રશિયા-યુક્રેન વચ્ચેનાં યુદ્ધનો આજે 29મો દિવસ છે ત્યારે જો હવે રશિયા યુક્રેન વિરૂદ્ધ પરમાણુ હથિયારોનો ઉપયોગ કરશે તો અમેરિકાએ પણ યુદ્ધના મેદાનમાં ઉતરવાની તૈયારીઓ શરૂ કરી દીધી છે.
રશિયા યુક્રેન વિરૂદ્ધ પરમાણુ હથિયારોનો ઉપયોગ કરશે તો....
અમેરિકાએ પણ યુદ્ધમાં ઉતરવાની તૈયારીઓ કરી દીધી
આજે તમામ NATO સભ્ય દેશોના નેતાઓની યોજાશે બેઠક
રશિયા-યુક્રેન યુદ્ધ વચ્ચે સમગ્ર વિશ્વને ચિંતામાં મૂકી દે એવાં સમાચાર સામે આવી રહ્યાં છે. કારણ કે, જો રશિયા યુક્રેન વિરૂદ્ધ પરમાણુ હથિયારોનો ઉપયોગ કરશે તો અમેરિકાએ પણ યુદ્ધના મેદાનમાં ઉતરવાની યોજના બનાવી લીધી છે. જો રશિયા યુક્રેન સામે રાસાયણિક, જૈવિક અથવા પરમાણુ શસ્ત્રોનો ઉપયોગ કરે તો અમેરિકાએ પણ એક આકસ્મિક યોજના તૈયાર કરી દીધી છે.
આ પ્રક્રિયામાં સામેલ અધિકારીઓના જણાવ્યાં અનુસાર, રાષ્ટ્રીય સુરક્ષા અધિકારીઓની એક ટીમ કે જેને 'ટાઈગર ટીમ' તરીકે ઓળખવામાં આવે છે તે પ્રતિક્રિયા પર વિચાર કરી રહી છે. તેમનું કહેવું છે કે, જો રશિયા નાટોના વિસ્તારોમાં કાફલા પર હુમલો કરે છે અને યુક્રેનમાં આ શસ્ત્રો ઉતારે છે તો અમેરિકા જવાબ આપવા માટે તૈયાર હશે. તમને જણાવી દઈએ કે, 24મી માર્ચે એટલે કે આજે તમામ NATO સભ્ય દેશોના નેતાઓની બેઠક યોજાવા જઈ રહી છે. તે બેઠકમાં આ મુદ્દે ચર્ચા પણ થઈ શકે છે.
રશિયાએ યુક્રેનમાં યુદ્ધ અપરાધ કર્યાઃ US
યુએસના વિદેશ મંત્રી એન્ટની બ્લિંકને બુધવારે જણાવ્યું કે, રશિયાએ યુક્રેનમાં યુદ્ધ અપરાધ કર્યા છે અને બાયડન પ્રશાસન અન્યની સાથે મલીને ગુનેગારો સામે કાર્યવાહી કરવા માટે કામ કરશે." બ્લિંકને એક નિવેદનમાં જણાવ્યું કે, 'હાલમાં ઉપલબ્ધ માહિતીના આધારે આજે હું જાહેરાત કરી શકું છું કે અમેરિકાની સરકારે મૂલ્યાંકન કર્યું છે કે રશિયન દળના સભ્યોએ યુક્રેનમાં યુદ્ધ અપરાધ કર્યા છે." તેઓ NATO નેતાઓની આપાત શિખર બેઠકમાં ભાગ લેવા રાષ્ટ્રપતિ જો બાયડન સાથે બ્રસેલ્સ જઈ રહ્યાં છે.
અમેરિકાના ઉચ્ચ રાજદ્વારીએ જણાવ્યું કે, 'અમેરિકા જાણકારીને સહયોગી, ભાગીદારો અને આંતરરાષ્ટ્રીય સંસ્થાઓ સાથે શેર કરશે, જેની જવાબદારી યુદ્ધ અપરાધો અને માનવતા વિરુદ્ધ અપરાધોના આરોપોની તપાસ કરવાની છે. બ્લિંકને જણાવ્યું કે, “અમે અંધાધૂંધ હુમલાઓ અને ઈરાદાપૂર્વક નાગરિકોને નિશાન બનાવતા હુમલાઓ તેમજ અન્ય અત્યાચારોના ઘણા વિશ્વસનીય અહેવાલો જોયા છે. રશિયાની સૈન્યએ રહેણાંક ઇમારતો, શાળાઓ, હોસ્પિટલો, જટિલ ઇન્ફ્રાસ્ટ્રક્ચર, નાગરિક વાહનો, શોપિંગ સેન્ટરો અને એમ્બ્યુલન્સનો નાશ કરી દીધો છે, હજારો નિર્દોષ લોકોને માર્યા અથવા ઘાયલ કર્યા છે.
રશિયાના રાષ્ટ્રપતિ વ્લાદિમીર પુતિનના ઉચ્ચ સલાહકારે બુધવારે સરકારમાંથી રાજીનામું આપી દીધું હતું અને યુક્રેન પર રશિયાના આક્રમણના વિરોધમાં રશિયા છોડ્યું હતું. અનાતોલી ચુબૈસ સતત વિકાસ માટે આંતરરાષ્ટ્રીય સંસ્થાઓ સાથેના સંબંધો માટે ક્રેમલિનનાં વિશેષ દૂત હતાં.