સેવા / પાટણમાં મહેંકી માનવતાની દીવાલ: બિનજરૂરી મૂકી જાઓ, જરૂરી ચીજ લઈ જાઓ

પાટણ શહેર આમ તો આ ઐતિહાસિક શહેર છે. પરંતુ નાગરિકો અદ્યતન છે. અહીં શહેરમાં પોતપોતાના કામધંધામાં દુનિયામાં વ્યસ્ત નાગરિકોને કોઈ સામે જોવાની પણ ફુરસદ નથી. પરંતુ આ શહેરમાં એક એવી દીવાલ બની છે જેણે એક મનુષ્યને બીજા મનુષ્યના દિલની આરપાર જોવા માટે મજબૂર કરી દીધા છે. હા એ દીવાલનું નામ છે માનવતાની દીવાલ. 

માનવતા હજુ મરીપરવારી નથી

આ ઐતિહાસિક શહેરના શહેરના રેવલે ગરનાળા પાસે આવેલા સર્કલ પાસે પાટણ જિલ્લા વહીવટીતંત્ર અને પ્રયાસ ફાઉન્ડેશને એક માનવતાની દિવાલ ઊભી કરીને એ સાબિત કરી દીધું છે કે માનવતા હજુ મરીપરવારી નથી. આ દીવાલ પાસે લખેલી સૂચનાએ અનેક લોકોને ઘરમાંથી બહાર નીકળી ગરીબો માટે મદદનો હાથ લંબાવવા દોર્યા છે. અહીં લોકો પોતાને બિનજરૂરી લાગતી ચીજવસ્તુ મૂકી જાય છે અને જરૂરતમંદ લોકો તેમાંથી જોઈતી જીવનજરૂરી વસ્તુ લઈ જાય છે. અહીં હાથ લંબાવી માગવું પડતું નથી એટલે શરમ અને સંકોચનો પ્રશ્ન જ નડતો નથી. ઉપરથી મળે છે ગમતી વસ્તુ મળી ગયાનો સંતોષ. 

જો તમારી પાસે વધારે હોય તો અહીં મૂકી જાઓ અને જો તમારે જરૂરીયાત છે તો અહીંથી લઈ જાઓ

ઉલ્લેખનીય છે કે, જરૂરિયાત મંદ લોકોને સહાયરૂપ થવા રસ્તા પરના એક ખૂણામાં ઉભી કરેલી આ દીવાલ અનેક જરિયાતમંદ લોકો માટે જીવન સહારો બની ગયુ છે. કેમકે, કોઈ ગરીબ કે ભિક્ષુને એક ટંક જમવાનું મળી રહે પરંતુ તેમની કપડાં, પગરખાં  જેવી પ્રાથમિક જરૂરિયાતનું શું? પરંતુ આ દીવાલે તેમની એ ચિંતા પણ દૂર કરી દીધી છે. જો તમારી પાસે વધારે હોય તો અહીં મૂકી જાઓ અને જો તમારે જરૂરીયાત છે તો અહીંથી લઈ જાઓ. માનવતાની દીવાલ પર લખેલા આ સૂત્રને પાટણની જનતાએ સુપેરે સાર્થક પણ કર્યું. 

ઉચ્ચ અને મધ્યમ વર્ગના લોકો ઘરમાં રહેલા બિનજરૂરી કપડા અને પગરખાં સહિતની વસ્તુઓ અહીં મુકી જાય છે. શિયાળામાં ધાબળા અને ઉનાળામાં પગરખા વગર દુષ્કર લાગતા દિવસોમાં અહીં મુકવામાં આવેલો સામાન જરૂરિયાતમંદ લોકોનો સહારો બને છે અને વળી આ શહેરમાં માગનારા કરતાં આપનારા વધારે છે. આ દિવાલ પરની ચીજ વસ્તુઓ તેનો જીવતો પુરાવો છે. 

પાટણમાં મહેકી માનવતાની મહેક

કહેવાય છે જેનું કોઈ નથી તેનો ઉપરવાળો છે કારણકે ઉપર વાળો પણ જ્યારે ગરીબ અને જરૂરીયાત મંદોની વેદના મહેસૂસ કરે છે ત્યારે પોતે તે માથે નથી રાખતો પરંતુ બીજાને કોઈને એક એવી પ્રેરણા આપતો હોય છે.  જેના દ્વારા કરવામાં આવેલ કામ ઈશ્વરીય કામ બની જાય છે. આ ઉમદાકાર્યની જેને પ્રેરણા મળી છે તે છે પાટણના માર્ગ અને મકાન વિભાગના ઇજનેર બી.એમ, ત્રિવેદી. જેમનો વિચાર આજે પાટણના ગરીબો અને લાચારો માટે આશીર્વાદ રૂપ સાબિત થઇ રહ્યો છે.  

ગત જાન્યુઆરી મહિનામાં પાટણ જિલ્લા વહીવટીતંત્ર અને સેવાભાવી સંસ્થાના સહિયારા પ્રયાસથી તૈયાર કરવામાં આવેલ આ માનવતાની દિવાલ કલેક્ટરના હસ્તે ખુલ્લી મુકવામાં આવી હતી. દાન આપ્યાનો અહંકાર ન જન્મે અને દાન મેળવનારને પણ ઓશીયાળાપણું ન અનુભવાય તે માટેનો આ પ્રયાસ ખરેખર આવકારદાયક છે. 

હાલતો પાટણના લોકો પોતાના બિન ઉપયોગી કપડા અહી મૂકી જાય છે અને જરૂરીયાત મંદ ગરબ અને શ્રમિકો અહીંથી કપડા, પગરખાં સહિતની વસ્તુઓ લઈ જઈ સંતોષનો ભાવ અનુભવી રહ્યા છે અને આશીર્વાદ આપી રહ્યા છે.