પેટીએમમાં કેવાયસી કરવાનું બાકી છે તેમજ ક્રેડિટ કાર્ડ અને ડેબિટ કાર્ડ બ્લોક થઇ જશે તેવું કહી ઓનલાઇન લાખો રૂપિયાની ઉચાપત કરવાના અનેક કિસ્સાઓ શહેરમાં દિવસે દિવસે વધી રહ્યા છે. લોકોમાં જાગૃતિના અભાવે સાયબર ક્રાઇમના કિસ્સાઓ બની રહ્યા છે જેમાં દરરોજ દસેક અરજીઓ સાયબર ક્રાઇમ પોલીસ સ્ટેશનમાં આવી રહી છે.
પેટીએમ કંપનીથી બોલું છું... કેવાયસી કરવાનું બાકી છે તેમ કહીને ગઠિયાએ વૃદ્ધના ખાતામાંથી ૧૬.૭૩ લાખ રૂપિયા ઉપાડી લેતાં મામલો સાયબર ક્રાઇમમાં પહોંચ્યો છે. ગઠીયાએ વૃદ્ધને વિશ્વાસમાં લઇને કેવાયસી કરવા માટે ઇન્ટરનેટ બેન્કિંગનો લોગ ઈન આઇડી પાસવર્ડ લઇને આ ચીટિંગ આચર્યું છે.
મણિનગર પૂર્વમાં આવેલી જયશુભલક્ષ્મી સોસાયટીમાં રહેતા અને નિવૃત્ત જીવન ગુજારતા ૮૪ વર્ષિય કૌશિકરાય ભાસ્કરરાવ દેસાઇએ સાયબર ક્રાઇમ પોલીસ સ્ટેશનમાં ૧૬.૭૩ લાખનું ચીટિંગ કર્યાની ફરિયાદ કરી છે. કૌશિકરાયે મણિનગરની એક્સિસ બેન્કમાં ખાતું ખોલાવ્યું હતું તથા પત્ની રમાબહેનનું પણ ખાતું ખોલાવ્યું હતું. જેમાં તે બચત કરતાં રૂપિયા જમા કરાવતા હતા.
તારીખ ૧૧ ડિસેમ્બરના રોજ કૌશિકરાય તેમના ઘરે હાજર હતા ત્યારે બપોરે સવા ચાર વાગ્યાની આસપાસ તેમના મોબાઇલ પર એક ફોન આવ્યો હતો. ફોન કરનારે તેની ઓળખ રઘુકુમાર કુશવાહા બતાવી હતી અને તે પેટીએમથી બોલતા હોવાનું જણાવ્યુ હતું. કૌશિકરાય પેટીએમનો ઉપયોગ કરતા હોવાથી ફોન કરનાર રઘુકુમાર કુશવાહાએ કેવાયસી કરવાનું બાકી હોવાનું જણાવ્યુ હતું. તેણે વધુમાં જણાવ્યુ હતુંકે જો પેટીએમનું કેવાયસી નહીં કરાવો તો તો તે બંધ થઇ જશે.
કૌશિકરાય દવાઓનાં બિલ ચુકવવામાં તેમજ અન્ય બિલ પેમેન્ટ કરવામાં પેટીએમનો વધુમાં વધુ ઉપયોગ કરતા હોવાથી તેમને રઘુકુમાર કુશવાહાની વાત માની લીધી હતી અને કેવાયસી કરવા માટે તૈયાર થઇ ગયા હતા. રઘુકુમાર કુશવાહાએ ગૂગલ પ્લે સ્ટોરમાંથી કેવાયસી પેટીએમ ડાઉનલોડ કરવા માટે કૌશિકરાયને કહ્યું હતું. જેમાં તેમને એપ્લિકેશન સર્ચ કરી હતી. જોકે એપ્લિકેશન સર્ચ થઇ નહીં. જેથી રઘુકુમારે કૌશિકરાયને લેપટોપ યુઝ કરતા હો તો તેમાંથી પ્રોસેસ કરવાનું કહ્યું હતું. કૌશિકરાયે લેપટોપ શરૂ કર્યા બાદ રઘુકુમારે ટીમ વ્યુઅર યુઝ કરતા હોવાનું પુછ્યું હતું.
કૌશિકરાય ટીમ વ્યુઅર યુઝ કરતા હોવાનું જણાવતાં તેણે નવ આંકડાનો કોડ માગ્યો હતો. જેથી કૌશિકરાયે તેમને કોડ આપી દીધો હતો. જોકે રઘુકુમારે નવ આંકડાનો કોડ નહીં ચાલે દસ આંકડાનો કોડ આપવો પડશે તેમ કહીને ટીમ વ્યુઅરનો એક્સેસ લેવાનો પ્રયત્ન કર્યો હતો. જેક ટેકનિકલ કારણોસર રઘુકુમારને ટીમ વ્યુઅર એક્સેસ કરી શક્યો નહી.
કૌશિકરાયને ઓનલાઇન કેવાયસી નહીં થતું હોવાથી બેન્કમાં જઇને કરાવી દેવાનું રઘુકુમારને જણાવ્યુ હતું. જેથી તેમનો વિશ્વાસ જીતવા માટે કહ્યું હતુંકે પેટીએમ કંપની તરફથી કેવાયસી પ્રોસેસ ઓનલાઇન કરવા જ નિમણૂક કરવામાં આવી છે. જેથી સિનિયર સિટીઝનને હેરાનગતિ ના થાય અને બેન્કમાં જવાની જરૂર પડે નહીં.
રઘુકુમારે અલગ અલગ વાતો કરીને કૌશિકરાયનો વિશ્વાસ કેળવ્યો હતો અને ઇન્ટરનેટ બેન્કિંગ વાપરતા હોવાથી તેના થકી કેવાયસીની પ્રોસેસ થઇ શકે છે. તેમ કહ્યું હતું. કૌશિકરાય એક્સિસ બેન્કની ઇન્ટરનેટ બેન્કિંગ વાપરતા હોવાનું કહ્યું હતું. જેથી રઘુકુમારે યુઝર આઇડીને પાસવર્ડ માગ્યો હતો. કૌશિકરાયે પહેલાં યુઝર આઇડી અને પાસવર્ડ આપવાનો ઇન્કાર કરી દીધો હતો.
રઘુકુમારે કૌશિકરાયને બાંયધરી આપી હતી કે યુઝર આઇડી પાસવર્ડથી કોઇ નુકસાન નહીં થાય અને બેન્કમાં ગયા વગર કેવાયસીની પ્રોસેસ થઇ જશે. કૌશિકરાયે વિશ્વાસ કરીને ઇન્ટરનેટ બેન્કિંગના યુઝર આઇડીને પાસવર્ડ આપી દીધો હતો. જેમાં રઘુકુમારે ત્રણ સવાલો પુછ્યા હતા.
જેનો જવાબ કૌશિકરાયે આપ્યો હતો અને ત્યારબાદ મોબાઇલ પર આવેલ સિક્યોરિટી કોડ પણ આપી દીધો હતો. ત્યારબાદ પેટીએમમાં જુદી જુદી લિમિટ રાખવાનું કહીને ઓટીપી નંબર પણ કૌશિકરાયે આપી દીધા હતા. ઓટીપી આપવાની સાથે જ રઘુકુમારે કૌશિકરાય અને તેમની પત્નીનાં ખાતામાંથી ૧૬.૭૩ લાખ રૂપિયા ઉપાડી લીધા હતા. સાયબર ક્રાઇમ પોલીસ સ્ટેશને ગુનો દાખલ કરીને તપાસ શરૂ કરી છે.