તેજસ એક્સપ્રેસને મળેલા સારાં પ્રતિસાદ બાદ હવે ભારતીય રેલવે કેટરિંગ એન્ડ ટૂરિઝમ કોર્પોરેશન (આઈઆરસીટીસી) નવા સેગમેન્ટમાં ટ્રેન ચલાવશે. હમસફર એક્સપ્રેસમાં ઇન્દોરથી વારાણસી રૂટ પર થર્ડ એસી કોચ શરૂ કરવામાં આવશે. મળતી માહિતી પ્રમાણે રેલવે આ ટ્રેનમાં યાત્રા કરનાર યાત્રીઓને આ ખાસ સુવિધા આપવાની છે.
અત્યારે ટ્રેનમાં યાત્રા કરનાર યાત્રીઓએ પોતે જ સામાન લઈને સ્ટેશન સુધી જવું પડે છે. પણ હવે જલ્દી યાત્રીઓને સામાનને લઈને ખાસ સુવિધા આપવામાં આવશે. જેમાં જો તમારી ટિકિટ કન્ફર્મ થઈ ગઈ હશે તો રેલવે ઘરેથી તમારો સામાન લેશે અને પછી તેને તમારી સીટ સુધી પહોંચાડી દેશે. એ જ રીતે તમારે જ્યાં જવાનું છે ત્યાં પણ તમારા ડેસ્ટિનેશન સુધી સામાન પહોંચવાડી જવાબદારી પણ રેલવેની જ હશે. આ સુવિધા સાવ નજીવા દરથી મળી જશે.
રેલવેની નવી યોજના
તમને જણાવી દઈએ કે, આઈઆરસીટીસીની પ્રથમ બે ખાનગી ટ્રેનો લખનઉ-દિલ્હી તેજસ એક્સપ્રેસ અને અમદાવાદ-મુંબઈ તેજસ એક્સપ્રેસ ચલાવે છે. હવે આઇઆરસીટીસી ઈન્દોર-વારાણસી રૂટ પર ત્રીજી ખાનગી ટ્રેન ચલાવશે. આ માટે ઘણી ખાનગી કંપનીઓ સાથે વાત કરવામાં આવી રહી છે. જો આ સુવિધા શરૂ કરવામાં આવે તો વરિષ્ઠ નાગરિકો અથવા સિંગલ મહિલાઓ આ ટ્રેનોમાં મુસાફરી કરે છે, તો તેમના માટે ઘણી સુવિધાજનક સાબિત થશે. આ લોકોને પોતાનો સામાન ઉઠાવવાની મુશ્કેલીમાં રાહત મળશે. આ રીતે ખાનગી કંપનીઓનો પણ રેલવેમાં સમાવેશ કરી શકાશે.
આટલું ભાડું હશે
પ્રાઈવેટ હમસફર એક્સપ્રેસનું ભાડું આઈઆરસીટીસી નક્કી કરશે. એવું કહેવાઈ રહ્યું છે કે, હમસફર એક્સપ્રેસથી 7થી 10 ટકા વધુ ભાડું હશે. ઈન્દોર-વારાણસી રૂટ પર આવનારા પ્રવાસીઓ માટે આ ખાસ પેકેજ હશે. આઈઆરસીટીસી મુજબ, ઈન્દરો-વારાણસી રૂટ પર ટૂરિઝ્મની શક્યતાઓ છે. જેથી પ્રાઈવેટ હમસફર એક્સપ્રેસ શરૂ થશે. આ ટ્રેનમાં ખાન-પાન સહિત અને સુવિધાઓ પણ આપવામાં આવશે. આગામી એકથી દોઢ મહિનામાં આ ટ્રેન શરૂ કરવાનું લક્ષ્ય છે.
150 નવી પ્રાઈવેટ ટ્રેન ચાલશે
તમને જણાવી દઈએ કે, નાણાં પ્રધાન નિર્મલા સીતારામણે 1 ફેબ્રુઆરી, 2020એ રજૂ કરેલા તેમના બીજા બજેટમાં ખાનગી ટ્રેનોની સંખ્યામાં વધારો કરવા પર ભાર મૂક્યો હતો. તેમણે એક ભાષણમાં કહ્યું હતું કે, તેજસ એક્સપ્રેસ જેવી ટ્રેનોની સંખ્યામાં વધારો કરવામાં આવશે. સરકારે પબ્લિક પ્રાઇવેટ પાર્ટનરશિપ (પીપીપી) મોડેલ પર નવી નવી ખાનગી ટ્રેનો ચલાવવાનો નિર્ણય લીધો છે. તેજસ ટ્રેનની સંખ્યા વધારવામાં આવશે, જે પર્યટક સ્થળે જશે. સાથે જ 550 રેલ્વે સ્ટેશનો પર વાઇ-ફાઇ સુવિધા આપવામાં આવી છે.