેલ્લા સ્થાને છે અને સતત આઠ પરાજય બાદ તે પ્લેઓફની રેસમાંથી બહાર થઈ ગઈ છે, પરંતુ રોહિત શર્માની આગેવાની હેઠળની ટીમે રાજસ્થાન રોયલ્સ સામે પાંચ વિકેટે વિજય નોંધાવીને રાહતનો શ્વાસ લીધો હશે, જે વર્તમાન સિઝનમાં મુંબઈનો પ્રથમ વિજય હતો.
રોહિત અને ઈશાનનું ટૂર્નામેન્ટમાં કંગાળ ફોર્મ ચાલુ જ
સૂર્યકુમાર યાદવ બેટિંગ વિભાગમાં મુંબઈનો સ્ટાર પરફોર્મર રહ્યો છે. રોહિત અને ઈશાનનું ટૂર્નામેન્ટમાં કંગાળ ફોર્મ ચાલુ જ છે, જ્યારે પોલાર્ડ અત્યાર સુધી સિઝનમાં ફિનિશરની ભૂમિકા ભજવી શક્યો નથી. જસપ્રીત બૂમરાહ બહુ વિકેટ લઈ શક્યો નથી, જે ટીમ માટે સૌથી મુશ્કેલ વાત બની રહી છે. હવે મુંબઈ ઇન્ડિયન્સ બાકીની મેચોમાં અન્ય ટીમોના સમીકરણને બગાડવાનો પ્રયાસ કરશે.