અખાત્રીજ / 50 વર્ષ બાદ સર્જાઇ રહ્યો છે વિશેષ સંયોગ, ગ્રહોની આ ચાલથી બનશે 3 રાજયોગ, જાણો વિગત

• અક્ષય તૃતીયાના દિવસે ખાસ સંયોગ
• શુભકાર્યો- માંગલિક પ્રસંગો માટે વણજોયુ મુહૂર્ત
• આ દિવસે સર્જાઇ રહ્યો છે 3 રાજયોગ 

વૈશાખ માસના શુક્લ પક્ષની ત્રીજ એટલે અક્ષય તૃતીયા. આ દિવસને અખાત્રીજથી ઓળખવામાં આવે છે. આ દિવસે કોઇ પણ શુભ કે માંગલિક કાર્યો કરવા માટે મહત્વનો ગણાય છે. આ દિવસે કોઇ પણ શુભ કામ મુહૂર્ત જોયા વિના કરી શકાય છે. ત્યારે અખાત્રીજના દિવસે 50 વર્ષ બાદ અનોખો સંયોગ સર્જાઇ રહ્યો છે જેને કારણે આ વર્ષે અખાત્રીજનો દિવસ વધુ ફળદાયી અને લાભદાયી નીવડશે. 

અક્ષય તૃતીયા આ વર્ષે ખાસ કેમ ?

આ વખતે અક્ષય તૃતીયા પર 3 રાજયોગ બનવાને કારણે તે વધુ ખાસ બની ગયો છે.  આ વર્ષે અક્ષય તૃતીયા  મંગળવાર આવતી હોવાથી રોહિણી નક્ષત્રના કારણે મંગળ રોહિણી યોગ બની રહ્યો છે. આ દિવસે શોભન યોગ અક્ષય તૃતીયાને શુભ બનાવી રહ્યો છે.  તો 50 વર્ષ બાદ ગ્રહોના વિશેષ યોગથી અદ્દભુત સંયોગ પણ બની રહ્યો છે. 30 વર્ષ બાદ અક્ષય તૃતીયા પર બની રહેલો શુભ યોગ પણ આ દિવસનું મહત્વ વધારી રહ્યો છે. 

અક્ષય તૃતીયા પર 3 રાજયોગ

 અક્ષય તૃતીયાના દિવસે શુક્ર પોતાની ઉચ્ચ રાશિમાં હોવાને કારણે માલવ્ય રાજયોગ, ગુરુના મીન રાશિમાં હોવાથી હંસ રાજયોગ અને શનિ તેના ઘરમાં બિરાજમાન હોવાથી શશ રાજયોગ બની રહ્યો છે. તો આ દિવસે સૂર્ય અને ચંદ્ર તેમની ઉચ્ચ રાશિમાં રહેશે. લગભગ 50 વર્ષ બાદ એવો સંયોગ બન્યો છે કે બે ગ્રહ ઉચ્ચ રાશિમાં અને બે પ્રમુખ ગ્રહ સ્વરાશિમાં હશે.

પૂજા, સ્નાનનું વિશેષ મહત્વ

અક્ષય એટલે જેનો ક્ષય થતો નથી તે.  એવું માનવામાં આવે છે કે અક્ષય તૃતીયાના દિવસે કરવામાં આવેલ કાર્યોનો ક્ષય થતો નથી અથવા આ દિવસે કરવામાં આવેલ કાર્યો ઘણો લાભ આપે છે. તેથી, આ દિવસે પવિત્ર નદીઓમાં સ્નાન, પૂજા, દાન, ખરીદીનું ઘણું મહત્વ છે. આ દિવસે ભગવાન વિષ્ણુ અને માતા લક્ષ્મીની પૂજા કરવામાં આવે છે જેથી તેમની કૃપા હંમેશા બની રહે. તેની સાથે જ સોના-ચાંદી, ઘર-ગાડી જેવી કિંમતી વસ્તુઓ ખરીદો, જેથી ઘરમાં હંમેશા સુખ-સમૃદ્ધિ બની રહે.

 

• અક્ષય તૃતીયા પર પૂજા માટેનો શુભ સમય સવારે 05:39 થી બપોરે 12:18 સુધીનો છે.
• તે જ સમયે, સોનું-ચાંદી, મકાન-કાર વગેરે ખરીદવાનો શુભ સમય સવારે 05:39 થી બીજા દિવસે સવારે 05:38 સુધી રહેશે.