શરમજનક / બરોડાની ચોંકાવનારી ઘટનાઃ પતિની આ એક ભૂલના કારણે પ્રેમિકા સાથેના આડા સંબંધોનો ભાંડો ફૂટ્યો

• પતિ-પત્ની અને વોનો મામલો 
• પતિના હતા અનૈતિક સંબંધ 
• ઓનલાઇન પૈસા કર્યા ટ્રાન્સફર અને ફૂટ્યો ભાંડો

નરોડામાં રહેતી 23 વર્ષીય યુવતીએ પતિ, સાસુ-સસરા વિરુદ્ધ ફરિયાદ કરી છે. યુવતી કઠવાડા ખાતે નોકરી કરે છે અને વર્ષ 2019માં તેનાં લગ્ન બરોડા ખાતે થયાં હતાં. લગ્ન બાદ આ યુવતી તેના સાસરે રહેવા ગઇ હતી. યુવતીને બી.કોમ.ની પરીક્ષા હોવાથી તે તેના પિયર પરીક્ષાની તૈયારી કરવા આવી હતી. યુવતીને પતિની યાદ આવતી તો તે અનેક વખત તેને ફોન કરતી હતી, જોકે તેનો ફોન દરેક વખત વ્યસ્ત આવતો હતો, જ્યારે પતિ સાથે યુવતીની વાત થાય ત્યારે તે વાત કરતો ન હતો અને યેનકેન રીતે બબાલ કરતો હતો. 

એક વર્ષ પહેલાં યુવતીના પિયરમાં તેનો પતિ ચારેક દિવસ રહેવા આવ્યો હતો, જ્યાં તેનો પતિ ફોન ઉપર કોઈ સાથે વાતો કરતો હતો. યુવતીએ તેના પતિના ફોનમાં વોટ્સએપ મેસેજ ચેક કર્યા હતા, જેમાં તેણે રમીલા નામની સ્ત્રીને 2000 ટ્રાન્સફર કર્યા હોવાનું સામે આવ્યું હતું. પતિએ તરત જ મોબાઇલ પત્નીના હાથમાંથી ખેંચી લીધો હતો અને તરત જ ચેટ ડિલીટ કરી દીધા હતા. 

ત્યારબાદ યુવતીએ રમીલાનો મોબાઇલ નંબર લઇ તેની સાથે વાત કરવા ફોન કર્યો તો રમીલાએ આ યુવતી સાથે વાત કરી ન હતી અને તેની જાણ યુવતીના પતિને થતાં તેના પતિએ ઝઘડો કરી માર માર્યો હતો. આ બાબતની જાણ આ યુવતીએ તેનાં સાસુ અને સસરાને કરતાં તે બંનેએ યુવતીના પતિનું ઉપરાણું લઇ ઝઘડો કર્યો હતો અને કહ્યું હતું કે તેનો પતિ જે કરે તે તેને કરવા દેવાનું, તું ખાઈ-પીને પડી રહે. 

સાસ‌િરયાં પણ યુવતીને ઘરકામ મામલે ત્રાસ આપતાં હતાં અને હેરાન-પરેશાન કરતાં હતાં. ‘તારા બાપે દહેજ આપ્યું નથી અને પરાણે ગળે ઘંટ બાંધ્યો છે’ એવું કહી ત્રાસ આપતાં હતાં. યુવતી ત્રાસ સહન કરી નહીં શકતાં અંતે તેણે નરોડા પોલીસ સ્ટેશનમાં ફરિયાદ કરી છે. નરોડા પોલીસે આ મામલે ગુનો દાખલ કરી તપાસ શરૂ કરી છે.