નવ વર્ષની ઉંમરે પતંગ લૂંટવા જતા વીજ કરંટ લાગ્યો. જેમાં બે હાથ અને એક પગ ગુમાવવો પડ્યો. આ હાલતમાં પિતા એ તરછોડી દીધો. આ બાળકે આજે 16 વર્ષ ની ઉંમરે પહોંચીને એવું કરી બતાવ્યું કે તેના ઉપર સૌ કોઈને ગર્વ થાય. બે હાથ અને એક પગ નથી છતાં આ કિશોર આજે એક સામાન્ય વ્યક્તિની જેમ પોતાના કામ કરી શકે છે.
મહેસાણાના યુવકની અનોખી સિદ્ધિ
સામાન્ય વિદ્યાર્થીની જેમ ચલાવી શકે છે બાઇક
વિશાલ ચૌહાણ આજે એક સામાન્ય વિદ્યાર્થીની જેમ બાઇક ચલાવી શકે છે. ડાન્સ કરી શકે છે અને ખૂબ સુંદર અક્ષરે લખી શકે છે અને ખૂબ સુંદર ચિત્રો પણ દોરી શકે છે. જુઓ અમારો આ ખાસ અહેવાલ મન હોય તો માળવે જવાય.
વીજ કરંટ લાગવાથી ગુમાવ્યા 2 હાથ અને એક પગ
ગુજરાતીમાં એક કહેવત છે,મન હોય તો માળવે જવાય. આ કહેવત ને સાર્થક બનાવી છે મહેસાણાના વિશાલ ચૌહાણ. મહેસાણા તાલુકાના નગર ગામ ખાતે આવેલા અપંગ સેવા ટ્રસ્ટ ખાતે હોસ્ટેલમાં રહીને ધોરણ 10માં અભ્યાસ કરતો આ કિશોરે પ્રબળ ઈચ્છા શક્તિ ના સથવારે એવું કરી બતાવ્યું છે કે જે એક સામાન્ય માણસ પણ ન કરી શકે. આ કિશોરને બે હાથ અને એક પગ નથી. નવ વર્ષ ની ઉંમરે પતંગ લૂંટવા જતા વીજ કરંટ લાગવાથી બે હાથ અને એક પગ ગુમાવી દીધેલા કિશોરને તેના પિતાએ પણ તરછોડી દીધો છે.
બે હાથ નહીં હોવા છતાં ખૂબ સુંદર અક્ષરે સડસડાટ લખી શકે છે
આમ છતાં જીવનમાં કંઈક બનવાની ખેવનાને કારણે આજે કોઈ કામ એવું નથી કે જે વિશાલ નથી કરી શકતો. તે બાઇક ચલાવી શકે છે, ડાન્સ કરી શકે છે. કેરમ જેવી રમત પણ રમી શકે છે. એટલુ જ નહીં બે હાથ નહીં હોવા છતાં ખૂબ સુંદર અક્ષરે સડસડાટ તે લખી પણ શકે છે. ખૂબ સુંદર ચિત્રો દોરી શકે છે. બસ તેની આ સફળતા પાછળ મજબૂત મનોબળ જવાબદાર છે.
દિવ્યાંગ લોકો માટે પ્રેરણારૂપ બન્યો વિશાલ
ઘણી આપણે નાની નાની વાતો, ઝગડા કે નિષફળતાથી હતાશ થઈ જઈએ છે. પણ એવા લોકો પણ છે કે જે પોતાના લક્ષ્ય સુધી પહોંચવા કઈ પણ કરી શકે છે. આવા લોકો પાસેથી પ્રેરણા લેવી જોઈએ કે ખરાબ સમયમાં કેવી રીતે પોતાની જાત ને મજબુત રાખવી. આજે વિશાલ ચૌહાણ પાસેથી એ શીખવું જોઈએ કે પ્રબળ ઈચ્છા શક્તિ અને મનોબળથી કોઈ પણ પરિસ્થિતિમાં હાર ન માનવી જોઈએ.
પતંગ પકડવા જતા લાગ્યો કરંટ અને પિતાએ તરછોડ્યો
વિશાલ ચૌહાણ મૂળ મોરબી જિલ્લાના હળવદ તાલુકાના મથાક ગામનો રહેવાસી છે. નાનપણમાં પતંગ પકડવા જતા તેણે બે હાથ અને એક પગ ગુમાવી દીધો. પિતા ભરત ચૌહાણે પણ તેને આ હાલતમાં તરછોડી દીધો. પણ વિશાલની માતા તેને મામાના ઘરે લઈ આવી અને એ દિવસથી વિશાલે આજ દિન સુધી તેના પિતા ને નથી જોયા.
માતાએ વિશાલનો કર્યો ઉછેર
વિશાલનો ઉછેર તેની માતાએ કર્યો છે. પણ નાનપણથી જ કંઈક બનવાની ઈચ્છા ને કારણે તેને કોઈ પણ જાતના મોજા કે સાધનો વગર લખવાની પ્રેક્ટિસ શરૂ કરી અને આજે તે ખૂબ સુંદર અક્ષરે ખૂબ ઝડપથી લખી શકે છે. વિશાલ ભણી ગણી ને સરકારી નોકરી કરવા માંગે છે અને તેના મિત્રોને પણ વિશાલની આ અનોખી ખૂબીઓ અને મજબૂત મનોબળ ઉપર ગર્વ છે.
મામલતદાર બનવાનું છે સ્વપ્ન
સલામ છે વિશાલને કે બે હાથ ન હોવા છતાં તે અત્યાર સુધીની તમામ પરીક્ષાઓ પોતાની જાતે જ આપતો આવ્યો છે. તે પોતાના તમામ કામ કોઈ ની પણ મદદ વગર એક સામાન્ય વિદ્યાર્થી કરતા પણ ખૂબ સારી રીતે કરી શકે છે. વિશાલનું સ્વપ્ન મામલતદાર બનવાનું છે અને તે આજે આ માટે પોતાની જાત ને તૈયાર કરી રહ્યો છે.