સિદ્ધી / ભારતની આ દીકરીએ 50 વખત ઈન્ટરવ્યુમાં ફેલ થયા પછી પણ હાર ન માની, અંતે ગૂગલે આપી 1 કરોડની જોબ

• સંપ્રીતિ યાદવ બિહારની છે
• કમ્પ્યુટર સાયન્સમાં B.Tech નો અભ્યાસ કર્યો
• 14 ફેબ્રુઆરીથી ગૂગલમાં કામ કરશે

કહેવાય છે કે કોશિશ કરનારા ક્યારેય હાર માનતા નથી. જો તમારે સફળતાના શિખરો પર ચઢવું હોય તો મહેનત છોડશો નહીં. તમારા સપના અમુક સમયે ચોક્કસ સાકાર થશે. બિહારની 24 વર્ષની યુવતી સંપ્રીતિ યાદવે સખત મહેનત અને સમર્પણના બળ પર આવું જ કર્યું છે. એક સમય એવો હતો જ્યારે સંપ્રીતિ યાદવ સતત 50 ઈન્ટરવ્યુમાં ફેલ થઈ હતી અને તેની પાસે કોઈ નોકરી નહોતી.

50 ઇન્ટરવ્યુમાં નાપાસ થયા પછી ગૂગલમાં નોકરી મળી

જોકે, આટલી નિષ્ફળતા પછી પણ સંપ્રિતીએ હાર માની નહીં. આજે તેમની પાસે ચાર કંપનીઓની ઓફર છે. એટલું જ નહીં, ગૂગલે તેને 1.10 કરોડ રૂપિયાનું વાર્ષિક પેકેજ પણ ઓફર કર્યું છે. જેનો સંપ્રિતીએ સ્વીકાર કર્યો છે. સંપ્રીતિની આ સફળતાથી તેના ઘરમાં ખુશીની લહેર છે અને તેના પરિવારના સભ્યો ગર્વ અનુભવી રહ્યા છે.

સંપ્રીતિ યાદવ 14 ફેબ્રુઆરીથી ગૂગલમાં કામ કરવાનું શરૂ કરશે.

સંપ્રીતિ યાદવે દિલ્હી ટેક્નોલોજીકલ યુનિવર્સિટીમાંથી કોમ્પ્યુટર સાયન્સમાં B.Tech ડિગ્રી મેળવી છે. તમને જણાવી દઈએ કે સંપ્રીતિ માટે ગૂગલમાં નોકરી મેળવવી એટલી સરળ ન હતી. આ માટે તેણે પરીક્ષાના 9 રાઉન્ડ પાસ કર્યા છે. ગૂગલે સંપ્રીતિ સાથે 9 રાઉન્ડ ઇન્ટરવ્યુ કર્યા. આ તમામ રાઉન્ડમાં સંપ્રિતીએ પ્રશ્નોના સાચા જવાબ આપ્યા. આ પછી જ સંપ્રિતીને ગૂગલ તરફથી આટલા મોટા પેકેજ સાથે જોબની ઓફર મળી હતી.

માઇક્રોસોફ્ટ તરફથી પણ ઓફર મળી

સંપ્રિતીને માઈક્રોસોફ્ટ કંપની તરફથી નોકરીની ઓફર પણ આવી હતી. સંપ્રિતીએ જણાવ્યું કે તેણે ગૂગલના ઈન્ટરવ્યુ માટે ઘણી મહેનત કરી હતી. દરેક રાઉન્ડમાં તેના જવાબથી અધિકારીઓ સંતુષ્ટ હતા. સંપ્રીતિ કહે છે કે જો તમારે કંઇક મોટું કરવું હોય તો સૌથી પહેલા તમારું લક્ષ્ય નક્કી કરો. આ પછી, તે જ લક્ષ્ય અનુસાર તમારી તૈયારી સાથે આગળ વધો, તમને ચોક્કસપણે સફળતા મળશે. સંપ્રીતિનું બાળપણથી જ સપનું હતું કે તેને ગૂગલની લંડન ઓફિસમાં કામ કરવાનો મોકો મળે.