વિએટનામ દેશમાં 3 મહિના સુધી કોઈ નવા કોરોના કેસ નોંધાયા ન હોવા પછી અચાનક 2 સ્થાનિક સંક્રમણના કેસ પોઝિટિવ આવતા ડાનાંગ શહેરનું તંત્ર સંક્રમણ રોકવા માટે દોડતું થઇ ગયું હતું.
એક 57 વર્ષીય દર્દી જ 1 મહિનાથી ડાનાંગ શહેરમાં રહે છે અને તેણે અન્ય કોઈ જગ્યાએ પ્રવાસ પણ કર્યો નથી તેને 20 જુલાઈથી તાવ અને ઉધરસના લક્ષણો હતા. નોંધનીય છે કે તેણે કોઈ અજાણ્યા સાથે સંપર્ક પણ રાખ્યો નહોતો અને તે ફક્ત તેના પરિવાર અને પાડોશીઓના સંપર્કમાં હતો.
રવિવારે 61 વર્ષીય અન્ય એક વ્યક્તિ કોરોના પોઝિટિવ આવ્યો હતો. તે અન્ય દર્દીના સંપર્કમાં હતો કે કેમ તે મુદ્દે હજુ માહતી મળી નથી. પહેલા કેસની જેમ તે પણ 1 મહિનાથી ડાનાંગ શહેરમાં રહે છે અને તેણે અન્ય કોઈ જગ્યાએ પ્રવાસ પણ કર્યો નથી. તે સારવાર માટે 18 જુલાઈએ હોસ્પિટલમાં ગયો હતો.
વિએટનામમાં અત્યાર સુધી 418 કોરોનાના કેસ આવ્યા છે
આ સાથે જ ડાનાંગ શહેરના સત્તાધીશોએ લોકોને સોશ્યલ ડિસ્ટન્સિંગ જાળવવા અને જાહેર સ્થળોએ જ્યાં 30થી વધુ લોકો હોય ત્યાં ભેગા ન થવા માટે વિનંતી કરી હતી. આ ઉપરાંત તહેવારો, ધાર્મિક ઉજવણી, બાર, સ્પા વગેરે ઉપર પણ પ્રતિબંધ મુકવામાં આવ્યો છે. આ સાથે જ શહેરમાં 14 દિવસ માટે પ્રવાસન બંધ કરી દેવામાં આવશે. દેશના PM નૂઈન ઝુઆન ફુકે અધિકારીઓને સરહદ ઉપર સુરક્ષા વધારવા માટે આદેશ આપ્યો હતો જેથી કોઈ ગેરકાયદેસર રીતે દેશની બહાર કે અંદર ન આવે. વિએટનામમાં અત્યાર સુધી 418 કોરોનાના કેસ આવ્યા છે જેમાં હજુ સુધી કોઈ વ્યક્તિના મોત નોંધાયા નથી.